Asaga miliyoni 2.5 $ agiye kwifashishwa mu guhangana n’ingaruka z’imihindagurikire y’ibihe mu Rwanda

Yanditswe na Emma-Marie Umurerwa
Kuya 28 Gashyantare 2018 saa 11:32
Yasuwe :
0 0

Ihuriro ryagiyeho rigamije guhangana n’imihindagurikire y’ibihe, RCCDN ‘Rwanda Climate change and development network’, rigiye kwifashisha miliyoni 2.8 z’amadolari ya Amerika mu bikorwa byaryo mu gihe cy’imyaka itanu.

Ibikorwa bya RCCDN bizibandwaho ni ugufata neza ibidukikije, kuhira imyaka, gutera amashyamba, gufata amazi y’imvura, guha abaturage amakuru ajyanye n’ihindagurika ry’ibihe ku gihe; babifashijwemo n’izo miliyoni 2.8 $.

Umuyobozi w’iri huriro, Rwibasira Eugène, yavuze ko imihindagurikire y’ibihe ari ikibazo gihangayikishije u Rwanda n’Isi.

Yagize ati “Imihindagurikire y’ibihe ni ikibazo kidafite umupaka kandi si umwihariko w’u Rwanda ahubwo ni ikibazo cy’Isi. Ntitwavuga ngo kirarangira uyu munsi ahubwo turashaka kureba uburyo twahangana nacyo twibanda cyane ku gukumira kugira ngo bitazatugiraho ingaruka z’ikirenga.”

Yakomeje avuga ko mu gihe cy’imyaka itanu biyemeje kuzakora ibikorwa bitandukanye.

Ati “Tuzakora ibikorwa byo kubaka ubushobozi bw’abaturage mu bijyanye n’uburyo bamenya amakuru ajyanye n’imihindagurikire y’ibihe, tuzubaka ibikorwaremezo, tuzashyira imbaraga muri gahunda yo kuhira imyaka, hazaterwa amashyamba hirya no hino, tuzarushaho gushishikariza abanyarwanda gufata neza ibidukikije.”

Umuyobozi mukuru muri Minisiteri y’ibidukikije, ushinzwe ibidukikije n’ihindagurika ry’ibihe, Kabera Juliette, yavuze ko imihindagurikire y’ibihe ari kimwe mu bibazo byugarije u Rwanda.

Yagize ati “Ubukungu bw’u Rwanda bushingiye cyane ku buhinzi n’ubworozi, kubera ihindagurika ry’ibihe imvura isigaye igwa ari nyinshi cyane cyangwa ikabura hakava izuba ryinshi noneho abahinzi bahinga imyaka ikarumba cyangwa imyuzure ikaza ikangiza ibintu byinshi. Twishimiye cyane rero ko iri huriro rigiye gufasha Leta guhangana n’izi ngaruka.”

Yashimye cyane ko mu byo iri huriro rizakora harimo gufasha abahinzi guhindura imyumvire bakajya bahinga bakurikije amakuru y’iteganyagihe, badashingiye gusa ku makuru bari basanganywe yo kumenya ngo mu kwezi uku n’uku ni igihe cy’ihinga.

Imvura nyinshi, inkuba, imyuzure n’amapfa ni bimwe mu biza byagize ingaruka zikomeye ku banyarwanda mu mwaka wa 2017 ndetse binatwara ubuzima bw’abagera kuri 82 mu gihe abandi 151 bakomeretse. Ibyangiritse byose hamwe bifite agaciro kabarirwa muri miliyari 6.7 Frw.

Ihuriro RCCDN rivuga ko rigiye gufasha leta mu guhangana n’ibi biza biteza igihombo bikanatwara ubuzima bw’abaturage.

Umuyobozi wa RCCDN, Rwibasira Eugène
Umuyobozi mukuru muri Minisiteri y’ibidukikije, ushinzwe ibidukikije n’ihindagurika ry’ibihe, Kabera Juliette
Ihuriro RCCDN ryatangijwe ku mugaragaro ku wa 27 Gashyantare 2018
Abanyamuryango ba RCCDN bagera kuri 46
Mu muhango wo gutangiza RCCDN

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza