Ibyo wamenya kuri Google Allo ishobora gukura WhatsApp ku isoko

Yanditswe na Uwishyaka Jean Louis
Kuya 6 Ukwakira 2016 saa 02:00
Yasuwe : XX
0 0

Mu 2010 nibwo urubuga nkoranyambaga rwa WhatsApp rwashyizwe hanze maze rutangira kwigarurira imitima y’abantu benshi hirya no hino ku isi barukoresha mu kuganira, koherezanya amafoto, amashusho ndetse n’amajwi.

Uko iminsi yagiye ishira, niko umubare w’abakoresha uru rubuga wagiye wiyongera, aho muri Gashyantare 2016 abarukoresha ku isi bari bageze kuri miliyari imwe.

N’ubwo ntawatekerezaga ko hari urundi rubuga rushobora kuyisimbura dore ko n’izindi zaje nyuma nka Viber zitigeze zitabirwa kuyirusha, Google nayo yashyize hanze urubuga rwitwa ’Google Allo’ rushobora kuzayihigika mu minsi mike.

Iyi porogaramu yashyizwe ku mugaragaro ku itariki 21 Nzeri 2016, ikora ibintu byose byari bisanzwe bikorwa na WhatsApp, ariko ikagira umwihariko wo kuba ishobora kugufasha gusubiza umuntu wakwandikiye bitabaye ngombwa ko wandika (smart reply).

Google Allo ikozwe ku buryo igenda yiga ibisubizo ukunze gutanga ku bibazo wabajijwe, ubundi ikabiguha bitabaye ngombwa ko wirirwa wandika.

Ikindi n’uko mu minsi iri mbere, izanategura amagambo wasubiza ku buryo nk’igihe umuntu akoherereje ifoto y’ahantu yatembereye, ubona igisubizo umuha nko kuvuga uti ” Aha hantu ni heza (nice place)” bitabaye ngombwa ko wowe ubyandika.

Uretse ibijyanye no gusubiza kandi, Google Allo inafite uburyo ishobora kukumara irungu no kugufasha kumenya amakuru, aho wasohokera, film zasohotse ikoresheje Google Assistant.

The Guardian yanditse ko uretse kuba wagirana ikiganiro n’umuntu ku giti cye, mushobora no kuyikoresha mu itsinda ry’abantu (groupe), mugakina imikino itandukanye no kubazanya ibibazo ku buryo mushobora gusubiza mukoresheje ibimenyetso (emojis).

Google Allo ikoreshwa muri telefoni za Android na iPhone gusa. Inafite utundi dushya dusanzwe tumenyerewe ku zindi mbuga nkoranyambaga nko gushushanya ku mafoto no kuba wagirana n’umuntu ikiganiro mu buryo bw’ibanga nyuma y’igihe runaka ubutumwa mwandikiranye bukisiba (incognito mode).

Uretse kuba wayiganiriraho n’umuntu, ushobora no kuba wabikaho amakuru yawe ushaka, kumenya iby’iteganyagihe, kubaza resitora ikwegereye ushobora gufatiramo ifunguro n’ibindi bitandukanye.

Google Allo ikorerwaho ibintu byinshi bitaba kuri WhatsApp bituma ishobora kuyirusha abakunzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE