Icyuho ku mbuga nkoranyambaga nyuma y’ihagarikwa rya Trump kuri Twitter na Facebook

Yanditswe na Akayezu Jean de Dieu
Kuya 24 Mutarama 2021 saa 10:46
Yasuwe :
0 0

Perezida Donald Trump yasoje inshingano nk’umuyobozi wa Leta Zunze Ubumwe za Amerika, kuwa Gatatu tariki 20 Mutarama. Gusa muby’ukuri ni nk’aho yavuye mu biro mu byumweru bishize igihe ubuyobozi bwa Facebook na Twitter bwatangazaga ko bwamuhagaritse burundu mu bakoresha izi mbuga nkoranyambaga.

Icyo gihe, Abanyamerika benshi ntibongeye kumva cyangwa kumenya amakuru y’uwari perezida wabo umunsi ku munsi dore ko gahunda zijyanye n’akazi ke ka buri munsi zatangarizwaga ku mbuga nkoranyambaga ze akenshi.

Uruhare rw’ubutumwa bwa Trump ku mbuga nkoranyambaga ruragaragara. Kwanga kwemera ibyavuye mu matora abinyujije kuri izo mbuga, byakuruye amacakubiri kandi bituma ibigo nka Facebook byinjira mu rugamba rwo kurwanya abatangaza amakuru y’ibihuha agamije kuyobya rubanda.

Umwanditsi w’Ibitabo, Kurt Wagner yagize ati“Ntabwo nari nzi ko iherezo rya perezidansi ya Trump rizagira ingaruka kuri Amerika, ariko hari ibimenyetso bimaze kugaragara ko kugenda kwe byagize ingaruka ku mbuga nkoranyambaga.”

Nk’urugero, kuri Twitter, umubare w’ibyatangajwe bivuga ku inshuro ijambo ryakoreshejwe mu kugaragaza ko mu matora habaye uburiganya, ryagabanyutse cyane nyuma y’uko Trump avanywe burundu kuri Twitter ku wa 8 Mutarama.

Icyumweru kibanziriza ihagarikwa rya konti ya Trump, hatangajwe ubutumwa ‘Post’ miliyoni 2.29 zivuga ku ‘buriganya mu matora’ ugereranije no hafi ibihumbi 606 mu cyumweru cyakurikiyeho.

Bigaragara ko habayeho igabanyuka rya 73% nkuko byatangajwe na Zignal Labs, sosiyete ikora igenzura ry’imbuga nkoranyambaga.

Kuri Facebook, gukoresha ijambo "Guhagarika ubujura" byagabanutseho gato kuva aho Trump ahagaritswe, nk’uko byagaragajwe n’ubusesenguzi bwakozwe na CrowdTangle.

Mu cyumweru cyo ku ya 10 Mutarama, ibyatangajwe byari 7 700 kuri Facebook byatangajwe hakoreshejwe iryo jambo, ugereranije n’ibyatangajwe 10,600, icyumweru kibanziriza iki, ubwo imyigaragambyo y’urugomo yibasiye ingoro y’inteko Ishinga Amategeko y’Amerika, nk’uko CrowdTangle ibigaragaza.

Birumvikana ko atari Trump gusa. Twitter na Facebook byombi byahagaritse konti z’abahezanguni bari bibumbiye mu cyitwa QAnon, bashyigikiye Trump. Twitter yonyine iherutse gukuraho 70 000 muri izo konti, bikaba bishoboka ko byagize uruhare runini mu igabanuka ry’abavugaga ko habayeho uburiganya bw’amatora.

Izindi mpinduka zimbitse, nubwo bitazwi igihe bizamara, ni ikinyuranyo kiri hagati yuko abari bashyigikiye ibitekerezo bya Trump n’abatamushyigikiye basubizanyaga cyangwa baterana amagambo, byaragabanyutse n’ubwo bigaragara ko abashyigikiye Trump bakiruta abatamushyigikiye.

Imibare y’Umuryango udaharanira inyungu urengera abanyamakuru, Media Matters for America, igaragaza ko abakunze (likes), abatanze ibitekerezo (Comments) n’abasangije (share), ibitekerezo bya Trump bageze kuri 47.5% by’abantu bose bakoresha inkuta z’Abanyepolitiki muri Amerika mu cyumweru konti ya Trump yahagaritswemo.

Ku rundi ruhande, konti za Facebook z’abadashyigikiye ibitekerezo bya Trump bari bageze kuri 25.3% muri icyo gihe.

Nyuma yo guhagarikwa kwa Trump, umubare w’abakwirakwiza ubutumwa babusangiza abandi ku ruhande rw’abamushyigikiye wagabanyutseho 37.5% gusa, naho abatamushyigikiye biyongeraho 30%, kugeza ku wa 15 Mutarama.

Kugeza ubu umwanditsi Kurt Wagner yibaza niba iyi ariyo ntangiriyo ya politiki y’iringaniza kuri Facebook.

Ati “Naba nihuse cyane mvuze ko aribyo, kandi biragoye gufata imyanzuro myinshi ku byerekeranye n’ahazaza h’imbuga nkoranyambaga mu gihe cy’ibyumweru bibiri byaranzwe n’imvururu kuri Capitol, kweguza Trump n’irahira rya Perezida mushya.”

Yakomeje agira ati “Ariko birashoboka ko ari ikimenyetso kinini cyerekana ko gucecekesha imbuga nkoranyambaga za Trump, hari icyo byatanze. Kuwa Gatatu, irahira rya Joe Biden ryagenze neza nta nkomyi. Nta matsinda agaragara, manini y’abigaragambyaga bavuga ko yibye amatora.”

Nta makuru ahari abigaragaza, ariko imigendekere myiza y’irahira rya Joe Biden ryabaye ku wa Gatatu igaragaza ko gucecekesha imbuga nkoranyambaga za Trump birimo kugira ingaruka nziza ku nzego za Amerika zishinzwe umutekano.

Donald Trump yakundaga gukoresha imbuga nkoranyambaga cyane ndetse n'ibyemezo bikomeye niho yabitangarizaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .