AC Group yazanye ikoranabuhanga rya Tap&Go ku bagenzi bajya mu ntara

Yanditswe na Akayezu Jean de Dieu
Kuya 11 Ugushyingo 2019 saa 04:37
Yasuwe :
0 0

Ikigo AC Group gifite ikoranabuhanga ryifashishwa mu kwishyura amafaranga y’urugendo hakoreshejwe ikarita izwi nka Tap&Go cyagejeje iri ikoranabuhanga mu bice byo mu ntara mu buryo bugezweho budasaba gukoresha ikarita.

Iri koranabuhanga ryari rimaze kumenyererwa mu Mujyi wa Kigali rigiye kugezwa mu ntara ariko mu buryo bugezweho kuko umuntu atazajya agura ikarita kandi bizajya bikorerwa kuri telefone by’umwihariko abafite smartphones.

Ubuyobozi bwa AC Group bwasobanuye ko niba umuntu ashaka kujya nk’i Rubavu azajya afata telefone ye agashaka Porogaramu ya Tap&Go ukinjiramo hanyuma ugafungura konti yawe ukoresheje amazina na nimero za telefone hanyuma ukabona aho kugurira itike bitewe n’aho ugiye.

Ni ukuvuga ngo ubutaha niba ugiye kugura itike ntabwo uzongera gufungura konti ahubwo winjiramo ukagaragaza aho ugiye n’isaha ushaka kugendera hanyuma niba wenda uri muri Kigali bakakwereka imodoka ziri muri gare ziri ku murongo iyo saha ugendera hanyuma ugahitamo iyo mujyana ukishyura amafaranga ukoresheje Mobile Money.

Umaze kwishyura bahita baguha kode izwi nka QR ari nayo ujyana ugakoza ku cyuma mu modoka zijya mu ntara kizwi nka BV.

Ku badafite telefone zigezweho nabo bazajya bafashwa na bakozi b’iki kigo batanga amatike y’urugendo.

Umuyobozi ushinzwe imibanire n’itumanaho muri AC Group, Allen Kendunga yabwiye IGIHE, ko ubu buryo buzafasha cyane abagenzi bajya mu ntara kubungabunga amafaranga yabo ndetse bukanaborohereza kugura itike aho baba bari hose.

Yakomeje agira ati “Ubu buryo bushya buzafasha abantu benshi mu buryo bwo kubungabunga amafaranga yabo kuko batazayagendana mu ntoki ariko kandi bizafasha kudahererekanya amafaranga ndetse ni uburyo bwiza bwo kurengera ibidukikije twirinda gukoresha no guta impapuro hirya no hino.”

Yakomeje agira ati “Abatarabona telefone zigezweho bazajya babona itike kuko tuzashyiraho abaduhagarariye ahantu hose abantu bari basanzwe bakatishiriza tike.”

Ubuyobozi bwa AC Group butangaza ko ubu buryo buzatangizwa ku mugaragaro kuri uyu wa Gatatu tariki 13 Ugushyingo 2019.

Ubuyobozi bwa AC Group butangaza ko ubu buryo buzatangizwa ku mugaragaro kuri uyu wa 13 Ugushyingo 2019
AC Group yazanye ikoranabuhanga rya Tap&Go ku bagenzi bajya mu ntara
Ikigo AC Group gifite ikoranabuhanga ryifashishwa mu kwishyura amafaranga y’urugendo hakoreshejwe ikarita izwi nka Tap&Go cyagejeje iri ikoranabuhanga mu bice byo mu ntara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza