00:00:00 IGIHE NETWORK KN KINYARWANDA EN ENGLISH FR FRANCAIS

Hari gukorwa iki ngo udupfukamunwa twakoreshejwe tutazaba ikibazo?

Yanditswe na Dufitumukiza Salathiel
Kuya 14 Kanama 2021 saa 04:42
Yasuwe :
0 0

Amezi 16 arirenze udupfukamunwa dutangiye kwambarwa n’abatari abo mu nzego z’ubuzima n’indi mirimo yateza ibyago ku myanya y’ubuhumekero. Coronavirus yatumye tugirwa itegeko kuri bose, inganda n’ibigo 76 byo mu Rwanda biradukora kugira ngo tuboneke ku bwinshi abaturage bakwirwe.

Amamiliyoni yatwo yakozwe mu gihe gito kandi haracyakorwa utundi. Twarabonetse ikigamijwe kigerwaho, ariko magingo aya hari impungenge z’uko bizagenda kugira ngo tutaba umuzigo mu rugamba rwo kubungabunga ibidukikije Igihugu kirimo.

Nubwo nta mibare igaragaza utumaze gukorwa twose hamwe, mu byumweru bibiri bya mbere inganda zitangiye kudukora hari hakozwe miliyoni 3,5, intego ari uko mu kwezi haba hakozwe miliyoni 12.

Muri two harimo utugenewe kwambarwa amasaha atandatu tukajugunywa, hakaba n’udundi dufurwa nyuma y’ayo masaha ariko natwo twafurwa inshuro eshanu tugatabwa. Biragoye kumenya ingano y’utumaze gukorwa kuko uko iminsi yicuma hakorwa utundi twinshi.

Kugeza ubu ahenshi mu ngo, imidugudu n’ahandi hahurira abantu benshi nko mu masoko, kwa muganga cyangwa ku mihanda no muri za santere; nta bikoresho uhasanga byagenewe gushyirwamo udupfukamunwa.

Ntiharanamenyekana igihe utugenda tujugunywa ahabonetse hose tuzashyirirwa hamwe tukangizwa.

Leta irateganya iki?

Muri Mata 2020, Ikigo cy’Igihugu gishinzwe Kurengera Ibidukikije (REMA) cyasohoye imirongo ngenderwaho ijyanye no gukusanya utwamaze gukoreshwa hirindwa ko twaba imbogamizi mu kurengera ibidukikije, cyane ko twangiza amazi, ubutaka, umwuka utibagiwe no kuba twaba isoko y’ikwirakwira rya Covid-19.

Iyo mirongo igena ko mu ngo n’ahahurira cyangwa ahakorera abantu benshi hagomba gushyirwa igikoresho cyihariye kizajya gishyirwamo udupfukamunwa twakoreshejwe, kikahakurwa n’ababishinzwe.

Igena kandi ko ufite akakoreshejwe ashobora kugashyikiriza ivuriro, farumasi, ikigo nderabuzima, ibitaro cyangwa abaducuruza igihe agiye kugura agashya.

Mu kiganiro IGIHE yagiranye n’Umuyobozi Mukuru wa REMA, Kabera Juliet, yavuze ko kuba hari ahantu henshi udupfukamunwa twakoreshejwe tugaragara twavanzwe n’ indi myanda biterwa n’imyumvire ikiri hasi mu micungire n’imivangurire yayo.

Yavuze ko hari icyo REMA yatangiye gukora cyitezweho kugira akamaro mu guhangana n’icyo kibazo.

Ati “Hari sosiyete itwara imyanda mu ngo n’ ahandi hatandukanye yahawe isoko ryo gukusanya udupfukamunwa twakoreshehwe mu Mujyi wa Kigali. Mu ngo, amasoko, n’ahandi hose.”

Ibyo ngo byakozwe nyuma y’igeragezwa ryakorewe mu turere twa Gasabo, Bugesera, Musanze, Rubavu na Kamonyi, rikagaragaza ko muri Kigali ari ho higanje udupfukamunwa twinshi.

Nyuma y’uko dukusanywa tujyanywa hehe?

Kabera yavuze ko udupfukamunwa tumaze gukusanywa aho tuba twaragiye dushyirwa hatandukanye dutwikwa.

Ati “Udupfukamunwa twakusanyijwe duhita tujyanwa aho twangirizwa habugenewe. Turatwikwa kuko dufatwa nk’indi myanda ikomoka kwa muganga yose cyangwa ikomoka ku buvuzi.”

“Ikindi kandi utu dupfukamunwa n’iyo tugeze mu bimoteri rusange, iyo sosiyete ifite inshingano zo kutuvangura n’indi myanda ifatanyije n’abakozi basanzwe bacunga imyanda ku bimoteri.”

Yatangaje ko hari abajyanama b’ubuzima bahuguwe na Minisiteri y’Ubuzima bazajya bafasha iyo sosiyete kudukusanya hirindwa ko byateza izindi ngaruka.

REMA yasabye Abaturarwanda kwitwararika cyane mu micungire y’imyanda ishobora kwanduza indwara no kwangiza ibidukikije kurusha iyindi.

Ahenshi bavanga udupfukamunwa n'indi myanda
Ahakorerwa akazi henshi nta gikoresho cyihariye gishyirwamo udupfukamunwa twakoreshejwe
Ni henshi hagaragara udupfukamunwa twakoreshejwe twandagaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .