U Rwanda, Uganda na RDC mu gukaza ubufatanye bwita ku binyabuzima byo mu Birunga

Yanditswe na Ferdinand Maniraguha
Kuya 5 Mata 2018 saa 06:11
Yasuwe :
0 0

Ibihugu birimo u Rwanda, Uganda na Repubulika Iharanira Demokarasi ya Congo bihurira ku birunga byiyemeje guteza imbere ubufatanaye mu kubungabunga urusobe rw’ibinyabuzima bibamo.

Igice cy’iburunga kigizwe n’urusobe rw’ibinyabuzima biboneka muri Pariki y’Iburunga ku ruhande rw’u Rwanda; Pariki Nkuru ya Virunga ku ruhande rwa Congo na pariki ya Mgahinga Gorilla National Park ku rwa Uganda.

Izi pariki zirimo inyamaswa zitandukanye zirimo ingagi zo mu misozi ndetse n’ibimera bitandukanye.

Kuri uyu wa Kane i Kigali hateraniye inama y’abaminisitiri bo muri ibyo bihugu bafite aho bahuriye no kubungabunga ibinyabuzima mu nshingano , higwa uburyo ibihugu byafatanya mu guteza imbere Umuryango ugamije guteza imbere ibyo kurengera urusobe rw’ibinyabuzima mu gace k’ibirunga (Greater Virunga Transboundary Collaboration, GVTC).

Bimwe mu byagezweho muri iyo nama, hemejwe ubufatanye bw’ibihugu mu gukusanya ingengo y’imari uwo muryango uzakoresha, gushyiraho ubuyobozi bwawo, abakozi n’ibindi.

Hemejwe kandi gushyira ingufu muri buri gihugu kikemeza burundu amasezerano ashyiraho uwo muryango.

Umuyobozi Mukuru wa RDB, Clare Akamanzi, yavuze ko nubwo bari gushaka ubufatanye hagati y’ibihugu, ntibizakuraho inshingano za buri gihugu zo kwita ku rusobe rw’ibinyabuzima.

Yavuze ko nubwo ibihugu bisanzwe bifatanya binyuze muri GVTC ariko ko hakwiye ubufatanye buruseho.

Yagize ati “Ingagi ntabwo zizi imipaka, iyo ziri gutembera ntizimenya niba ziri muri Uganda cyangwa mu Rwanda, zigenda ntacyo zikanga bitewe n’icyo zishaka. Kimwe mu byo dufatanya, nk’iyo itsinda rimwe ry’ingagi rivuye mu gihugu rijya mu kindi, hari uburyo dusangira inyungu zarivuyemo.”

Yakomeje agira ati “Urugero nk’itsinda ryitwa Kwitonda ryavuye muri Congo none rimaze imyaka myinshi ryibera mu Rwanda. Hagati ya 2012 na 2017, u Rwanda rwasubije Congo miliyoni 1.2 z’amadolari kuko dusangiye inyungu y’iryo tsinda ryaturutseyo.”

Minisitiri w’Ubukerarugendo, urusobe rw’ibinyabuzima n’amateka wa Uganda, Kamuntu Ephraim, yavuze ko kimwe mu byo bakwiye gushyiramo ingufu ni ugukangurira abaturage kugira uruhare mu kubungabunga urusobe rw’ibinyabuzima, babafasha no kwiteza imbere.

Yagize ati “Ntabwo imiryango ishonje ishobora kurinda ibidukikije ahubwo bazarya izi nyamaswa ariko nubaha ikindi kibabyarira amafaranga bazayakoresha bagura ibyo kurya aho kwica inyamaswa. Tugomba guhindura imyumvire y’abaturage bacu. Ntabwo bikwiye ko polisi ariyo ikubuza gushimuta inyamaswa, ukwiye kwibwiriza ukabihagarika.”

Uganda iha abaturage baturiye pariki 20 % by’ibyavuye mu bukerarugendo bw’izo pariki mu gihe u Rwanda rubaha 10%.

Ibihugu byose nibimara kwemeza burundu amasezerano ashyiraho GVTC, bizashyiraho uburyo buhamye bwo kurwanya ishimutwa ry’inyamaswa, kubungabunga ibindi binyabuzima ndetse no guteza imbere imibereho y’abaturiye za pariki.

Minisitiri w'Ubucuruzi n'Inganda, Munyeshyaka Vincent (Hagati) n'Umuyobozi wa RDB, Clare Akamanzi mu gutanmgiza inama yahuje u Rwanda, Uganda na RDC ku kubungabunga urusobe rw'ibinyabuzima mu birunga
Umuyobozi Mukuru Ushinzwe amashyamba muri RDC, Jose Ilonga Lofonga, (hagati) n'abandi bari baje bamuherekeje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza