00:00:00 IGIHE NETWORK KN KINYARWANDA EN ENGLISH FR FRANCAIS

REMA yaburiye abinjiza imyanda mu gihugu binyuranyije n’amategeko

Yanditswe na Akayezu Jean de Dieu
Kuya 11 Kanama 2021 saa 12:38
Yasuwe :
0 0

Ikigo cy’Igihugu gishinzwe kurengera Ibidukikije, REMA, cyatangaje ko abinjiza imyanda itandukanye [inyuma], mu gihugu mu buryo bunyuranyije n’amategeko bafatiwe ingamba zikakaye zirimo no kuba bazajya bategekwa ku bisubiza mu gihugu babivanyemo.

Ubusanzwe u Rwanda kimwe n’ibindi bihugu byashyize umukono ku masezerano agenga iyambukiranya mipaka ry’imyanda ihumanye ndetse n’indi myanda ivanwa mu bindi bihugu ikazanwa mu gihugu ikaba yabyazwa umusaruro binyuze mu kuyinagura.

Kuri ubu hari inganda zigera kuri eshanu zinagura imyanda ndetse n’iziyikoresha nk’ibikoresho nkenerwa yaba iy’imbere mu gihugu cyangwa iyavanywe mu mahanga.

Mu minsi ishize hafashwe amakamyo 12 yari atwaye imyanda irimo ibyuma aho yinjiye mu Rwanda nta ruhushya bifite.

Umukozi ushinzwe Amasezerano Mpuzamahanga ajyanye n’Ibidukikije [Basel convention on Transboundary movement of chemical and hazardous waste], Muhoza Patrick yavuze ko iyi myanda izanwa mu Rwanda hagendewe kuri ayo masezerano yashyizweho umukono mu 1989 atangira gushyirwa mu bikorwa mu 1992.

Aya masezerano yitiriwe ‘Basel Convention’ ni amasezerano mpuzamahanga agamije kugabanya urujya n’uruza rw’imyanda iva mu bihugu bikize ijyanwa mu bikiri mu nzira y’amajyambere.Ni amasezerano u Rwanda rwemeje mu 2004.

Muhoza yavuze ko muri rusange aya masezerano anagamije kurinda ubuzima bw’abantu ndetse n’ibidukikije kuba byagerwaho n’ingaruka z’imyanda.

Ati “Nk’uko biteganywa n’ayo masezerano ndetse n’andi mategeko yo kurengera ibidukikije, hagomba kubaho guhanahana amakuru hagati y’ibihugu [igihugu kigiye kuzana iyo myanda ndetse n’ikizayakira] mbere y’uko iyo myanda yambuka umupaka.”

Yakomeje agira ati “Nka REMA tuba tugomba kubimenyeshwa n’ibyo bihugu tugatanga uruhushya ku bazana iyo myanda ariko kuri ayo makamyo ntabyo twamenye [kuri ayo makamyo 12 aherutse gufatwa]. Naho ubundi iyo binjiye ku isoko ry’imbere mu gihugu batubahirije inzira zisabwa, basabwa kubisubiza mu bihugu byavanywemo.”

Muhoza avuga ko mbere y’uko iyo myanda izanwa mu gihugu habanza kurebwa niba igihugu gifite ubushobozi bwo kuyakira no kuyinagura.

Ikindi kintu cy’ingenzi ni ukumenya imiterere y’iyo myanda kubera ko hari ishobora kuba yangiza ibidukikije cyangwa ikagira ingaruka zikomeye ku buzima bw’abantu.

Nta gihugu cyemerewe kohereza imyanda mu kindi gihugu kitabanje kwemererwa. Iyo bibaye, biba bikozwe mu buryo bunyuranyije n’amategeko.

Kwinjiza imyanda mu gihugu bitangirwa uburenganzira na REMA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .