Havumbuwe batiri ishobora kubika umuriro wakoresha smartphone iminsi itanu

Yanditswe na Iradukunda Serge
Kuya 7 Mutarama 2020 saa 08:51
Yasuwe :
0 0

Abashakashatsi bo muri Australia bakoze batiri ishobora kubika umuriro wakoresha smartphone iminsi itanu itarongera gucomekwa ndetse ikaba yanatanga umuriro imodoka yagenderaho ibilometero 1000.

Ni batiri ikoze mu binyabutabire bya Lithium na Sulfur byitezwe ko mu gihe yaba itangiye gukoreshwa na benshi yafasha mu kugabanya ihumana ry’ikirere ndetse igakoresha ingufu neza.

Itsinda ryo muri Kaminuza ya Monash iherereye mu Mujyi wa Melbourne ryakoze iyi batiri rivuga ko ariyo ya mbere ku Isi ikoresha ingufu neza ndetse ikaba yakora ku kigero gikubye kane izindi zisanzwe zikora.

Umwe mu bagize iri tsinda, Matthew Hill, yavuze ko uretse kuba iyi batiri ikora neza izanafasha mu kugabanya iyangirika ry’ibidukikije.

Yagize Ati “Ubu buryo ntibuzafasha gusa mu bijyanye no kurambya umuriro ahubwo n’igiciro bitwara umuntu abukora kiri hasi, imikorere yayo ishingiye ku mazi ishobora kugabanya bigaragara imyanda yangiza ibidukikije.”

Aba bashakashatsi bavuze ko iyi batiri izafasha mu kurwanya imihindagurikire y’ibihe.

Izi batiri zikoze muri Lithium na Sulfur zari zisanzwe zikoreshwa ku ndege n’imodoka zimwe na zimwe ubu akaba ari ubwa mbere zaba zigiye gukoreshwa kuri telefoni.

CNN yanditse ko hari abagaragaza ko nubwo izi batiri zibika umuriro igihe kirekire hari abazinenga ko zitaramba.

Mu gukora iyi batiri ifite ubushobozi budasanzwe mu kubika umuriro, abashakashatsi bavuguruye imiterere y’igice cy’iyari isanzwe kizwi nka ‘Cathode’ kugira ngo ibashe gukoresha umuriro muke kandi nta kigabanutse mu mbaraga itanga.

Uyu mushinga wamaze guterwa inkunga na Leta ya Australia bitaganyijwe ko uzakorerwa irindi gerageza mu mpera z’uyu mwaka rigamije gusuzuma byisumbuyeho imikorere y’izi bateri.

Abashakashatsi bo muri Australia bakoze batiri ishobora kubika umuriro wakoresha smartphone iminsi itanu cyangwa igatanga umuriro imodoka yagenderaho ibilometero 1000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza