00:00:00 IGIHE NETWORK KN KINYARWANDA EN ENGLISH FR FRANCAIS

Inzitizi zigipfukirana umusanzu w’Umunyarwandakazi mu kubungabunga ibidukikije

Yanditswe na Dufitumukiza Salathiel
Kuya 19 Kanama 2021 saa 05:45
Yasuwe :
0 0

U Rwanda ruri mu bihugu birajwe ishinga no guteza imbere ubukungu butonona ibidukikije. Nibura 50,9% by’abarutuye ni abagore ndetse bagira uruhare runini mu buhinzi bufatwa nk’urwego rwatanga umusanzu ukomeye mu kubungabunga ibidukikije.

Imibare y’Ikigo cy’Igihugu cy’Ibarurishamiobare mu 2018 yerekanye ko abagore 76% bakora mu buhinzi, mu gihe abagabo bari 54%.

Uretse kuba biganje mu rwego rw’ubuhinzi, magingo aya bari no mu nzego zigira uruhare mu ishyirwaho ry’ingamba n’ibyemezo byo kubungabunga ibidukikije.

Nk’urugero Ikigo cy’Igihugu gishinzwe Kurengera Ibidukikije (REMA) na Minisiteri y’Ibidukikije biyobowe n’Abagore, hakaba n’indi miryango itandukanye bimeze bityo.

Birumvikana ko hari uruhare rukomeye bagira mu kubibungabunga binyuze mu ngamba n’amabwiriza ndetse n’iyubahirizwa ryabyo.

Umuyobozi Mukuru wa REMA, Kabera Juliet, yabwiye IGIHE ko mu Rwanda umugore agira uruhare rukomeye mu kubungabunga ibidukikije akabihuza n’iterambere ry’umuryango mugari.

Ati “Usanga umubare munini w’Abanyarwandakazi ari bo bashaka amafunguro bakanayategura. Ibi byose babikura ku mutungo kamere w’ibidukikije kandi babikora baharanira kutawusesagura. Hari n’amazi, ibicanwa n’ibindi.”

Yakomeje avuga ko kuba umugore agaragara mu nzego zose zirimo n’izifata ibyemezo mu kubungabunga ibidukikije bituma iby’ingenzi azakenera ngo yisange muri politiki ziba zashyizweho bitibagirana. Ngo bituma aho afite intege nke atekerezwaho kare kugira ngo adasigara inyuma.

Yongeyeho ati “Gahunda zose zo kubibungabunga ntizagerwaho umugore atabigizemo uruhare.”

Yatanze urugero rwo guca ikoreshwa rya ‘plastique’ mu Rwanda, ati “Muri ya mirimo ya buri munsi y’umugore hazamo guhaha no gucuruza kandi ni ho ‘Plastique’ zikokoreshwa. Urumva ko atabigizemo uruhare bitagerwaho.”

“Ikindi guteka arondereza ibicanwa cyangwa akoresheje gaz na byo atabigizemo uruhare ntibyagerwaho. Turashimira cyane inzego z’abagore kuko mu mihigo babigira ibyabo kandi bakabigeraho.”

Baracyafite inzitizi nyinshi mu gutanga umusanzu

Mugurirwa Odette, umuhinzi wo mu Karere ka Rulindo, mu kiganiro kigufi yagiranye na IGIHE yavuze ko yigeze kwishyira hamwe na bagenzi be bafite igitekerezo cyo gukora umushinga wo gukora uruhumbikiro rw’ibiti bivangwa n’imyaka ariko bakabura igishoro.

Ati “Twari abantu 28 dushaka gukora pepinyeri tubura amikoro yo kugura imbuto, amashashi no gukodesha umurima. Twashakaga iz’ibiti bivangwa n’imyaka n’imyaka nka avoka, imyembe n’amaronji.”

Iyi foto yafashwe mu 2016, igaragaza abagore bo muri Nyaruguru bafata ingemwe z'ibiti byo gutera

Icyakora baje kugira amahirwe bagerwaho na gahunda z’Umuryango utegamiye kuri Leta ubungabunga ibidukikije, ARCOS, ubafasha gukabya inzozi.

Yasobanuye ko mu myaka yashize bahuraga n’indi nzitizi yo kuba badafite ubushobozi bwo gufata imyanzuro mu ngo zirimo abagabo, ariko ngo igenda ivaho uko bahabwa inyigisho.

Umuyobozi ushinzwe gahunda y’iterambere rirambye ry’abaturage muri ARCOS, Kanyamugenge Brigitte , yavuze ko nyuma y’imyaka 25 uwo muryango ukorana n’abaturage hirya no hino mu gihugu, ubu ukorana n’amatsinda 260, kandi ko abagore bagira ubushake bwo gutanga umusanzu ariko bagakomeza kuzitirwa na byinshi.

Yagize ati “Abanyarwanda benshi batunzwe n’ubuhinzi. Kuba abagore ari bo baburimo cyane kandi bakamara umwanya munini bakora imirimo ijyanye na bwo bivuze ko igihe habayeho ibikorwa byangiza ibidukikije akenshi ari bo babigiramo uruhare. Ibyo bibaho akenshi batabigambiriye ahubwo ari ubumenyi buke.”

Mu byo ARCOS ifasha abakorana na yo harimo no kubahugura. Kanyamugenge yavuze ko muri ayo mahugurwa haboneka inzitizi y’uko iyo bajya kwandika abazayitabira usanga haboneka umubare munini w’abagabo kuko ari bo baba baranditswe nk’abakuru b’imiryango.

Izo mbogamizi zashimangiwe kandi na Kabera wavuze ko zirimo n’iziterwa n’amateka ku buryo bisaba igihe kinini ngo hazibwe icyuho zateje.

Yagize ati “Imbogamizi zikizitira umugore ahanini ni ubushobozi, amikoro adahagije ndetse n’ubumenyi [buke].Ubu abagore benshi bari mu buhinzi abahinga kinyamwuga ni hafi ya ntabo, mu bucukuzi bw’amabuye y’agaciro na ho uzahasanga bake.”

Hakenewe iki?

Mugurirwa yemeje ko kubungabunga ibidukikije bimufasha no mu zindi gahunda zirimo kurwanya imirire mibi hirindwa igwingira, bwaki n’izindi ndwara zirishingiyeho. Ibyo ngo umugore ni we uri ku ruhembe rwo kubimenya akanabikora neza kuko ari we utegura amafunguro.

Kanyamugenge yemeje ko abagore ari bo bagira uruhare runini mu burezi bw’abana, bityo kuba baba bafite indangagaciro zo kubungabunga ibidukikije byakoroha kuzibiba no mu bakibyiruka bikazikurana.

Yagaragaje ko mu bunararibonye bafite basanze abagore bifitemo ubushobozi bwo kumva ibintu vuba no guhindura abandi, ku buryo icyo bamaze kumenya ko cyagira akamaro mu kubungabunga ibidukikije bagishishikariza bagenzi babo byihuse.

Mugurirwa yasabye abagore bagenzi be gutinyuka bakegera abandi, bakamenya amakuru, bagatanga ibitekerezo ndetse bakagaragaza inzitizi bafite kuko ari byo bizabafasha kugera ku ntego zabo zirimo kugaragaza umusanzu mu kubungabunga ibidukikije.

Kabera yasobanuye ko kugera ku iterambere rirambye ari ngombwa ko abagabo n’abagore bahabwa amahirwe angana,yibutsa ko kubungabunga ibidukikije atari “amahitamo ahubwo ari inshingano” mu gihe hifuzwa ubuzima bwiza ku bariho n’abazabaho.

Iyangirika ry’ibidukikije ni kimwe mu bihangayikishije Isi mu gihe ihanganye n’imihindagurikire y’ibihe, iri guteza inkongi z’imiriro mu mashyamba atandukanye hirya no hino ahandi hakaba imyuzure n’imiyaga idasanzwe.

Iterambere rijyanye no kubirengera ni ryo ryimakajwe, aho inzego nyinshi zigomba gukoreshwamo ikoranabuhanga kugira ngo bigerweho. Ibyo ariko bigomba kujyana no kugenzura ko nta basigara inyuma mu igenwa n’ishyirwa mu bikorwa ry’ingamba na politiki bitandukanye.

Umubare munini w’abagira uruhare mu buhinzi bufatwa nk’urwego rwatanga umusanzu ukomeye mu kubungabunga ibidukikije ni abagore
Inzobere mu by'ubumenyi bw'Isi zigaragaza ko inkongi z'imiriro ziri kwibasira amashyamba atandukanye ziri guterwa n'imihindagurikire y'ibihe yagizwemo uruhare n'iyangirika ry'ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .