Guhangana birakomeje hagati ya Leta y’u Burusiya na Telegram

Yanditswe na Herve Ugirumukunda
Kuya 17 Ukwakira 2017 saa 09:50
Yasuwe :
0 0

Leta y’u Burusiya ikomeje guhangana n’urubuga rwo kohererezanya ubutumwa ‘Telegram’ rwanze guha inzego z’umutekano amabanga ya bamwe mu barukoresha.

Ejo hashize, uru rubuga ruzwiho kubika ibanga no kudapfa kwinjirirwa, rwaciwe n’urukiko amande y’amafaranga akoreshwa mu Burusiya (roubles) 800 000 (Miliyoni zibarirwa muri 14 z’Amafaranga y’u Rwanda).
RFI ivuga ko umuyobozi wa Telegram, ari nawe wayishinze, Pavel Durov yanze kuva ku izima ngo ntiyagambanira abakiriya be ashyira ibiganiro by’abo mu biganza by’inzego z’ubutasi.

Durov abinyujije ku rubuga nkoranyambaga rwa mbere rukomeye mu Burusiya, Vkontakte, narwo yashinze, yatangaje ko azakomeza guhangana n’ubuyobozi n’ubucamanza bw’u Burusiya.
Ku bwe guha urwego rw’ubutasi amakuru binyuranye n’itegeko nshinga ry’icyo gihugu, rigena uburenganzira bwo guhana ubutumwa mu ibanga.

Inzego z’umutekano z’u Burusiya zishinja Telegram guha icyuho imitwe y’iterabwoba, igahanahana amakuru mu ibanga.

Leta y’iki gihugu yatangiye kwibasira uru rubuga cyane nyuma y’ibitero byagabwe mu mujyi wa St. Petersbourg bigahitana abantu 16 muri Mata uyu mwaka.

Ivuga ko bamwe mu byihebe bakoze icyo gitero bakoresheje Telegram mu gutanga ubutumwa, ariko kugeza ubu inzego z’umutekano zikaba zitarabasha kumenya ibyo bavugiye kuri uru rubuga.

Nubwo ubuyobozi bw’u Burusiya budateganya gufunga telegram, bukomeje kuyotsa igitutu binyuze mu nzego z’ubutabera.

Telegram yahawe iminsi icumi yo kujuririra umwanzuro w’urukiko ariko byitezwe ko ntacyo izakora kubera yaciwe amande adakanganye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza