Gakenke: Umunara mushya ugiye gutuma ingo zisaga ibihumbi 30 zibasha kumva radio

Yanditswe na Mukaneza M.Ange
Kuya 6 Mutarama 2018 saa 11:09
Yasuwe :
0 0

Ingo zisaga ibihumbi 30 zituye mu Karere ka Gakenke n’izindi nyinshi ziri mu turere twa Burera na Rulindo zigiye gutangira kumva radio, biturutse ku munara mushya wenda kuzura muri aka gace.

Uyu munara mushya uri kubakwa mu mpinga y’umusozi wa Kabuye mu Karere ka Gakenke, Intara y’Amajyaruguru.

Umuyobozi Mukuru w’Ikigo cy’Igihugu gishinzwe itangazamakuru, RBA, Arthur Asiimwe yatangaje ko uyu munara uzuzura mu minsi ya vuba uzakemura ikibazo cy’abaturage bo muri turiya duce ubusanzwe bumvaga radio bigoranye kuko bakoreshaga umunara uri i Kagogo n’uwa Karisimbi.

Ati” Twabashaga kugera mu bice bimwe na bimwe byo muri Gakenke na Burera, bitewe n’imiterere y’utu turere irangwa n’imisozi miremire n’ibibaya biri hasi cyane.”

Mu Kiganiro na New Times, Asiimwe yavuze ko uyu munara uzatwara miliyoni 180 z’amafaranga y’u Rwanda uzaba umaze kuzura ku buryo ukoreshwa mu gufasha abantu kumva radio, hazanongerwamo ibyuma bituma amashusho ya televiziyo agera ku bantu asa neza kurushaho.

Igikorwa cyo kubaka uyu munara wa Kabuye kandi cyakiriwe neza n’abatuye muri turiya turere, bavuga ko ubusanzwe bagorwa no kumva radio kandi ari bwo buryo buhendutse bwo kumenyamo amakuru.

Mutemberezi Anatole utuye mu Karere ka Rulindo yagize ati “ Radio ni wo murongo uhendutse, woroshye kandi w’ingenzi mu gufasha abatuye mu cyaro kubona amakuru, ariko ni ikibazo kuba tugifite abaturage batabasha kumva radio. Ndizera ko uyu munara mushya uzakemura iki kibazo burundu, ku buryo tuzabasha kumva radio zivugira ku mirongo itandukanye.”

Umuyobozi w’Akarere ka Gakenke, Deogratias Nzamwita, yagaragaje ko hari abaturage babarirwa mu bihumbi batabasha kumva radio kubera ko iminara bakoreshaga yari kure yabo.

Ati” Kumva radio ntibyashobokaga mu duce tumwe na tumwe tw’akarere kacu by’umwihariko mu duce tw’ibibaya cyangwa imisozi itari hafi y’iminara isanzwe ikoreshwa. Ubu turishimye ko abo bantu bashobora kuzajya bumva radio neza.”

Yakomeje avuga ko radio ari umuyoboro w’amakuru ndetse abaturage bari mu bucuruzi bazabona amahirwe yo kwigira kuri bagenzi babo bakorera mu bindi bice by’igihugu.
Radio iza ku mwanya wa mbere mu nzira zikoreshwa mu gutambutsa amakuru by’umwihariko Radio Rwanda ikaba iza ku isonga mu kugera ku baturage benshi kuko yumvikana mu gihugu hose ku kigero cya 98%.

Uyu munara mushya uri kubakwa mu mpinga y’umusozi wa Kabuye mu Karere ka Gakenke

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza