Kuri Twitter, Perezida Kagame yavuze uko ingagi z’impanga yise amazina zimerewe

Yanditswe na M. M.
Kuya 8 Kamena 2012 saa 05:56
Yasuwe :
0 0

Mu gihe umuhango wo Kwita Izina wegereje, ndetse kuri ubu hano ku IGIHE.com hakaba hari kubera amatora, aho buri wese ari kwihitiramo ingagi nziza gusumba izindi muri 19 ziri guhatana (kanda hano), hari uwandikiye Perezida Paul Kagame kuri Twitter amubaza niba yari yabasha kwihitiramo ingagi nziza, undi amusubiza anamubwira uko ingagi z’impanga yise amazina tariki 27 Kamena mu mwaka wa 2005 zimerewe.
Perezida Kagame ukunze kuganira na buri wese ubyifuza ku rubuga nkoranyambaga Twitter, (...)

Mu gihe umuhango wo Kwita Izina wegereje, ndetse kuri ubu hano ku IGIHE.com hakaba hari kubera amatora, aho buri wese ari kwihitiramo ingagi nziza gusumba izindi muri 19 ziri guhatana (kanda hano), hari uwandikiye Perezida Paul Kagame kuri Twitter amubaza niba yari yabasha kwihitiramo ingagi nziza, undi amusubiza anamubwira uko ingagi z’impanga yise amazina tariki 27 Kamena mu mwaka wa 2005 zimerewe.

Perezida Kagame ukunze kuganira na buri wese ubyifuza ku rubuga nkoranyambaga Twitter, uwitwa Rwabigwi yamubajije niba yari yatora ingagi yishimiye kurusha izindi kuri paje y’amatora iri ku IGIHE.com, mu kumusubiza, amubwira ko ataratora, ariko ko ingagi yise mu myaka irindwi ishize kuri ubu zakuze kandi zimerewe neza.

Rwabigwi yagize ati: “Weekend Nziza Perezida! Waba wabashije gutora ingagi wishimiye (ku IGIHE.com)?”, undi amusubiza agira ati: “Hoya ntabwo ndabikora ku ngagi! Gusa nishimiye ko ingagi zacu z’impanga zakuze neza.”

Aha Umukuru w’Igihugu yakomeje abwira Rwabigwi ko ubundi bidasanzwe ko impanga z’ingagi zimara igihe kingana nk’icyo izo yise Izina zimaze.

Mu mwaka wa 2005 mu kwezi kwa Kamena, Perezida Paul Kagame n’Umufasha we Jeannette Kagame bitabiriye umuhango wo Kwita Izina wabereye mu Kinigi mu Ntara y’Amajyaruguru, ubwo ingagi 30 ziswe amazina, ebyiri muri zo zari impaga bazise “Byishimo” na “Impano”.

Kuri ubu ku isi hasigaye ingagi zibarirwa muri 800, zose zikaba ziherereye mu gace karimo ibirunga bihuriweho na Uganda, Congo Kinshasa n’u Rwanda rwihariye 480 mu ngagi zisigaye ku isi.

Ubu bwoko bw’inyamaswa buri mu bukomeje gukendera ku isi, gusa kubera kububungabunga, kuva mu myaka micye ishize umubare w’ingagi wakomeje kujya wiyongera ku buryo bugaragara.

Mu rwego rwo kurushaho kubugabunga ingagi, cyane ko zininjiriza akayabo k’amadovize igihugu, Ikigo Gishinzwe Iterambere mu Rwanda, RDB, mu myaka umunani ishize cyatangije umuhango udasanzwe wiswe Kwita Izina, uyu ukaba ari umuhango ngarukamwaka aho ingagi zihabwa amazina, kuri ubu ugeze ku nshuro yawo ya munani.

Niba ushaka gutora ingagi wishimiye kurusha izindi muri 19 zihatana ndetse no kuzabasha gukurikirana mu buryo bwa Video Live Streaming uyu muhango kanda hano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza