REMA yatangiye gutanga imbabura zirondereza ibicanwa zikanagabanya imyuka ihumanya ikirere

Yanditswe na Prudence Kwizera
Kuya 28 Gashyantare 2021 saa 02:44
Yasuwe :
0 0

Ikigo cy’Igihugu cyo kubungabunga ibidukikije (REMA) kibinyujije mu mushinga wacyo wo gusubiranya igice cy’Amayaga “Forest Landscape Restoration in the Amayaga Region (Green Amayaga) Project, kiri gutanga imbabura ku bagenerwabikorwa b’uwo mushinga mu turere ukoreramo.

Izo mbabura zirondereza ibicanwa zikanagabanya imyuka ihumanye yoherezwa mu kirere ziri gutangwa mu rwego rwo gushyira mu bikorwa intego z’umushinga Green Amayaga wo gusubiranya igice cy’Amayaga kikongera gutoha.

Kugeza ubu imbabura 4,000 zahawe abagenerwabikorwa b’umushinga mu Murenge wa Mugina mu Karere ka Kamonyi, mu rwego rwo kubafasha kurengera ubuzima bwabo, kugabanya itemwa ry’amashyamba no kurengera ikirere hagabanywa ingano y’imyuka ihumanye icyoherezwamo.

Mu karere ka Kamonyi hazatangwa imbabura ibihumbi 11 harimo 4,000 zatanzwe mu Murenge wa Mugina, izindi 4,000 zizatangwa mu Murenge wa Nyamiyaga, 1,500 zizatangwa mu Murenge wa Nyarubaka ndetse na 1,500 zizatangwa mu Murenge wa Rugarika.

Mu tundi turere nka Gisagara, Nyanza na Ruhango gutanga izo mbabura bizatangira mu mwaka utaha w’ingengo y’imari wa 2021/2022.

Mu turere twose uko ari tune umushinga ukoreramo hazatangwa Imbabura 60,000 mu gihe cy’imyaka itandatu umushinga uzamara.

Biteganyijwe ko izo mbabura mu gihe cy’imyaka itandatu zizagira uruhare mu kugabanya toni hafi miliyoni eshanu z’imyuka ihumanye yoherezwa mu kirere, ikigo REMA kikagaragaza ko mu myaka 20, izo mbabura zizaba zigabanyije toni zisaga miliyoni 15 z’imyuka ihumanye yoherezwa mu kirere.

Imbabura zihabwa abagenerwabikorwa b’umushinga Green Amayaga zikora neza kuko igipimo cyazo (thermal efficiency) kiri hejuru ya 30, ibi bigatuma zirondereza ibicanwa ku gipimo kiri hejuru ya 50% ugereranyije n’ibicanwa bikoreshwa mu mashyiga gakondo.

Umuhuzabikorwa w’uwo mushinga, Nkurunziza Philbert, avuga ko ibyo bizafasha kugera ku ntego z’umushinga zo gusubiranya igice cy’amayaga kikongera kugira amashyamba menshi, kuko izo mbabura zizatuma ibiti bidatemwa ku bwinshi hagamijwe gushaka ibicanwa nk’uko byari bisanzwe.

Ati “Izi mbabura kandi zizafasha mu guteza imbere ubukungu n’imibereho myiza y’abaturage, kuko bitewe n’uburyo irondereza ibicanwa, abazihawe bazabyaza umusaruro igihe kinini bamaraga bashaka ibicanwa, gikoreshwe mu yindi mirimo ibabyarira inyungu.”

Umushinga Green Amayaga wo gusubiranya igice cy’Amayaga ni uzakora ibikorwa bitandukanye birimo kurwanya isuri hacukurwa imiringoti, gutera no kuvugurura amashyamba, gutera ibiti bivangwa n’imyaka no gutera ibiti by’imbuto hagamijwe kugabanya indwara ziterwa n’imirire mibi.

Abagenerwabikorwa b’uwo mushinga bashima ibikorwa watangiye gukorera mu gice cy’Amayaga, bakavuga ko bizabateza imbere abatuye muri icyo gice muri rusange n’abagore by’umwihariko.

Nyiramana Jeannette utuye mu murenge wa Mugina agira ati “Abagore dukunze kubazwa ibyerekeranye n’imirimo myinshi yo mu rugo harimo n’ibyo guteka. Izi mbabura zizatuma tubona umwanya wo gukora ibiduteza imbere kuko batubwiye ko zikoresha udukwi duke cyane, ndetse ukaba wayicanisha n’ibindi bintu byoroheje birimo n’ibitiritiri by’ibigori”.

Umushinga Green Amayaga ushyirwa mu bikorwa n’ikigo cy’Igihugu cyo kubungabunga ibidukikije (REMA) ku bufatanye n’uturere twa Kamonyi, Nyanza, Ruhango na Gisagara, ugaterwa inkunga n’ikigega mpuzamahanga gitera inkunga imishinga yo kubungabunga ibidukikije (GEF) binyuze mu ishami ry’umuryango w’abibumbye rishinzwe iterambere (UNDP).

Abahawe imbabura bavuga ko bazitezeho kutongera kubura ibicanwa kuko zibirondereza
Abahawe imbabura biyemeje kuzabyaza umusaruro igihe kinini bamaraga bashaka ibicanwa
Biteganyijwe ko mu karere ka Kamonyi hanyine hazatangwa imbabura ibihumbi 11
Imbabura 4,000 zahawe abagenerwabikorwa b’umushinga mu Murenge wa Mugina mu Karere ka Kamonyi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .