Afurika na Aziya mu kaga k’ihumana ry’umwuka abantu bahumeka

Yanditswe na Cyprien Niyomwungeri
Kuya 2 Gicurasi 2018 saa 12:04
Yasuwe :
0 0

Ishami ry’Umuryango w’Abibumbye ryita ku Buzima (OMS) ryatangaje ko mu bice byose by’Isi, imyuka ihumanya umwuka abantu bahumeka n’ikirere ari ikibazo gikomeye ariko cyane cyane mu bihugu bikennye kikaba gikomeje kuba kibi kurushaho.

Inyigo ya OMS yasuzumye ibyago bituruka ku byuka bihumanya, yaba ibyo mu rugo n’ibyo hanze yarwo muri rusange, yerekanye ko ababarirwa muri miliyoni zirindwi bapfa buri mwaka bazize ibyo byuka.

Igaragaza ko abarenga 90 % by’abicwa n’ibifitanye isano n’imyuka bihumanya ikirere ari abo mu bihugu bikennye n’ibifite ubukungu buciriritse byiganje muri Afurika na Aziya.

Maria Neira uyobora ishami rishinzwe ubuzima rusange n’ibidukikije muri OMS, yavuze ko ‘iki ari ikibazo giteye ubwoba.’

Iyi mibare yibanze cyane ku bubi bw’uduce duto duto tutabonwa n’amaso twivanga n’umwuka duhumeka dufite umurambararo uri munsi ya micrometre 2.5 (PM2.5) n’udufite umurambararo uri hagati ya micrometres 2.5 na 10 (PM10).

Uduce two mu bwoko bwa PM 2.5, turimo; sulphate n’umwuka mubi wa ‘Black carbon’, dutera ingaruka zikomeye ku buzima iyo twinjiye mu bihaha cyangwa mu mugendo w’amaraso mu mubiri w’umuntu.

Ibi bitera indwara zirimo umutima, umuvuduko w’amaraso, kanseri y’ibihaha, indwara zandurira mu myanya y’ubuhumekero nk’umusonga.

Iyi raporo ivuga kandi ko abatuye Isi barenga 40 % badafite uburyo bwo guteka budahumanya ikirere n’ikoranabuhanga bakifashisha mu ngo zabo. Gutekesha amakara ni kimwe mu bihumanya ikirere mu ngo, bikaba byica abagera kuri miliyoni 3.8 ku mwaka.

Umuyobozi wa OMS, Tedros Adhanom Ghebreyesus, avuga ko ‘atari ibintu kwihanganira kuba abarenga miliyoni eshatu, biganjemo abagore n’abana birirwa bahumeka imyuka ihumanya ituruka mu byo batekesha mu ngo zabo.’

Nubwo hari intambwe imaze guterwa mu gushaka uburyo bwo gutekesha budahumanya abantu n’ikirere, muri Afurika yo munsi y’ubutayu bwa Sahara biracyari imbogamizi.

Ubushakashatsi bwakozwe n’Ikigo cy’Igihugu cyo Kubungabunga Ibidukikije mu Rwanda (REMA) bwagaragaje ko imodoka, amakara n’inkwi biri ku isonga mu guhumanya umwuka mwiza uhumekwa mu Rwanda.

Mu bice by’imijyi ahantu hegereye umuhanda, umwuka abantu bahumeka uhumanywa n’imyuka isohorwa n’ibinyabiziga mu gihe mu bice byagenewe imiturire n’iby’ibyaro, umwuka uhumanywa cyane cyane n’ikomoka mu gutwika no gucana ibikomoka ku biti nk’inkwi n’amakara.

Imwe mu ngamba yihutirwa ikaba ari ukongerwa ibikoresho bifasha abaturage guteka hadasohowe umwotsi mwinshi ariko bikagabanyirizwa ibiciro ku buryo bugaragara. Birimo Biogaz, rondereza, imirasire, ingufu zikomoka ku muyaga na gaz.

Gutekesha inkwi ni bimwe mu bihumanya umwuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza