Kwamamaza

U Rwanda rurera ku byaha by’ubucuruzi butemewe bw’ibikomoka ku binyabuzima

Yanditswe kuya 31-08-2016 saa 08:57' na Philbert Hagengimana


Ubucuruzi bw’ibikomoka ku binyabuzima buza ku mwanya wa kane mu butemewe bukomeye ku Isi, nyuma y’ubwo gucuruza intwaro, ibiyobyabwenge ndetse n’icuruzwa ry’abantu.

N’ubwo bumwe muri ubwo bucuruzi bukomeye bujya bukorwa, u Rwanda rurera ku byaha by’ubucuruzi butemewe bw’ibikomoka ku binyabuzima (Illegal Wildlife Trafficking), ariko na none hari abajya bagerageza kurwifashisha nk’inzira yo kubageza aho babukorera.

Mu kiganiro yagejeje ku bitabiriye inama ya kabiri y’ibiganiro mpaka ku kubungabunga ibidukikije (2nd Conversation on Conservation), Umuyobozi Mukuru wa Polisi y’u Rwanda, IGP Emmanuel K.Gasana, yagaragarije abanyarwanda n’abanyamahanga bayitabiriye, ko icyo ari ikibazo kitabangamiye Afurika gusa, ko ahubwo kizonga Isi yose.

Ati “Nk’uko insanganyamatsiko ivuga ‘ubucuruzi butemewe bw’ibikomoka ku binyabuzima muri Afurika’, navuga ko ari imbogamizi ku Isi yose.”

Yakomeje agaragaza ko ubwo bucuruzi bwibanda cyane ku mahembe y’inzovu, impu z’inyamaswa nk’ingona, ingwe n’intare, inkura, inyoni n’izindi.

Ubucuruzi bw’ibikomoka ku binyabuzima, ni icyaha gitegurwa mu buryo mpuzamahanga nk’uko IGP Gasana akomeza abihamya, akagaragaza uburemere bwacyo atanga urugero rw’inkura zigera ku 1000 zashimuswe muri Afurika y’Epfo mu mwaka wa 2013 gusa.

U Rwanda rurera kuri icyo cyaha

IGP Gasana akomeza agaragaza ko nta bucuruzu butemewe bw’ibikomoka ku nyamaswa bukorerwa mu Rwanda, gusa ngo hari abagiye bagerageza kurwifashisha nk’inzira ibajyana aho bagomba ku bukorera, aho bakoresha ibibuga by’indege ndetse n’ibyambu byarwo.

IGP Gasana yagize ati “U Rwanda ntiruragerwaho n’ibyo byaha, nibuka ko raporo ya Polisi igaragaza ko habayeho kugerageza gukoresha u Rwanda nk’inzira muri ubwo bucuruzi, ndetse hambere twafashe ibiro 168 by’amahembe y’inzovu, bifatanwa abanyamahanga barindwi bakoranaga n’abanyarwanda barindwi.”

Ibyigeze kubaho mu Rwanda bijya gusa n’ubwo bucuruzi butemewe, ni ukwibwa kw’Ingagi muri Pariki y’Ibirunga nk’uko byagiye bigaragazwa na raporo zagiye ziherekanywa hagati ya Polisi na RDB.

N’ubwo ariko ubu bucuruzi butahakorerwa, ngo ntabwo u Rwanda rwakwirara kuko rwanashyize umukono ku masezerano mpuzamahanga atandukanye ajyanye no kurengera ibidukikije, rukaba runafite amategeko n’amabwiriza bitandukanye bibirengera, ku buryo unyuranyije na yo abihanirwa.

Kuba u Rwanda rwera ku byaha by’ubucuruzi butemewe bw’ibikomoka ku nyamaswa, binemezwa na Belise Kaliza, Umuyobozi ushinzwe Ubukerarugendo muri RDB, wavuze ko kimwe n’ibindi bihugu byitabiriye iyo nama, u Rwanda rushishikajwe no guhashya ibyo byaha.

Kaliza yagize ati “Akenshi ibyo tubona muri ubwo bucuruzi butemewe bw’ibikomoka ku binyabuzima, biba biturutse mu mahanga, bakifashisha u Rwanda nk’inzira…Iyo tubifashe turabisenya, kuko icyo tuzi ni uko bigira agaciro iyo biri ku nyamaswa biba byavanyweho.”

Abanyaziya bazubikirwa imbehe nk’imwe mu ngamba zo guca ubwo bucuruzi

Ibihugu bya Aziya ni byo baguzi bakomeye b’ibyo bicuruzwa bikomoka ku binyabuzima nk’amahembe y’inzovu, impu z’inyamaswa ndetse n’amenyo yazo, ibiti bya Kabaruka n’ibindi.

Mu buryo bwo kurushaho kurwanya ubwo bucuruzi butuma ibidukikije bihazaharira, abitabiriye “2nd Conversation on Conservation” biyemeje gucyaha ndetse no guca intege abaguzi (Demand), ibyo bikazatuma izo nyamaswa n’ibimera birushaho kubungabungwa.

Kaliza yagize ati “Icyo twakiganiriyeho muri iyi minsi ibiri, aho twarebaga uburyo twaca intege abaguzi, kuko nk’ayo mahembe y’Inzovu atabonye abaguzi nta n’uwayacuruza. Uwo ni n’umwe mu myanzuro, ariko hazanakorwa ubukangurambaga mu bihugu bitandukanye bigafasha gucyaha abo baguzi.”

Amahembe y’Inkura, ay’Inzovu, amenyo n’amagufwa by’urusamagwe, ni byo bihenze cyane kuri iryo soko ritemewe ry’ibikomoka ku binyabuzima, gusa ngo biragoye kumenya imibare nyakuri y’ibicuruzwa ku mwaka ndetse n’amadolari abivamo, kuko bicuruzwa mu bwiru nk’uko byemezwa n’impuguke mu kigo TRAFFIC ,the wildlife trade monitoring network.

Igitabo cyiswe “Global Impacts of the Illegal Wildlife Trade”; “The Costs of Crime, Insecurity and Institutional Erosion” cyanditswe na Katherine Lawson and Alex Vines muri Gashyantare 2014, kivuga ko ubucuruzi bw’amenyo y’Inzovu bwiganje cyane muri Pariki ya Garamba ho muri Repubulika Iharanira Demokarasi ya Congo (DRC), aho avanwa ajyanwa muri Asia acishijwe muri Uganda cyangwa Kenya.

Mu rwego rwo guca intege ababa bafite n’igitekerezo cyo gukora ubucuruzi bw’inzovu, muri uku kwezi U Rwanda rwatwitse ibiro 150 by’amahembe y’inzovu ndetse n’ibikoresho ba rushimusi bakoreshaga batega inyamaswa muri Pariki ya Nyungwe, ibi byose bikaba byaragiye bifatirwa mu ngo za bamwe muri abo ba rushimusi.

Icyakora, ubwo bucuruzi bunavugwa mu bihugu bya Tanzania, ndetse n’ibindi byo muri Afurika y’Amajyepfo.

IGP Emmanuel Gasana yavuze ko ubucuruzi bw'ibikomoka ku binyabuzima butaragera mu Rwanda
Belise Kaliza ukuriye ubukerarugendo muri RDB, yemeje ko u Rwanda rwahagurukiye kurwanya ibyaha byo gucuruza ibikomoka ku binyabuzima

Amafoto: Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved