00:00:00 IGIHE NETWORK KN KINYARWANDA EN ENGLISH FR FRANCAIS

Minisiteri y’Ibidukikije yatanze impuruza ku bishora mu bikorwa byangiza urusobe rw’ibinyabuzima

Yanditswe na Muhonzire Sylvine
Kuya 1 Kamena 2021 saa 07:34
Yasuwe :
0 0

Umunyabanga Uhoraho muri Minisiteri y’Ibidukikije, Patrick Karera, yibukije abanyarwanda ko nubwo hamaze guterwa intambwe igaragara mu kubungabunga urusobe rw’ibinyabuzima, hakiri byinshi byo kwitabwaho.

Ibi yabivuze mu muhango wo kwizihiza Umunsi Mpuzamahanga wo kwita ku rusobe rw’ibinyabuzima usanzwe wizihizwa tariki 22 Gicurasi, ariko ukaba wizihijwe kuri uyu wa 31 Gicurasi 2021, mu cyumweru cyahariwe kubungabunga ibidukikije.

Patrick Karera yavuze ko u Rwanda rumaze gutera intambwe ishimishije mu kubungabunga urusobe rw’ibinyabuzima harimo kwita ku nyamaswa, imigezi, ibishanga n’amashyamba.

Ati “Turabona hari byinshi tumaze kugeraho mu rwego rw’amashyamba mwabonye ko pariki ya Gishwati-Mukura yashyizwe mu byanya bikomye bigomba kwitabwaho nk’umurage w’Isi. Ibi ni ibintu twishimiye cyane mu Rwanda n’abafatanyabikorwa twakoranye.”

Iyi Pariki ya Gishwati-Mukura yabayeho kubera ingufu za Guverinoma y’u Rwanda, mu gihe mbere yari yaratangiye guturwamo n’abaturage, ikorerwamo ibikorwa by’ubuhinzi n’ibindi bitandukanye ariko byose byarahagaritswe, abaturage barimurwa haterwa amashyamba, harongera hasubira uko hahoze.

Patrick Karera yakomeje avuga ko nubwo bimeze gutyo ariko hakiri byinshi byo gukora.

Yagize Ati “Nubwo twungukira mu kubungabunga urusobe rw’ibinyabuzima, ibikorwa dukora mu buzima bwa buri munsi birarwangiza.Turi kimwe mu bigize urusobe rw’ibinyabuzima ariko turi kuruma ukuboko kutugaburira. Kwangiza ibidukikije bitugiraho ingaruka, rero ni byiza ko tuba kimwe mu bisubizo mu kwita ku bidukikije.”

Ambasaderi w’Umuryango w’Ubumwe bw’u Burayi mu Rwanda, Nicola Bellomo, yavuze ko u Rwanda ari kimwe mu bihugu by’intangarugero mu kubungabunga urusobe rw’ibinyabuzima ndetse ko uyu muryango uri kurufasha gukomeza muri iyo nzira binyuze mu gutera inkunga imishinga itandukanye.

Yongeyeho ati “Hari ubushakashatsi bwinshi bwakozwe, hari byinshi byagezweho, ariko haracyari inzira ndende. Nka EU turi gufasha cyane Guverinoma y’u Rwanda n’Abanyarwanda muri uru rugendo, binyuze muri gahunda nyinshi zitandukanye. Uyu munsi by’umwihariko turi kugerageza kwereka abantu uruhare rwabo mu kurinda urusobe rw’ibinyabuzima.”

Zimwe mu mbogamizi u Rwanda rugihura na zo mu kubungabunga urusobe rw’ibinybuzima harimo ubwiyongere bw’abaturage butuma hakenerwa ubutaka bwinshi bwo guturaho, guhinga no gukoreraho imirimo ya buri munsi, gutema ibiti hashakwa inkwi n’amakara, ihindagurika ry’ikirere, impanuka zivamo gutwika amashyamba, imyumvire ikiri hasi n’ibindi.

Intego u Rwanda rwari rwarihaye yo kuba rufite amashyamba ari kuri 30% by’ubuso bwarwo yagezweho buranarenga buba 30.4% nk’uko ibarura rya 2019 ryabigaragaje.

Bamwe mu bari bitabiriye ibiganiro ku kubungabunga urusobe rw'ibinyabuzima
Habaye ibiganiro bitandukanye bigamije kureba uko ingamba zashyizweho mu kubungabunga urusobe rw'ibinyabuzima ziri gushyirwa mu bikorwa
Nicola Bellomo, uhagarariye EU mu Rwanda, yavuze ko uyu muryango uri gufasha u Rwanda mu rugendo rwo kwita ku rusobe rw'ibinyabuzima
Umunyabanga Uhoraho muri Minisiteri y'Ibidukikije, Patrick Karera, yavuze ko nubwo hari byinshi byagezweho, hakiri ibyo gukora mu kurengera urusobe rw'ibinyabuzima
Umuyobozi Mukuru wa REMA, Juliet Kabera, yavuze ko u Rwanda rwageze kuri byinshi mu kubungabunga urusobe rw'Ibinyabuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .