00:00:00 IGIHE NETWORK KN KINYARWANDA EN ENGLISH FR FRANCAIS

Apple yareze Sosiyete yakoze Pegasus yashatse kuyinjirira mu ikoranabuhanga

Yanditswe na IGIHE
Kuya 24 Ugushyingo 2021 saa 09:23
Yasuwe :
0 0

Sosiyete y’Ikoranabuhanga y’Abanyamerika, Apple, igiye kurega NSO Group yo muri Israel nyuma yo kugerageza kwinjira mu ikoranabuhanga ryayo ku bakoresha iPhone.

Mu ntangiriro z’uku kwezi ni bwo NSO Group, Sosiyete y’Ikoranabuhanga yo muri Israel, yahagaritswe muri Amerika nyuma yo gushyirwa ku rutonde rw’izitemerewe gukorerayo ubucuruzi.

NSO Group ni yo yakoze Porogaramu ya Pegasus yifashishwa mu bikorwa by’ubutasi. U Rwanda ruri mu bihugu byashinjwe ko biyikoresha ariko inshuro zose rwabiteye utwatsi.

Ikoranabuhanga rya Pegasus rishobora gukoreshwa mu kwinjira muri iPhones na telefoni zikoresha Android, rigatuma uryifashisha akura ubutumwa, amafoto na emails, ibyo abantu baganiriye ndetse akanakoresha micro na camera zabyo mu kugenzura umuntu.

Iri koranabuhanga iyo rihujwe na nimero y’umuntu runaka, ryibasira telefoni ye binyuze kuri WhatsApp n’izindi mbuga nkoranyambaga cyangwa se mu gisa na “missed calls”. Rishobora guha urikoresha password za nyiri telefoni, rikamufasha gusoma ubutumwa bwe no kumva ibyo avugana n’abandi.

NSO Group yasobanuye ko ikoranabuhanga ryayo ryakozwe hagamijwe guhangana n’ibyihebe ndetse n’abanyabyaha.

BBC yanditse ko iri koranabuhanga ryashinjwe kwifashishwa mu kuneka impirimbanyi z’uburenganzira bwa muntu, abanyepolitiki n’abanyamakuru.

NSO Group ivuga ko ikoranabuhanga ryayo irigurisha ku gisirikare n’ibigo by’ubutasi mu bihugu byitwara neza mu kurengera uburenganzira bw’ikiremwamuntu.

Mu ntangiriro z’uku kwezi ariko Amerika yafashe icyemezo cyo gushyira iki kigo mu bitemerewe gukorerayo ubucuruzi ivuga ko ikoranabuhanga ryayo ryafashije guverinoma kwinjira mu mikorere y’igitugu yo ‘kuneka abatavuga rumwe nazo, abanyamakuru n’impirimbanyi.’’

Apple yafashe iki cyemezo nyuma y’uko ibigo by’ikoranabuhanga birimo Microsoft, Meta (yahoze yitwa Facebook), Alphabet ari nayo ifite Google na Cisco Systems byatunze agatoki imikoreshereze yaryo.

Mu butumwa bwa Apple yavuze ko igiye kurega NSO Group n’ikigo OSY Technologies ibarizwamo kubera "kugerageza kugenzura no kuneka abakoresha Apple.’’

Yakomeje ivuga ko ibi bizatuma habaho gukumira ibindi bibazo abakoresha Apple bashobora guhura nabyo.

Apple yavuze ko NSO Group yakoze konti zirenga 100 za baringa mu kuyifasha kugaba ibyo bitero by’ikoranabuhanga. Iyi sosiyete yatangaje ko iteganya gukumira NSO Group ku gukoresha porogaramu, serivisi n’ibikoresho byayo.

Apple yareze Sosiyete yakoze Pegasus yashatse kuyinjirira mu ikoranabuhanga. Iyi foto yerekana umugore anyura imbere ya NSO Group ari kuvugira kuri telefoni ya iPhone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .