EAC igiye gushora asaga miliyari 18 Frw mu ikoranabuhanga rizahindura imibereho y’abaturage

Yanditswe na Ishimwe Israel
Kuya 12 Ukwakira 2017 saa 04:35
Yasuwe :
0 0

Umuryango wa Afurika y’Iburasirazuba (EAC) binyuze muri Komisiyo yawo ishinzwe Ubumenyi n’Ikoranabuhanga (EASTECO) uri mu mushinga w’imyaka itanu wo gushyira ingufu mu kwagura ikoranabuhanga mu nzego z’ubuzima bw’abawutuye, aho uzakoresha miliyari zisaga 18 z’amafaranga y’u Rwanda.

Umushinga w’ikoranabuhanga wa EASTECO watangiranye n’ingengo y’imari ya 2017/2018 uzarangira mu 2021/2022 uzibanda mu nzego zose zirimo imibereho myiza, ubukungu, ubuhinzi n’ubworozi, ubuzima n’ibindi.

Abanyamabanga bahoraho muri Minisiteri zishinzwe Ibikorwa by’Umuryango wa Afurika y’Iburasirazuba (MEACCA), abadipolomate bahuriye mu nama y’iminsi ibiri n’abakozi ba EASTECO, aho bamurikiwe igenamigambi ryayo mu myaka itanu iri imbere n’ishyirwa mu bikorwa ryayo birimo iby’ubumenyi n’ikoranabuhanga no guhanga udushya.

Banaganiriye ku miyoborere ya EASTECO, ibibazo by’ubushobozi mu by’ubukungu ndetse n’ingamba zizakoreshwa mu gukusanya inkunga yo gushyigikira ibi bikorwa.

Umunyamabanga Uhoraho muri Minisiteri ushinzwe ihuzabikorwa muri EAC, Edith Nsaija Mwanje yashimiye Leta y’u Rwanda yemereye EASTECO gukorera ku butaka bwayo.

Yagize ati “Twishimiye uko ikoranabuhanga ryateye imbere mu Rwanda ndetse twizeye ko ibihugu byose bizagira uruhare mu korohereza ibigo kugira imikoranire izafasha EAC gutera imbere mu ikoranabuhanga. Gukoresha ubumenyi n’ikoranabuhanga ni ishingiro ry’ubukungu ndetse n’iterambere ry’Umuryango wa Afurika y’Iburasirazuba.”

Kuri uyu wa Kane, tariki ya 12 Ukwakira 2017, nibwo basoje inama y’iminsi ibiri basura uruganda ruteranya mudasobwa rwa Positivo-BGH ruri i Masoro ndetse n’inyubako ikorerwamo ibijyanye n’ubuvumbuzi mu by’ikoranabuhanga izwi nka K Lab na Fab Lab.

Guverinoma y’u Rwanda by’umwihariko yashyize imbere gahunda yo guteza imbere ubumenyi n’ikoranabuhanga, nk’imwe mu nkingi izafasha Abanyarwanda gutera imbere bakagera ku bukungu buciriritse mu 2035.

Umuyobozi w’Ishami rishinzwe Ibikorwa bijyanye n’Imiyoborere n’Imibereho myiza y’abaturage muri Minisiteri y’Ububanyi n’Amahanga, Ubutwererane, n’Umuryango w’Ibihugu bya Afurika y‘Iburasirazuba, Nshunguyinka John, yavuze ko u Rwanda ruzungukira muri uku guhuza imbaraga.

Yagize ati “Ni amahirwe akomeye ku Rwanda kuko bizafasha kuzamura urwego rw’abahanga udushya mu by’ikoranabuhanga mu buryo bwambukiranya imipaka.”

Muri gahunda y’imyaka itanu, EASTECO iteganya gukoresha agera kuri miliyoni 22 z’amadorali ya Amerika, akabakaba miliyari 18 na miliyoni 598 mu mafaranga y’u Rwanda, azajya atangwa n’ibihugu by’ibinyamuryango ndetse n’azashakwa mu baterankunga.

Yagize ati “Ntabwo amafaranga yose azatangwa n’ibihugu byo muri EAC. Hari gahunda yo gushaka inkunga n’abafatanyabikorwa. Muri iyi myaka itanu ibihugu bizatangira bitanga umusanzu ugera kuri 70% ariko twizeye ko bizajya kurangira bigeze aho bishyura 50%. Aya mafaranga atangwa mu bunyamabanga bwa EAC akaba ari yo igabanya mu miryango yayo yose iyegamiyeho.”

Umunyamabanga uhoraho muri Minisiteri y'Ububanyi n'Amahanga ushinzwe ibikorwa bya Afurika y'Iburasirazuba, Claude Nikobisanzwe (ibumoso) wari uhagarariye u Rwanda na Nshunguyinka John uyobora Ishami rishinzwe Ibikorwa by’Imiyoborere n’Imibereho myiza y’abaturage muri MINAFFET, Nshunguyinka John

Muri uyu mushinga biteganyijwe ko buri mwaka hazajya hatangwa ibihembo kuri ba rwiyemezamirimo mu rubyiruko bahanze ibikorwa by’ikoranabuhanga mu kizwi nka ‘Youth Presidential Award”.

Umuyobozi w’Ishami rikora ibijyanye n’ikoranabuhanga ry’ibiguruka mu isanzure muri Fab Lab, Rulindana Lambert, yatangarije IGIHE ko hari intambwe iterwa umunsi ku wundi n’ubwo hakiri ibikeneye kunozwa.

Yagize ati “Ubu ndi gukora ku bushakashatsi mu bijyanye n’indege zitagira abapilote zizwi nka ‘drones’. Ni igitekerezo nagize cyo guhanga agashya mu gihugu ngikuye ku mikorere y’izikoreshwa mu gutwara amaraso zikorwa n’uruganda rwa Zipline.”

Yavuze ko mu mishinga yabo bahura n’imbogamizi, anasaba ababifite mu nshingano kurushaho kubashyigikira.

EASTECO yagaragaje ko hari imbogamizi bagihura na zo zirimo ibikorwaremezo bidahagije, imyumvire ikiri hasi mu gukoresha ikoranabuhanga ndetse n’amategeko agenga ihuza bikorwa. Iyi Komisiyo ifite icyicaro Kacyiru mu Mujyi wa Kigali yatangiye gukorera mu Rwanda muri Nyakanga 2015.

Basuye K Lab na Fab Lab basobanurirwa imikorere yaho
Umukozi muri EASTECO, Fortunate Muyambi, asobanura imikorere ya Komisiyo n'ibikorwa iteganya gukora mu myaka itanu
Umuyobozi w'Inama y'Ubutegetsi ya Komisiyo ya EASTECO, Badru Ntege
Inama yasojwe no gusinya kuri raporo y'ibyo yagezeho
Umuyobozi wa Komisiyo ya EASTECO, Gertrude Ngabirano (uhagaze), aha ikaze abanyamabanga aho iyi Komisiyo ikorera ku Kacyiru
Baganirijwe byinshi ku mikorere ya K Lab
Batambagijwe ibice bigize uruganda bagezwa n'aho Laptops za Positivo BGH zihurizwa
Aba banyamabanga basuye Uruganda rwa Positivo BGH ruteranyiriza laptops mu Rwanda
Abanyamabanga bahoraho muri za Minisiteri zishinzwe ibikorwa bya Afurika y'Iburasirazuba, Ambasaderi wa Tanzania mu Rwanda, Ali Idi Siwa n'ubuyobozi bwa EASTECO

Amafoto: Richard Irakoze


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza