Kayonza: Bralirwa yashyikirije abaturage amashanyarazi akomoka ku zuba inifatanya na bo gutera ibiti

Yanditswe na Evariste Nsengimana
Kuya 3 Ukuboza 2017 saa 08:20
Yasuwe :
0 0

Uruganda rukora ibinyobwa bisembuye n’ibidasembuye(Bralirwa) rwashyikirije imiryango 283 yo mu Murenge wa Ndego, Akarere ka Kayonza, amashanyarazi akomoka ku mirasire y’izuba, afite agaciro ka miliyoni 15, abakozi n’abayobozi bayo bifatanya n’abaturage mu muganda wo gutera ibiti bivangwa n’imyaka bisaga 1200.

Nyuma y’umuganda no gushyikirizwa amashanyarazi kuri uyu wa 2 Ukuboza 2017, Mukarutabana Helena yabwiye IGIHE ko ashimishijwe n’uko atazongera kugonga inkuta z’inzu kubera kuba mu kizima.

Yagize ati “Aba bantu barakoze cyane; wasangaga mu gihe cy’igicuku njya hanze nijoro nkagonga urukuta kubera hatabona ariko ubu mpita nkanda ku rukuta hakabona. Hari n’ubwo twacanaga agatadowa umwotsi wako ugasanga uratubangamiye cyane.”

Umuyobozi ushinzwe itumanaho no guhuza ibikorwa, Nyangezi Fred, yavuze ko iki gikorwa kigamije kuzamura imibereho myiza y’abaturage batuririye umurima uhingwamo ibyo Bralirwa yifashisha yenga inzoga.

Yangeye ati “Ubundi igikorwa cyatuzanye kwari ukwifatanya n’abaturage mu muganda wo gutera ibiti ariko kandi tuje no gutaha ikindi twakoze mbere cyo guha abaturage amashanyarazi akomoka ku zuba. Icyivugo cyacu ni ugutsinda mu kazi, tugatsinda ubukene, umwijima. Murabyumva neza ko twazanywe n’igikorwa cyiza.”

Muri rusange, abaturage b’Akarere ka Kayonza bafite umuriro w’amashanyari ni 33%, by’umwihariko mu Murenge wa Ndego, abawufite ni 18%, abandi basigaye baracyacana agatadowa.

Umuyobozi wungirije w’Akarere ka Kayonza ushinzwe imibereho myiza y’abaturage, Harerimana Jean Damascène, yashimiye Bralirwa ku bikorwa ikora bigamije gufasha abaturage bako, asaba abaturage kubibungabunga, cyane cyane ibyo biti kubera akamaro bibafitiye harimo kuzana umwuka mwiza, gukurura imvura n’ibindi.

Abakozi ba Bralirwa n'aba Mobisol yagize uruhare mu gutanga amashanyarazi bagiye gutera ibiti
Abaturage bashyikirijwe amashanyarazi akomoka ku mirasire y'izuba
Agace batuyemo nta muriro w'amashanyarazi uhagera
Mukarutabana Helena yabwiye IGIHE ko ashimishijwe n’uko atazongera kugonga inkuta z’inzu kubera ikizima
Umuyobozi ushinzwe itumanaho, guhuza ibikorwa n’imibare, Nyangezi Fred, agiye gutera igiti
Umuyobozi wungirije w’Akarere ka Kayonza ushinzwe imibereho myiza y’abaturage, Harerimana Jean Damascène, yashimiye Bralirwa ku bikorwa ikora bigamije gufasha abaturage bako, asaba abaturage kubibunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza