Ibyo wamenya kuri ‘Spark’ telefone nshya ikoranye ikoranabuhanga Tecno yashyize ku isoko

Yanditswe na Evariste Nsengimana
Kuya 25 Kanama 2017 saa 08:47
Yasuwe :
0 0

Ikigo gicuruza Telefone zigezweho, Tecno Mobile Rwanda, cyamuritse igezweho, yitwa ‘Spark’, ifite akarusho ko gufata amashusho acyeye, gukora ibikorwa byinshi icyarimwe, kandi iri ku giciro cyiza.

Spark imaze igihe kitageze ku kwezi ku isoko mpuzamahanga, ikaba imaze iminsi mike cyane igeze mu Rwanda aho igura ibihumbi 85 mu mafaranga y’u Rwanda.

Ubwo yamurikirwaga abafatanyabikorwa bayo, Umuyobozi Wungirije muri Tecno ushinzwe ibikorwa no kubimenyekanisha mu Rwanda, Aimable Ngendahayo, yavuze ko itandukaniro ryayo n’izindi telefone isanzwe icuruza ari uko ihendutse kandi ikoranye ikoranabuhanga.

Yagize ati “Dusanzwe dufite ku isoko telefone nziza zitandukanye ariko uyu munsi twazaniye Abanyarwanda iyitwa Spark. Benshi usanga batubwira ko bashaka gutunga telefone nziza ifite Camera nziza, ibika umuriro igihe kinini, yiyubashye ikanubahisha nyirayo kandi ikoze neza. Twabatekerejeho tubazanira iyo muri ubu bwoko ihendukiye abantu benshi, igezweho, ifotora neza, ibika umuriro, ifite n’ububiko buhagije.”

Yakomeje asobanura ko Spark ifite ubushobozi bwo gukora ibijya kungana na Camon C8, isanzwe ikunzwe na benshi ariko yakunze kuvugwa ko igurwa n’abishoboye.

Bimwe mu biranga telefone ya Spark

1. Ifite Camera ebyiri, iy’inyuma ifite MPs 13, iy’imbere MPs 5 ndetse na flash biyongerera ubushobozi bwo gufata ifoto icyeye n’ubwo haba mu mwijima.

2. MixFlash: Ni uburyo yihariye buyifasha gukoresha urumuri rwa flash ndetse n’urw’ikirahure (Screen) ikarushaho kugira amafoto arabagirana.

3. Ifite inch 5.5, ni ukuvuga ibipimo byifashishwa harebwa uburebure kuva mu nguni ujya mu yindi, biyongerera ubwiza mu kwerekana amashusho.

4. Ifite ikirahure gikoranye ikoranabuhanga rigezweho rya IPS, riyifasha kurwanya imirasire y’izuba mu gihe uyikoresha ayirebaho ryaka.

5. FingerPrint: Iri ni ikoranabuhanga rifasha uyikoresha ibintu birimo kuyatsa akoresheje igikumwe cye ibika akiyikoresha bwa mbere ku buryo undi agishyizemo itakwaka cyangwa ngo izime; gufata amafoto atiriwe ujya muri porogaramu ya Camera no kwitaba uguhamagaye.

6. Ifite Ram ya 2GB iyiha ubushobozi bwo kubika by’igihe gito ibintu byinshi nk’ubutumwa cyangwa nimero z’abaguhamagaye utari usanzwe ufite.

7. Ifite ububiko buhoraho, Rom, ya 16 GB iyongerera ubushobozi bwo kubika ibintu by’igihe kirekire byinshi nka film, indirimbo, amafoto n’ibindi utiriwe ushyiramo memory card.

8. Ifite akarusho k’ikoranabuhanga rya HOS 2.3, riyifasha kuba wayikoreramo ibintu birenze kimwe icyarimwe, urugero, ukaba wakwandikirana n’umuntu, yakwandikira nk’ijambo utumva, igice kimwe cyayo ukaba wacyifashisha ureba mu nkoranyamagambo ubusobanuro bwaryo.

9. Ifite bateri y’ubushobozi bungana na 3000mAh mAh (igipimo gifatirwaho umuriro ukoreshwa muri telefone) bituma ibika umuriro igihe kirekire.

10. Ijyamo SIM ebyiri, igakoresha Android 7.0 (Nougat) n’ibindi byinshi bisanzwe biranga telefone za Tecno.

Ubuyobozi bwa Tecno Mobile Rwanda bwatangaje ko hazajya haza ubundi bwoko bwa Spark ndetse by’umwihariko mu minsi mike hazaza iyitwa Spark Plus, izaba ifite nayo umwihariko wayo.

Iyi telefone izatangira kuboneka ku bacuruzi bayo hirya no hino mu gihugu, hanashyirweho tombola ku bakiliya bazagenda batsindira ibihembo bitandukanye kuri iyi telefone yatangiye kwishimirwa cyane ku bakoresha imbuga nkoranyambaga.

Ibiranga iyi telefone nshya ya Tecno
Umuyobozi Wungirije muri Tecno ushinzwe ibikorwa no kubimenyekanisha, Aimable Ngendahayo
Bamwe mu basubije ibibazo kuri Tecno bahembwe Spark

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza