Apple irahabwa amahirwe yo kuba ikigo cya mbere gifite agaciro ka miliyari 1000$

Yanditswe na Mukaneza M.Ange
Kuya 4 Mutarama 2018 saa 09:59
Yasuwe :
0 0

Abahanga mu bijyanye n’ubukungu n’abashoramari bagaragaje icyizere ko 2018 ishobora gusiga isi ifite ikigo gifite umutungo uhabwa agaciro ka miliyari 1000 z’amadolari kuzamura, uruganda rwa Apple rukora ibikoresho by’ikoranabuhanga akaba arirwo ruza ku mwanya wa mbere mu bigo bihabwa amahirwe.

Ibigo by’ikoranabuhanga birimo Apple, Amazon, Facebook na Alphabet ibarizwamo Google nibyo bihanzwe amaso mu kureba ko uyu mwaka byaca aka gahigo.

Kugeza kuwa kabiri Apple niyo yari iyoboye uru rutonde aho yahabwaga agaciro ka miliyari 869 z’amadolari, umubare wagezweho nyuma yo gufata imigabane yose y’uru ruganda bagakuba n’ikiguzi cy’umugabane umwe.

Apple yahinduye imibereho y’abatuye isi kubera telefoni za iPhone, iza imbere ya Alphabet ho miliyari 140 z’amadolari, kuko yo kuri ubu ihabwa agaciro ka miliyari 729 z’amadolari.

Mu nkuru yatambutse mu cyumweru gishize, Ikinyamakuru Barron cyandika ku ishoramari muri Amerika, cyagaragaje ko nta gushidikanya 2018 izasiga Apple iciye aka gahigo, ukurikije kuba mu mwaka ushize yarinjije miliyari 229 z’amadolari n’inyungu ya miliyari 49$.

David Rolfe, ukuriye ishoramari mu kigo Wedgewood Partners yabwiye Barron ko mu gihe ibindi bigo byishimira gusarura udufaranga duke mu gucuruza, Apple yo yikubira 80% by’amafaranga yinjizwa n’ibigo bikora telefoni.

Ati “Byagusaba gusubira mu bihe bya Rockefeller na Standard Oil kugira ngo ubone ikigo cyigaragaza kurusha ibindi ku isoko nk’iri ryagutse.”

Abandi bahanga mu bijyanye n’ubukungu n’ishoramari n’abo bakomeje kugenda bagaragaza ibyo bashingiraho bavuga ko Apple izaca agahigo, aho nka Ian Forrest, umushakashatsi ku ishoramari ukorera ikigo Share Centre we yemeza ko nubwo haba imbogamizi zatuma bitagerwaho muri uyu mwaka, nta myaka itanu izashira hatabonetse ikigo gifite agaciro ka miliyari 1000 z’amadorali.

Mu bindi bigo bihabwa amahirwe menshi harimo Microsoft ifite agaciro ka miliyari 664$, Amazon ibarirwa muri miliyari 566 mu gihe Facebook imaze imyaka itandatu gusa yinjiye ku isoko ry’imari n’imigabane ibarirwa muri miliyari 520 z’amadolari.

Apple imaze kwigarurira isoko ry'ibikoresho by'ikoranabuhanga kubera telefoni zayo za iPhone

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza