Hagaragajwe icyuho mu gucunga ibisigazwa by’ibikoresho by’ikoranabuhanga muri EAC

Yanditswe na Evariste Nsengimana
Kuya 16 Gicurasi 2018 saa 09:48
Yasuwe :
0 0

Umunyamabanga Nshingwabikorwa w’Umuryango ushinzwe Itumanaho muri Afurika y’Uburasirazuba (EACO), Dr Ally Simba, yavuze ko ibihugu biwugize bifite abahanga mu gucunga no kugenzura ikoreshwa ry’ibisigazwa by’ibikoresho by’ikoranabuhanga, ashyira mu majwi politiki zabyo mu kudindiza ishyirwa mu bikorwa rya gahunda zigamije kubicunga, ashingiye ku kuba nta buryo bihuriyeho byose bwashyizweho.

Yabigarutseho ku wa 14 Gicurasi 2018, mu nama y’iminsi itatu yahurije i Kigali, abahanga mu gucunga ibisigazwa by’ibikoresho by’ikoranabuhanga n’abayobozi mu nzego zitandukanye muri EAC, igamije gushakira hamwe uburyo buboneye bwo kubibungabunga.

Dr Ally Simba yagize ati “Hari ikibazo gikomeye mu gucunga ibisigazwa by’ibikoresho by’ikoranabuhanga mu Karere, icya mbere, buri mwaka tuba dufite ibisigazwa toni ibihumbi 140, iryo ni ibarura ryakozwe mu 2015, ubu nta mibare ya vuba dufite, icyo ni ikindi kibazo. Turi gushakisha uburyo buboneye ariko na none mu Karere turacyafite imbogamizi mu bijyanye n’ingamba n’amategeko abigenga, biratandukanye igihugu ku kindi. Icyo ni ikibazo!”

Yakomeje ati “Hari amasezerano amwe abuza urujya n’uruza rw’ibyo bikoresho muri ibi bihugu. Turi kureba ibyo bibazo byose kandi dutekereza ko uburyo bwiza bwo kubyirinda ari uguhuza ingamba n’amategeko byo kurinda ibidukikije muri EAC [..] Ubusanzwe nta kibazo cy’inzobere dufite mu karere kacu, barahari babishoboye ariko iyo bigeze mu bushake bwa politiki z’ibihugu biba ikibazo.”

Uyu muyobozi yavuze ko hazakomeza gukorwa ubukangurambaga mu bayobozi b’ibihugu binyamuryango ku gushyiraho uburyo, politiki n’ingamba zo gucunga ibisigazwa by’ibikoresho by’ikoranabuhanga, bagatumirwa mu nama n’amahugurwa bitegurwa hagamijwe gukuraho izo mbogamizi.

Umuyobozi Mukuru w’Urwego ngenzuramikorere (RURA), Lt. Col Patrick Nyirishema, yavuze ko uko ikoranabuhanga rirushaho kwihuta, ari nako ibisigazwa by’ibikoresho byaryo byiyongera, ndetse iyo bititaweho bishobora kugira ingaruka ku bantu.

Yagize ati “Ibyo bintu rero iyo bititaweho, bishobora kugira ingaruka zikomeye ku bantu, bimwe ndetse biba binifitemo ibishobora kwangiza ibidukikije bikaba byateza ibibazo ku buzima bw’abantu. Niyo mpamvu twagize iyi nama iduhuza nk’ibihugu byose bigize EAC kugira ngo tuganire tunafate ingamba z’uburyo twacunga ibisigazwa by’ikoranabuhanga, uburyo twakomeza kurinda ibidukikije n’abantu.”

Abahanga n’abakurikiranira hafi ibidukikije bitabiriye iyi nama bagaragaje ko ibisigazwa by’ibikoresho by’ikoranabuhanga nk’ibya telefoni, mudasobwa, firigo, batiri, imashini zimesa n’iziteka, televiziyo, ibyuma bishyushya n’ibindi byiyongera nta buryo bwo kubitunganya buhari kuko bitabora, birushaho kuba ikibazo ku bidukikije, bikaba byagira ingaruka ku buzima bw’umuntu.

Umuyobozi Mukuru Wungirije w’Ikigo cy’Igihugu gishinzwe kubungabunga Ibidukikije (REMA), Munyazikwiye Faustin, yasobanuye ko ibisigazwa by’ibikoresho by’ibikoranabuhanga bibamo ubutabire bufite ubumara bubi ku buzima bw’abantu ku buryo bishobora kubatera indwara zirimo kanseri n’izindi.

U Rwanda rusanzwe rwarashyizeho ingamba zigamije gukusanya no gutunganya ibisigazwa by’ikoranabuhanga. Inama y’Abaminisitiri yo ku wa Gatanu, tariki ya 19 Mutarama 2018, yemeje Amasezerano y’imyaka icumi hagati ya Guverinoma y’u Rwanda n’Umushoramari ENVIROSERVE yerekeranye no gucunga uruganda ruherereye mu cyanya cyahariwe inganda mu Karere ka Bugesera, rutunganya imyanda y’ibikoresho bishaje by’ikoranabuhanga. Kuri ubu rumaze gukusanya toni 500, hakaba hari intego ko mu mwaka ruzajya rukusanya byibuze izisaga ibihumbi 10.

Uru ruganda rwatangiranye no gukusanya ibisigazwa by’ibigo bya Leta ariko kuri ubu rukaba rusaba ibigo byigenga n’abantu ku giti cyabo kubikusanya bakarumenyesha rukaza kubitwara ku makusanyirizo yabyo.

Umunyamabanga Nshingwabikorwa w’Umuryango ushinzwe Itumanaho muri Afurika y’Uburasirazuba (EACO), Dr Ally Simba, yavuze ko ibihugu biwugize bifite abahanga mu gucunga no kugenzura ikoreshwa ry’ibisigazwa by’ibikoresho by’ikoranabuhanga
Umuyobozi Mukuru Wungirije w’Ikigo cy’Igihugu gishinzwe kubungabunga Ibidukikije (REMA), Munyazikwiye Faustin, yasobanuye ko ibisigazwa by’ibikoresho by’ibikoranabuhanga bibamo ubutabire bufite ubumara bubi ku buzima bw’abantu
Umuyobozi Mukuru w’Urwego ngenzuramikorere (RURA), Lt. Col Patrick Nyirishema, yavuze ko uko ikoranabuhanga rirushaho kwihuta, ari nako ibisigazwa by’ibikoresho byaryo byiyongera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza