Kwamamaza

U Rwanda ruzasaba ivugururwa ry’amasezerano ya Montreal ku byangiza akayunguruzo k’izuba

Yanditswe kuya 15-09-2016 saa 20:43' na Ntakirutimana Deus


Leta y’u Rwanda ishyize imbere igitekerezo cyo gusaba ibihugu kuyishyigikira mu rugamba rwo kwemeza ivugururwa ry’amasezerano yasinyiwe Montreal muri Canada ku bintu byangiza akayunguruzo k’imirasire y’izuba.

Impamvu leta y’u Rwanda ibishyize imbere ni uko isinywa ryayo rizaba intambwe ifatika izagira uruhare mu kugabanya imihindagurikire y’ibihe kuva aho Amasezerano y’i Paris yemerejwe.

Ibi u Rwanda rubitangaje mu gihe rwifatanya n’amahanga kwizihiza Umunsi Mpuzamahanga wo Kurengera akayunguruzo k’imirasire y’izuba uba buri mwaka ku wa 16 Nzeri.

U Rwanda kandi ruzongera gusaba ivugururwa ry’aya masezerano imbere y’abantu barenga 1000 barimo abayobozi ku rwego mpuzamahanga n’impuguke mu bijyanye no kubungabunga akayunguruzo k’imirasire y’iziba n’iterambere ridahumanya ikirere bategerejwe mu Rwanda mu nama ya 28 ihuza ibihugu byashyize umukono ku masezerano ya Montreal izwi ku izina rya MOP28. Iyo nama izabera i Kigali kuva tariki ya 6 kugeza ku ya 14 Ukwakira 2016.

Abazayitabira baturutse mu bihugu bitandukanye ku Isi bazaganira ku ivugururwa ry’Amasezerano ya Montreal, yazemezwa akazatuma hihutishwa guhagarika ikoreshwa ry’imyuka yangiza ikirere izwi nka "hydrofluorocarbons" (HFCs) ikoreshwa mu byuma bikonjesha.

Kwemeza iri vugururwa ry’Amasezerano ya Montreal bishobora kuzagabanya dogere 0.5 kw’izamuka ry’ubushyuhe bw’isi kugeza mu mpera z’iki kinyejana, dore ko bimwe mu bituma buzamuka birimo n’iyo myuka (hydrofluorocarbons- HFCs).

Leta y’u Rwanda ikaba isanga iri vugurura ry’amasezerano rigenze neza ryaba ari ikimenyetso cy’uko umuryango mpuzamahanga wiyemeje ku buryo bugaragara kuzagera ku ntego z’Amasezerano y’i Paris ; ajyanye no gukora ku buryo igipimo mpuzandengo cy’ubushyuhe bw’isi kitarenga dogere ebyiri kandi umuhigo ukaba ko icyo gipimo cyagera kuri dogere 1.5.

Minisitiri w’Umutungo Kamere Dr Vincent Biruta yavuze ko ku bijyanye n’u Rwanda ubwo bushyuhe bwiyongereyeho dogere Celsius 1.4 kuva mu 1970 kugeza uyu munsi.

Ubushyuhe avuga ko bwiyongereye cyane , u Rwanda ruzakomeza gufatanya n’ibindi bihugu kurwanya icyatuma icyo kibazo kirushaho gukomera.

Ku bijyanye no gusaba ivugururwa ry’ayo masezerano , Minisitiri Biruta yavuze ko yiteze kuzabona ibihugu byinshi bishyigikira u Rwanda.

Yagize ati"Dutegereje kandi twishimiye kwakira mu Rwanda abahagarariye ibihugu byashyize umukono ku Masezerano ya Montreal bose, mu rwego rw’ubufatanye mpuzamahanga. Twishimiye kuzabona ibihugu byinshi bishyigikira ivugururwa ry’aya masezerano kandi twizeye ko rizemezwa niduhurira i Kigali mu Kwakira. U Rwanda rwiteguye guhuriza hamwe ibihugu byose byashyize umukono ku Masezerano ya Montreal gushakira hamwe uko irivugurura ryaba impamo."

U Rwanda ruzwiho kwesa imihigo myinshi itandukanye ku Isi, ndetse rwanabaye urwa mbere mu gushyira mu bikorwa Amasezerano ya Montreal, rukarenza intego kandi rukubahiriza igihe ntarengwa giteganywa n’aya masezerano.

Mu byo rwakoze harimo kuba rwarahagaritse ikoreshwa ry’imyuka ya "chlorofluorocarbon" (CFCs) yangiza akayunguruzo k’imirasire y’izuba mu mwaka wa 2010, umwaka umwe mbere y’igihe ntarengwa cyari cyagenwe n’aya masezerano.

Ibikorwa by’indashyikirwa u Rwanda rwagezeho mu kubungabunga akayunguruzo k’imirasire y’izuba byaruhesheje igihembo mu mwaka wa 2012.

Iki gihembo u Rwanda rukaba rwaragihawe n’Ubunyamabanga Bukuru bw’Amasezerano ya Montreal, buherereye mu Kigo cy’Umuryango w’Abibumbye gishinzwe Guteza imbere Ibungabungwa ry’Ibidukikije (UNEP).

Umuyobozi Mukuru w’Ikigo cy’Igihugu gishinzwe kubungabunga ibidukikije(REMA) Colette Ruhamya,yavuze ko u Rwanda rukomeje kugabanya imyuka ikoreshwa mu byuma bikonjesha, itumizwa mu mahanga, yavuye kuri toni 68, umwaka ushize zabaye toni 47.

Amasezerano ya Montreal yashizweho umukono mu 1987, u Rwanda ruyashyiraho umukono mu 2003. Aya masezerano yashyizweho umukono n’ibihugu byose bigize Isi uko ari 197.

Minisitiri w’Umutungo Kamere Dr Vincent Biruta

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved