Kwamamaza

Ni iyihe mpamvu ikiyaga cya Kivu cyongeye guhindura ibara?

Yanditswe kuya 9-09-2016 saa 14:50' na Philbert Hagengimana


Mu mpera z’ukwezi gushize kwa Kanama, amazi y’inkengero z’ikiyaga cya Kivu yahinduye ibara, ibi bikaba bitandukanye n’ibyagaragaye mu gihe cy’Itumba rya Werurwe na Mata muri uyu mwaka wa 2016, aho amazi yari yahindutse icyatsi kibisi, bituma benshi bibaza kuri iryo hindagurika.

Mu bihe bishize, mu bitangazamakuru bitandukanye hasohotse inkuru zivuga ku ihunduka ry’ibara ry’Ikiyaga cya Kivu, aho byavugaga ko amazi yacyo yari yarererutse, ibyitwa “Lake Whitening”.

Ikigo gishinzwe kubungabunga Ikiyaga cya Kivu (Lake Kivu Monitoring Programme) gitangaza ko ibi bisanzwe biba no ku bindi biyaga, ariko ukwereruka kwa Kivu kwabaye mu itumba ry’uyu mwaka, kwatewe ahanini n’ubushyuhe, ubuhehere n’imirasire y’izuba byazamutse bigatuma amazi yo mu gice cyo hejuru (igice cyiganjemo ibinyabuzima) ativanga nk’uko byari bimenyerewe.

Icyo gihe, icyo gice cy’ikiyaga byagaragaye ko cyari cyarabaye kigufi cyane (aho cyageraga kuri metero 28 z’ubujyakuzimu, kandi ubusanzwe kiba kirenga metero 50). Ibipimo by’ubushyuhe na byo byari hejuru, aho byageraga kuri dogere serisiyusi (degre cericius) 25 (25.5O) n’ubusharire bukagera ku 9.6 (PH 9.6).

Mu bihe nk’ibyo kandi ku ruhande rumwe imyunyu yitwa “carbonates” ntiba ikibasha kuyengera mu mazi nk’uko bisanzwe, ndetse iyitwa Calcium yo yiremamo udusenyi duto cyane twitwa ‘calcites’, akaba ari two dutuma amazi asa n’umweru(iyo uyashyize mu kirahure).

Ku rundi ruhande, kubera ibyatsi bito cyane bitaboneshwa amaso (birebeshwa microscope) byo mu bwoko bw’urubobi (blue green algae) byiswe ‘Cynobacteria’, byiyongera mu kiyaga, bigatuma amazi ahindura ibara agasa n’icyatsi cyererutse urebeye kure, ibi bikaba bikunda kugaragara kenshi mu gihe cy’itumba.

Ihinduka ryo muri Kanama ryo ryari ryashyize benshi mu rujijo

Ihinduka ry’ibara ry’amazi y’ikiyaga cya Kivu ryagaragaye mu mpera za Kanama 2016, ryatumye benshi bajya mu rujijo. Icyakora, abahanga bo mu Kigo gishinzwe kubungabunga Ikiyaga cya Kivu basobanura ko izo zari impinduka zisanzwe ziterwa n’umuyaga mwinshi.

Mu bisanzwe, mu gihe cy’impeshyi, ikiyaga cya Kivu ngo kibamo umuyaga mwinshi uhuha ugana mu majyaruguru yacyo.

Mu gitondo umuyaga uba uhuha buhoro ku buryo umuntu atabona impinduka, ariko uko umunsi ugenda ukura umuyaga ugenda wiyongera ukaza kuba mwinshi ahagana mu masaha ya saa sita na nyuma yaho.

Impinduka ziterwa n’iri hindagurika ry’ubukana bw’umuyaga zigaragara mu buryo bubiri:

- Impinduka ya mbere ijyanye n’igihe (seasonal impact): Amazi y’ikiyaga yo mu gice cyo hejuru arivanga ubwayo akanivanga n’ifumbire (nutrients) ituruka mu mazi yo mu ndiba y’ikiyaga.

- Indi mpinduka ya buri munsi (daily impact), ari na yo ahanini yagaragaye muri iyi minsi ishize muri iki kiyaga, ni aho amazi y’inkengero z’ikiyaga ahindura ibara, bitewe n’uko uko umunsi ukura, umuyaga ugenda uba mwinshi, imigezi imena mu kiyaga cya Kivu nka Sebeya, isanzwe ifite amazi arimo igitaka cyinshi akivanga n’ay’ikiyaga mu gice cyacyo cyo hejuru yerekeza ku nkombe, bigatuma ahindura ibara, agasa n’aya Sebeya.

Uko kwivanga kw’amazi ya Sebeya (arimo igitaka cyinshi) n’ayikiyaga kubera umuyaga mwinshi uturuka mu majyepfo ni ko kwatumye ay’inkengero z’ikiyaga cya Kivu ahindura ibara.

Ibyo bigaragara ku mafoto yafashwe saa tatu za mugitondo ku wa 31 Kanama 2016, mu gihe ayafashwe saa moya z’icyo gitondo (7:00am) agaragaza ko nta hinduka ry’ibara ry’amazi ryari ryabayeho.

Ibipimo bifatwa n’ikigo gishinzwe kubungabunga Ikiyaga cya Kivu (Lake Kivu Monitoring Programme) bigaragaza ko imiyaga yo ku Kiyaga cya Kivu ituruka mu majyepfo igana mu majyaruguru muri iyi minsi.

Ibipimo byafashwe ku kiyaga cya Kivu ku wa 31 Kanama 2016, bigaragaza ko amazi yo mu gice cyo hejuru yivangira hasi kugeza ku bujyakuzimu bureshya na metero 50 nk’uko bisanzwe mu gihe cy’impeshyi.

Ubusharire bw’amazi bugeze ku gipimo cya 9.16, ibipimo bitandukanye byafashwe ubu bigaragaza ko ikiyaga gitekanye.

Ihinduka ry’ibara ry’ikiyaga cya Kivu (ifoto y’Igihe.com yo ku wa 31 Kanama 2016)
Impinduka ku nkengero z’ikiyaga cya Kivu i Rubavu, saa moya za mugitondo (partie b&c) na sa tatu za mugitondo (a) ku ya 31 Kanama 2016 (ifoto ya LKMP)
Ukweruruka kw’ikiyaga cya Kivu, ku wa 13 Mata 2016/ Photo: Lake Kivu Monitoring Programme
Umuvuduko w’umuyaga ku kiyaga cya Kivu kuva ku wa 29 kugeza ku wa 31 Kanama 2016
Icyerekezo cy’umuyaga ku kiyaga cya Kivu, Kanama 2016
Ibipimo bitandukanye bigaragaza imiterere y’amazi byafashwe ku wa 31 Kanama 2016

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved