00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe ikoranabuhanga rizafasha za Kaminuza n’abanyeshuri kubika amakuru byoroshye

Yanditswe na Muhonzire Sylvine
Kuya 12 Kanama 2021 saa 01:30
Yasuwe :
0 0

Sosiyete y’ikoranabuhanga ya SPARC Systems Limited ikomoka muri Malawi ariko inakorera mu Rwanda, yatangije ikoranabuhanga ryiswe SARIS [Student Record Academic Information Systems] rizorohereza abanyeshuri na za Kaminuza kubika amakuru ajyanye n’amasomo ku buryo kuyabona bizajya byoroha na nyuma y’imyaka myinshi.

Ubusanzwe iyo umunyeshuri wa Kaminuza cyangwa uwayirangije akeneye kubona amanota ya Kaminuza, impamyabushobozi, cyangwa icyangombwa cyerekana uko yatsindaga mu ishuri (transcript) bimusaba kujya ku ishuri yizeho bakamufasha kubibona ndetse rimwe na rimwe bigatwara igihe kinini.

Umuyobozi Mukuru wa SPARC Systems Limited, Wisely Phiri, yavuze ko iri koranabuhanga rije kuziba icyuho no gukemura ibibazo abanyeshuri na Kaminuza ku Isi hose bahuraga nabyo byo kubika no kubona byoroshye amakuru.

Yakomeje avuga ko SARIS izagabanya n’ikibazo cy’abantu bashaka akazi bakajya gukoresha impamyabushobozi z’impimbano cyangwa n’impapuro zindi zerekeye amasomo kugira ngo bakabone byoroshye.

Ati “Ubu buryo buzajya bukoreshwa n’amashuri makuru na za Kaminuza kugira ngo bibashe kubika amakuru y’abanyeshuri neza kandi mu buryo buboneye, kuva umunyeshuri yiyandikishije kugeza igihe arangirije amashuri ye ndetse bunafashe kaminuza koherereza abanyeshuri amanota yabo.”

SARIS izajya ikoreshwa n’abanyeshuri, abarimu, abagenzuzi b’ibigo, abayobozi bose kugera ku rwego rw’umuyobozi w’ishami rya Kaminuza ndetse n’abandi.

Ubu buryo buzajya bufasha abakoresha kugenzura niba ibyangombwa abakozi babo batanze byerekeranye n’aho bize ari byo koko atari ibihimbano.

Phiri yavuze ko ubu buryo bwizewe kandi butekanye kuko bwakozwe n’inzobere mu ikoranabuhanga za SPARC zifatanyije na Kaminuza zimwe mu gihe cy’amezi umunani ku buryo nta wagira ikibazo cy’uko bwakwinjirirwa n’abajura biba bakoresheje ikoranabuhanga ibizwi nka Cyber-attack.

Ati “Mu bigendanye n’umutekano w’ikoranabuhanga tuvuga ko nta ’système’ ibaho idashobora kwinjirirwa 100% ariko twakoze ubu buryo tubitekereza ko bishobora kubaho. Bityo rero twabukoranye n’ikizaburinda kwinjirirwa.”

Bimwe muri byo harimo nko kuba iyo umunyeshuri agiye kuyikoresha abanza kohererezwa ubutumwa kuri email ye kugira ngo bizere umutekano w’ugiye kuyikoresha, ikindi iyo hari impinduka zikeneye gukorwa muri système bigomba kwemezwa n’umuntu ufite inshingano zikomeye muri SPARC.

Phiri yavuze ko ubu buryo buzafasha za Kaminuza ariko bitabujijie ko n’ibindi bigo cyangwa za sosiyete zifuza kuyikoresha zakorerwa uburyo bwazo kuko hari inzobere mu ikoranabuhanga zifite ubushobozi bwo gukora ’système’ igendanye n’ikigo icyo ari cyo cyose.

Ati “Ikoranabuhanga ryacu rifite uburyo buteye imbere cyane kandi rifite ubushobozi bwo gukora raporo mu kanya nk’ako guhumbya gusa rishobora gukorerwa impinduka kugira ngo bigendane n’ibikenewe mu kigo runaka.”

SPARC Systems Limited ni ikigo kizobereye mu by’ikoranabuhanga cyatangiye mu 2013, ubu gikorera hirya no hino muri Afurika ndetse gifite ibiro bitanu muri Malawi, mu Rwanda na Zambia.

Umuyobozi wa SPARC, Wisely Phiri, yavuze ko uburyo bushya sosiyete ye yatangije bwa SARIS buzakemura ikibazo cyo kubika no kubona amakuru yerekeranye n'amasomo y'abanyeshuri ba Kaminuza n'amashuri makuru
Phiri yatangaje ko SARIS izakemura ikibazo cy'abakoresha impapuro mpimbano z'amasomo kugira ngo bakunde babone akazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .