Hagaragajwe ko udushya mu ikusanyamakuru twafasha Afurika kugera ku iterambere rirambye

Yanditswe na Twarabanye Venuste
Kuya 20 Ugushyingo 2019 saa 12:41
Yasuwe :
0 0

Impuguke mu bumenyi bw’Isi n’isanzure zigaragaza ko ikoranabuhanga no guhanga udushya mu ikusanyamakuru no kuyasesengura ari imwe mu nkingi zafasha ibihugu bya Afurika kugera ku ntego z’iterambere rirambye (SDGs).

Mu nama iteraniye i Kigali yiga ku guhanga udushya mu ikoranabuhanga ry’ikusanyamakuru hagamijwe gushyira mu bikorwa intego 17 z’iterambere rirambye, hagaragajwe ko igenamigambi ry’igihugu rishingira kumenya amakuru y’ibikorwa, aho bigiye gukorerwa n’abagenerwabikorwa ku buryo bikwiye gushyira imbaraga mu kumenya ayo makuru yose.

Ibyo ngo byafasha ibihugu kumenya amakuru no kuyasesengura ku buryo bworoshya kandi mu gihe gito ku buryo byafasha gushyira mu bikorwa intego z’iterambere rirambye.

Igihugu ngo gishobora kumenya amakuru ku gace runaka gishaka gukoreramo igikorwa kikabasha kwihuta nk’uko u Rwanda rwabashije kubarura kandi rugatanga ibyemezo by’ubutaka.

Kimwe n’urwo rugero ngo ahagiye kubakwa ishuri bituma igihugu kimenya umubare w’abanyeshuri bahari n’amashuri akenewe, bikamera bityo no mu zindi nzego zirimo ubumenyi bw’ikirere, amakarita y’uduce tw’ahantu, imigezi igihugu gifite n’ingano yayo, umubare w’abaturage n’andi makuru igihugu gikenera mu igenamigambi.

Umuyobozi w’umuryango Nyafurika uteza imbere ikusanyamakuru(EIS Africa), Sives Govender, yavuze ko nibura 99% y’ibyemezo abayobozi bafata bisaba ko babanza kwibaza ibyo bagiye gukora aho bagiye kubikorera, abo bizagirira inyungu ndatse niba n’aho hantu hakwiye, ariryo kusanyamakuru bakenera mu byemezo byabo bya buri munsi.

Ati “Wakwibaza ngo ni gute igihugu giteganyiriza ubureri mu mashuri abanza. Ikibazo cya mbere kizaba ngo abaturage banjye bari he, amashuri ari he? Aho ugiye gukorera igikorwa ni ingenzi. Mu buzima, ni he hari icyorezo, ni he gikomeye? Ni ukuvuga ngo kwibaza ngo ni he ni ikibazo gikomeye ushaka gukemura ikibazo runaka, iryo ni ryo kusanyamakuru.”

Icyakora avuga ko ubushakashatsi buheruka bwerekanye 1/3 cy’ibuhugu bya Afurika aribyo bifite Politiki isobanutse yo gukusanya no gusesengura amakuru yafasha kugera ku ntego z’iterambere rirambye, ati “urugendo ruracyari rurerure”.

Minisitiri muri Minisiteri y’Ikoranabuhanga na Inovasiyo, Paula Ingabire yavuze ko ibijyanye no kugira amakuru n’imibare byafashije u Rwanda kugera ku ntego z’icyerekezo 2020.

Bimwe mu bikorwa byakozwe birimo kubarura ubutaka no gutanga ibyemezo byabwo ku baturage, ngo byashobotse kubera u Rwanda ruri kwimakaza ikoranabuhanga.

Ati “Ikigo cy’Ibarurishamibare, gikoresha imibare mu bushakashatsi butandukanye harimo kugaragaza ubwiyongere bw’abaturage, bigaragaza ibikenewe ahantu runaka.”

Umuyobozi mukuru wungirije wa Kaminuza y’u Rwanda ibarizwamo ikigo cy’ikusanyamakuru (GIS center) Philippe cotton, avuga ko aho u Rwanda rugeze ari nk’aho rwabwiye umusozi ngo imuka.

Yavuze ko amasomo bigisha yerekeye uburyo abanyeshuri bashobora kugira icyo bahindura arebana n’imijyi yunganira Kigali, ubuzima, uburezi n’izindi nzego z’ubuzima kugira ngo bazabashe gutanga umusanzu wabo basoje amasomo.

Abagera kuri 500 bo mu bihugu bya Afurika, bateraniye i Kigali mu nama ya 16 y’ibyerekeye ubumenyi bw’isi n’isanzure bunguranamo ibitekerezo ku guhanga udushya mu gukusanya no gukoresha amakuru, hagamijwe kugera ku ntego 17 z’iterambere rirambye.

Minisitiri w'Ikoranabuhanga na Inovasiyo yavuze ko ikusanyamibare rifasha u Rwanda m kumenya ubwiyongere n'imibereho y'abaturage bituma igihugu kimenya ibikenewe ahantu runaka
Umuyobozi mukuru wungirije wa Kaminuza y’u Rwanda ibarizwamo ikigo cy’ikusanyamakuru Phil Cotton yavuze ko mu Rwanda bigisha abanyeshuri uburyo bazimakaza ikusanyamibare mu iterambere
Abahagarariye ibihugu byo muri Afurika bitabiriye kungurana ibitekerezo ku buryo ikoranabuhanga ryakwimakazwa mu ikusanyamakuru hagamijwe ko byoroshya gushyira mu bikorwa intego z'iterambere rirambye
Umuyobozi w’umuryango Nyafurika uteza imbere ikusanyamakuru, Sives Govender yavuze ko ikoranabuhanga rikiri rike mu bihugu bya Afurika nubwo hafi 90% y'ibyemeo abayobozi bafata bishingira ku makuru

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza