U Rwanda na Congo byemeranyije gufatanya kubungabunga Ikivu

Yanditswe na Mukwaya olivier
Kuya 10 Werurwe 2017 saa 07:54
Yasuwe :
0 0

Impuguke z’abashakashatsi zo mu Rwanda na Repubilika iharanira Demokarasi ya Congo zasoje iminsi ibiri mu Karere ka Rubavu, ziga uko ikiyaga cya Kivu nk’umutungo kamere uhuje ibihugu byonbi wabyazwa umusaruro.

Ibi biganiro by’abashakashatsi byasojwe kuri uyu wa Gatanu byaje bikurikira amasezerano abaminisitiri b’u Rwanda na Congo bafite mu nshingano zabo umutungo kamere, Dr Vincent Biruta na Aime Ngoy Mukena bari bagiranye mu mwaka ushize i Ngoma.

Kuwa 10 Ugushyingo 2016, aba baminisitiri bagaragaje ko iki kiyaga kidafite gaz methane gusa, harimo n’indi mitungo ibihugu byombi byafatanya kubyaza umusaruro.

Abashakashatsi ba leta bahuriye hamwe mu kwiga imiterere nyakuri ya Kivu n’ibinyabuzima bikirimo hagamijwe kurengera uyu mutungo kamere, ari nako hirindwa ingaruka mbi zishobora guteza abaturiye Kivu.

Itsinda rishinzwe ubushakashatsi ku binyabuzima biri mu Kivu, hamwe n’abashinzwe kugenzura iruka ry’ibirunga, bagaragaje ko abaturiye ikiyaga cya Kivu bo muri Congo mu Ntara ya Kivu y’Amajyepfo n’iy’Amajyaruguru hamwe n’abanyarwanda batuye mu Ntara y’Uburengerazuba ari bo bakunze kugirwaho n’ingaruka z’imitingito ifitanye isano n’iruka ry’ibirunga binyuze mu kiyaga cya Kivu.

Iyi mitingito yasenyeye abaturage inahitana n’ubuzima bw’abantu mu mwaka wa 2002 n’uwa 2008. Ibyo byose bigaterwa ahanini n’imiterere y’akarere iki kiyaga kirimo k’ibirunga bikiruka.

Uhagarariye Ikigo gishinzwe iruka ryibirunga, Kasereka Muhinda Celestin, yemeza ko ikiyaga cya kivu gifite imbogamizi ku baturage bagituriye, kandi ko iyo mitingito ikomoka kuri izo nzira z’ibirunga ziri munsi yiki kiyaga.

Yakomeje agaragaza ko iki kiyaga kibitse ubukungu bwinshi ariko kandi gishobora guteza ibyago bikomeye mu gihe gikoreshejwe nabi.

Aba bashakashatsi banagaragaje ko munsi y’iki kiyaga hashobora kuba hari inzira zikomeye z’ibirunga, no mu nkengero zacyo cyane mu mujyi wa Gisenyi n’uwa Goma, ndetse no hafi ya Kamembe na Bukavu.

Umuyobozi wa Sosiyete yo guteza imbere ingufu ( EDCL) , Emmanuel Kamanzi, avuga ko imitingito iterwa n’iruka ry’ibirunga inyuze muri iki kiyaga, ishobora kugira ingaruka ku mishinga ya Gaz Methane yatangiye gucukurwamo.

Yagize ati “Uretse kwangiza inzu, imitingito ishobora no gusenya inganda za gaz methane ziri muri iki kiyaga, ndetse mu gihe bisenyutse byagira ingaruka zikomeye ku baturiye iki kiyaga nk’uko byagenze mu kiyaga cya Nyaso mu gihugu cya Cameroun mu 1986, aho abantu 2000 babuze ubuzima. ”

Imishinga igiye gukurikirana imicungire y’ikiyaga cya kivu ahanini izibanda ku kugenzura imiterere y’ibirunga, imitingito, gukurikirana imihindagurikire y’ibihe, kwita ku binyabuzima bikirimo, kukirinda isuri imanukana itaka ndetse n’imigezi yisukamo, bishobora kwangiza Ikivu. Iyo mishinga iteganyijwe kuzahakorera mu gihe cy’imyaka ibiri ku nkunga y’u BUholandi. Izasozwa itwaye amadolari y’Amaerika miliyoni 1,3.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244