Kwamamaza

COMESA na AWF bemeranyije kurengera ibidukikije hatezwa imbere ubukerarugendo

Yanditswe kuya 5-09-2016 saa 18:54' na Cyprien Niyomwungeri


Umuryango w’Ubucuruzi bw’Ibihugu by’Afurika y’Amajyepfo n’Uburasirazuba (COMESA) n’Umuryango urengera ibidukikije (AWF), bemeranyije kurengera ibidukikije hirindwa ko byahungabanywa n’ibikorwa by’iterambere.

Kuri uyu wa Mbere tariki 5 Nzeli 2016, mu nama mpuzamahanga yiga ku ishoramari rya Afurika, nibwo imiryango yombi yasinyanye amasezerano y’ubufatanye mu kurengera ibidukikije nka kimwe mu bibumbatiye umutungo kamere wa Afurika.

Aya masezerano ashingiye ku bujyanama no kungurana ibitekerezo ku bibazo byugarije ibidukikije no kureba ahantu hakwiye kubungwabungwa kubw’iterambere ry’akarere muri rusange.

Umuyobozi wa AWF, Kaddu Sebunya, yavuze ko mu rwego rwo guteza imbere ubukungu bwa Afurika abaturage bose bagiraho inyungu, ibidukikije bikwiye kwitabwaho kuko aribyo ubukungu bwa benshi bushingiyeho.

Yagize ati “Aya ni amasezerano y’ingirakamaro mu kurengera ibidukikije kandi kubirengera ni ikintu cy’ingenzi mu iterambere rya Afurika. Ni ingirakamaro kuri twe nk’abanyafurika n’abashaka kudufasha mu iterambere.”

Umunyamabanga mukuru wa COMESA, Dr. Sindiso Ndema Ngweya, yavuze ko hakenewe uburyo bwiza bwo bwatuma ibidukikije bitabangamirana n’imibereho ya muntu mu iterambere rye rya buri munsi.

Yashimangiye ko ibidukikije bya Afurika ari isoko y’ubukerarugendo kandi bubumbatiye ubukungu bw’ibihugu byinshi.

Yagize ati “Iyo witegereje amahirwe ari mu bukerarugendo by’umwihariko ubw’ibidukikije, ubona ko bushobora kuba isoko y’imibereho myiza y’abaturage bacu.

Ubukerarugendo bufatiye runini ubukungu bwa Afurika, kandi ni urusobe karemano ntagereranywa n’ubwiza Afurika ifite, bukwiye kubera isoko n’ikirango cy’Abanyafurika.”

Umwaka ushize ubukerarugendo bw’u Rwanda bwinjije miliyoni 318 z’amadolari, muri Kenya bugira uruhare rungana na 36% ku musaruro mbumbe w’igihugu.

Dr. Ngweya yashingiye kuri uyu musaruro yemeza ko ari ikimenyetso cy’uko ibidukikije bikwiye kwitabwaho, hakabaho politiki na gahunda nziza ndetse n’ibikorwa remezo bituma ubukerarugendo bubyara umusaruro ufatika.

Avuga ko ibihugu bya Afurika byose bikuyeho Viza ku Banyafurika byatuma abakerarugendo biyongera bityo n’umusaruro ukiyongera.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved