Hagiye gushorwa miliyoni $18 mu ikoranabuhanga rizaca uburiganya mu bamotari

Yanditswe na Iradukunda Serge
Kuya 3 Ukuboza 2019 saa 09:48
Yasuwe :
0 0

Kompanyi Nyarwanda y’ikoranabuhanga, Pascal Technology (PYT) limited, yahawe miliyoni 18 z’amadorali n’indi yo muri Afurika y’Epfo yitwa Altron azifashishwa mu kunoza uburyo umwuga w’ubumotari ukorwamo hifashishijwe ikoranabuhanga rigenzura moto.

Ni amasezerano yasinywe n’impande zombi kuri uyu wa mbere agamije gushyira ikoranabuhangaririmo mubazi na GPS kuri moto ndetse na porogaramu izajya ishyirwa muri telephone ku buryo abashinzwe umutekano babasha kugenzura moto aho yaba iri hose.

Muri uyu muhango wo gusinya amasezerano, Minisiteri y’ibikorwa remezo yatangaje ko umunsi iri koranabuhanga rizaba ryatangiye gukoreshwa, rizafasha guca imwe mu myitwarire idahwitse n’amakosa byagaragaraga mu mwuga wo gutwara abantu kuri moto.

Umukozi ushinzwe Ubwikorezi rusange n’umutekano wo mu muhanda mu Minisiteri y’ibikorwa remezo, Zirikana François, yagize ati “Kugeza ubu iyo urebye mu bamotari benshi bakora impanuka usanga nta bwishingizi bafite ariko muri iri koranabuhanga umumotari udafite ubwishingizi tuzajya tumureba tumenya ko bwarangiye.”

“Icya kabiri ni uko umumotari udafite ibyangombwa ntabwo azashobora kongera gutwara moto kuko iryo koranabuhanga rizajya rihabwa umuntu ufite icyangombwa”.

Zirikana yavuze ko kandi iri koranabuhanga rizaba ririmo akuma kazafasha gukurikirana umumotari igihe yakoze amakosa.

Mininfra yavuze ko iri koranabuhanga ritagamije guca abamotari mu muhanda ahubwo ko rije mu buryo bwo kurushaho gushimangira imikorere myiza.

Umuyobozi wa Pascal Technology (PTY) Limited, Pascal Ndizeye, yavuze ko iri koranabuhanga rizatangira gushyirwa muri moto uhereye mu cyumweru gitaha kuko icyabakerezaga ari amikoro.

Ati “Kuva dusinyanye amasezerano y’imikoranire ni iyi kompanyi nini muri Afurika kandi ibikoresho byinshi by’ibanze byamaze kuhagera, turatangira mu cyumweru gitaha duhereye ku bamotari barenga ibihumbi birindwi bamaze kwiyandikisha.”

Ndizeye yongeyeho ko kugera muri Mutarama abamotari 10 000 bazaba bamaze kugezwaho iri koranabuhanga.

Iri koranabuhanga rizajyana na porogaramu ya telefoni aho umuntu ashobora kuzuzamo nimero ziranga moto agahita abona aho iherereye, igihe yakoze amakosa.

Kuri ubu umumotari wifuza iri koranabuhanga ashobora kwishyura ibihumbi 200 n’amafaranga 200 mu byiciro cyangwa akayishyurira rimwe.

Uretse ibijyanye n’umutekano iri koranabuhanga ryitezweho kuzafasha mu bijyanye n’igenamigambi kuko izi mashini zizerekana umubare w’abantu bakoresha moto mu Rwanda ndetse n’uw’abari muri uyu mwuga wo gutwara abantu kuri moto.

Umuyobozi wa Altron, Ike Dube na Pasca Ndizeyel nyuma yo gusinya amasezerano y'ubufatanye
Umukozi ushinzwe Ubwikorezi rusange n'umutekano wo mu muhanda mu Minisiteri y’ibikorwa remezo, Zirikana François, yavuze ko iri koranabuhanga rizafasha mu kugenzura abamotari
Umuyobozi wa Pascal Technology (PTY) Limited, Pascal Ndizeye, yavuze mu minsi ya vuba iri koranabuhanga riratangira gushyirwa muri moto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza