U Rwanda ntirwaciye amacupa ya pulastiki- Minisitiri Biruta

Yanditswe na Iradukunda Desire
Kuya 6 Kamena 2018 saa 06:12
Yasuwe :
0 0

Minisitiri w’Ibidukikije, Dr Biruta Vincent, yasobanuye ko u Rwanda rutaciye amacupa ya pulasitiki ahubwo ko icyo rushyize imbere ni ukuyagabanya.

Hashize iminsi mike Minisiteri y’ibidukikije n’ibigo biyishamikiyiho ndetse na Minisiteri y’ubutabera zitangaje ko nta cupa rya pulasitiki rizongera kugera mu biro cyangwa mu nama zayo.

Ibi byanakurikiwe n’ubukangurambaga bwo guca ikoreshwa ry’ibikoresho bya pulasitiki mu bikorwa bya buri munsi, mu rwego rwo kubungabuga ibidukikije.

Ubwo hizihizwaga umunsi mpuzamahanga w’ibidukikije, ku wa 5 Kamena 2018, wari ufite insanganyamatsiko igira iti ”Turwanye ihumana ry’ibidukikije riterwa na pulasitiki”, Minisitiri Biruta yamaze impungenge ko ayo macupa atagiye guhabwa akato burundu.

Yagize ati ”U Rwanda ntabwo rwaciye amacupa ya pulasitiki ahubwo icyo twakoze ni ukuyagabanya … Ayo macupa arakenewe ku isoko.”

Yasobanuye ko ayo macupa acyifashishwa mu gupfunyika ibicuruzwa ariko asaba ko azajya akoreshwa yajya ashyirwa hamwe ntavangwe n’indi myanda, ababishinzwe bakayatunganyamo ibindi bikoresho.

Yakomeje avuga ko gukoresha ibikoresho bya pulasitiki bigomba kugabanywa kuko bidakozwe mu 2050 inyanja zose zo ku isi hazaba harimo pulasitiki ziruta amafi.

Umuyobozi mukuru w’Ikigo cy’igihugu gishinzwe kubungabuga ibidukikije (REMA), Eng Collette Ruhamya, yavuze ko kugira ngo bagabanye iyangirika ry’ibidukikije bisaba umusanzu wa buri wese.

Yagize ati ”Umuririmbyi aririmbe kubungabunga ibidukikije, abahanzi batandukanye abakina amakinamico umuturage nawe agiremo uruhare, ibyo yakoresheje abifate abishyire ahabugenewe n’abandi bose.”

Mu kubungabunga ibidukikije herekanywe uko ibikoresho bya pulasitiki byakusanywa bikongera kubyazwamo ibindi bikoresho , birimo amashashi yifashishwa mu guhumbika ibiti; ibyapa bimanikwa (banderole) cyangwa bakabisya bikoherezwa mu nganda gutunganywamo ibindi bikoresho nk’amajerikani, amabasi n’ibindi.

Minisitiri w’Ibidukikije, Dr Biruta Vincent
Abanyamabanga nshingwabikorwa b'imirenge y'Akarere ka Kicukiro
Abanyeshuri bo muri IPRC Kigali bitabiriye ibirori by'umunsi mpuzamahanga wo kubungabunga ibidukikije
Aha herekanwaga uko amacupa ya pulasitiki abyazwamo ibindi bikoresho by'ibanze
Abantu batandukanye bitabiriye kwizihiza umunsi mpuzamahanga wahariwe kubungabunga ibidukikije
Umuyobozi mukuru wa REMA, Eng. Collette Ruhamya na Minisitiri w’Ibidukikije, Dr Biruta Vincent, bashyikirije ibihembo abagize uruhare mu bikorwa byo kurengera ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza