Harateganywa kuzazamura ibiciro ku bicuruzwa bipfunyitse muri pulasitiki biza mu Rwanda

Yanditswe na Ferdinand Maniraguha
Kuya 30 Gicurasi 2018 saa 12:17
Yasuwe :
0 0

Mu gihe gito ibicuruzwa bipfunyitse mu bikoresho bya pulasitiki bishobora kujya bicibwa amafaranga runaka y’inyongera kugira ngo byemerewa kwinjira mu Rwanda.

Mu 2008 nibwo u Rwanda rwaciye amashashi runashyiraho itegeko rihana uyakoresha cyangwa uyinjiza mu gihugu mu kubungabunga ibidukikije.

Kuri ubu, hashize iminsi mike hatangijwe ubundi bukangurambaga bwo kureka kwifashisha ibikoresho bya pulasitiki cyane cyane ibipfunyikwamo amazi n’ibindi mu gihe bigaragara ko hari ubundi buryo bwakoreshwa.

Minsitiri w’Ibidukikije, Dr Biruta Vincent, mu kiganiro n’abanyamakuru kuri uyu wa Kabiri ubwo hatangizwaga icyumweru cyahariwe ibidukikije, yavuze ko abikorera bo mu Rwanda bakwiye gufasha leta guca ibipfunyikwamo bya pulasitiki., bakoresha cyane.

Icyakora Dr Biruta yavuze ko abikorera bagaragaje impungenge ko bahendwa n’ibyo gupfunyikamo bitari pulasitiki nyamara ibicuruzwa byabo bigahangana n’ibyo mu mahanga bipfunyitse muri pulasitiki.

Ati “Abikorera bo mu Rwanda bakomeje kujya bavuga ko igihe bo badakoresha amashashi ya pulastiki, hari ibicuruzwa byinjira mu gihugu biri mu mashashi ya pulastiki, bakavuga bati ‘iyo bigeze ku isoko hari igihe usanga ibyacu bihenze kubera ko ibipfunyikwamo biba bihenze.”

Yavuze ko hari itegeko rishya riri gutegurwa rizagenga imikoreshereze ya pulastiki mu gihugu rishobora kugezwa mu nama y’abaminisitiri muri Kamena uyu mwaka, rikaba rishobora gushyiraho igiciro runaka cy’inyongera ku gicuruzwa cyinjiye mu gihugu gipfunyitse muri pulasitiki.

Ati “Turateganya mu mushinga w’itegeko kuba twagira icyo duca kuri buri gicuruzwa cyinjiye mu gihugu kiri muri pulastiki kugira ngo hoye kuba guhangana ku isoko kw’ibicuruzwa byacu bipfunyitse mu bindi bishobora kuba bihenze kurusha bya bindi bya pulastiki kandi n’ayo mafaranga yaba yiyongereyeho akaba yajyanwa muri bya bikorwa byo kurwanya wa mwanda ukomoka kuri pulastiki.”

Kuba u Rwanda rwaraciye amashashi ya pulasitiki, Biruta avuga ko byaruhesheje ishema mu kwita ku bidukikije.

Ati “Hari byinshi byagezweho nko kuba tutakibona amashashi ya pulastiki aguruka hirya no hino, byanahesheje isura nziza igihugu cyacu kikaba kizwi nk’igihugu kirimo isuku. Byanahaye amahirwe abikorera batangiza inganda zinagura pulasitiki n’izindi nganda zikora ibipfunyikwamo.”

Asanga abikorera bavuga ko guca pulasitiki bizongera igiciro cy’ibyo bacuruza atari byo.

Ati “Igiciro cy’ibisimbura pulasitiki gishobora guhenda ariko ntabwo byakabaye urwitwazo rw’abikorera kuko ubundi uwo ikiguzi kijyaho bwa nyuma ni ugura kandi ugiye kugura na we ashobora kwirinda kugura ibyo bapfunyikamo, agatwara igikapu cye.”

Ubukangurambaga bwo guhashya ibikoresho bya pulasitiki buvuga ko igihe icyo gikoresho kidashobora gukoreshwa inshuro zirenze imwe, nta mpamvu yo kugikoresha.

Ignatius Mugabo, umwe mu bayobozi b’uruganda Jardin Meubles runagura ibikoresho bya pulasitiki ruherereye i Gahanga, yavuze ko igihe hagiye gufatwa umwanzuro nk’uwo wo guca bimwe mu bikoresho ukwiye kujya uganirwaho n’abo bireba bose, bakabanza gushakira ibisubizo imbogamizi zose zihari.

Ati “Nkatwe twashoye miliyoni eshanu z’amadolari mu ruganda runagura ibikoresho bya pulastiki ariko twakunze kugorwa no kunagura amacupa ya pulasitiki cyane cyane akoreshwa mu mazi n’ibindi. Ikibazo cyagiye kiba ko imashini zifashishwa mu gukora ayo macupa zihenze cyane. Hakwiye kujya habaho ibiganiro ku babifitemo uruhare hagashakishwa ibisubizo bibereye impande zombi aho kuzana ikintu kitemeranyijweho.”

Minisiteri y’Ibidukikije, iy’Ubutabera n’ibigo bizishamikiyeho, zatangaje ko nta macupa ya palasitiki, ahanini yazanwagamo amazi n’imitobe, azongera gukoreshwa mu biro no mu nama zayo.

Minsitiri w’Ibidukikije, Dr Biruta Vincent

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza