00:00:00 IGIHE NETWORK KN KINYARWANDA EN ENGLISH FR FRANCAIS

Umujyi wa Kigali na GGGI bahuje imbaraga mu guteza imbere ibikorwa bibungabunga ibidukikije

Yanditswe na Dufitumukiza Salathiel
Kuya 31 Ukwakira 2021 saa 03:05
Yasuwe :
0 0

Umujyi wa Kigali n’Ikigo Mpuzamahanga cyita ku Bidukikije, Global Green Growth Institute (GGGI) byashyize umukono ku masezerano y’imikoranire mu guteza imbere ibikorwa bibungabunga ibidukikije.

Ni umuhango wabereye ahazwi nka “Car Free Zone” kuri uyu wa 31 Ukwakira 2021, ubwo hizihizwaga Umunsi wahariwe Imijyi ku Isi.

Bimwe mu byakozwe muri Kigali hizihizwa uyu Munsi, hatewe ibiti bike muri icyo gice cyakumiwemo ibinyabiziga, hanaterwa ibindi 100 byera imbuto ziribwa mu bice bya Biryogo ahaherutse kubakwa imihanda mishya ya kaburimbo.

Umuyobozi w’Umujyi wa Kigali, Rubingisa Pudence, yatangaje ko amasezerano y’ubufatanye na GGGI agamije gukomeza “gushyigikira gahunda yo kugira Umujyi utoshye kandi ufite ingamba zishobora guhangana n’imihindagurikire y’ibihe.”

Yagize ati “Turagira ngo tunabijyanishe na gahunda y’Igihugu y’Iterambere (NST1 2017-2024). Twihutisha iterambere ariko tunahindura ubuzima bw’abantu, babe ahantu heza kandi bahumeke umwuka mwiza.”

Rubingisa yavuze ko ibyo bizagerwaho binyuze mu kubungabunga ibidukikije nk’ ibishanga, haterwa amashyamba n’ibiti birimo iby’imbuto ziribwa, no kurwanya imyuka ihumanya ikirere.

Yakomeje ati “Ibyo dukomeza gukora ni ukugira ngo Kigali ibe ari Umujyi nyabagendwa, haba ku bawutuye n’abawugana. Ube wa Mujyi abantu bishimira kubamo, bakagira imikorere myiza ariko bakanagira ubuzima bwiza n’imyidagaduro.”

“Hagiye hashyirwaho aho kwidagadurira ariko hahujwe no kubungabunga ibidukikije. Ni ukugira ngo Umujyi wacu nawo ugire umwihariko ushobora gutuma abantu baza kuwusura kandi bakaza ari benshi, baba ab’imbere mu gihugu n’abo hanze.”

Uhagarariye GGGI mu Rwanda, Okechukwu Daniel Ogbonnaya,yavuze ko ayo masezerano yasinywe azamara imyaka itanu.

Narangira imikoranire izakomeza nk’uko yari inasanzweho mbere kuko u Rwanda ruri mu bihugu binyamuryango bya GGGI.

Okechukwu yasobanuye ko kuva icyo Kigo cyagera mu Rwanda mu 2012 , cyafatanyije na Guverinoma muri gahunda z’iterambere ry’imijyi itangiza ibidugikikije.

Ati “Amasezerano dusinye uyu munsi ni ayo kongerera ingufu ibyo twakoranaga n’Umujyi wa Kigali uhereye ku gishushanyo mbonera, iterambere rirambye kandi ridaheza, gucunga imyanda ndetse n’uburyo burambye bwo gutwara abantu n’ibintu.”

“Mu myaka tumaze dukorana twagenzuraga ko ibikorwa remezo [byubakwa] na serivisi zitangwa bitabangamira ibidukikije.Urugero, twakoranye na sosiyete ndetse na Guverinoma tureba ko haboneka amagare rusange kandi hari na gahunda yo gushyiraho inzira zigenewe abanyamaguru.”

Okechukwu yanatangaje ko mu byo GGGI iri kwitaho harimo no kugenzura ishyirwa mu bikorwa ry’igishushanyo mbonera cy’Umujyi wa Kigali, n’indi itandatu y’uturere iwunganira.

U Rwanda rwihaye intego yo kubaka iterambere ry’ubukungu butangiza ibidukikije aho imijyi igomba guterwamo ibiti, ikoreshwa ry’ingufu z’ibikomoka kuri peteroli, inkwi n’amakara bikagabanuka ndetse hagakomeza guterwa amashyamba.

Ibyo Okechukwu asanga bikomeza kugaragaza isura nziza y’Igihugu mu mboni ya buri wese ugisura ariko binateza imbere imibereho myiza.

Abayobozi bombi buhira igiti
Aha abayobozi bombi bateraga igiti ahazwi nka Car Free Zone
Ibi biti byatewe hizihizwa Umunsi Mpuzamahanga wahariwe Imijyi
Uhagarariye GGGI mu Rwanda, Okechukwu Daniel Ogbonnaya (iburyo) n'Umuyobozi w’Umujyi wa Kigali, Rubingisa Pudence (ibumoso) bashyira umukono ku masezerano
Ubwo bari bamaze gusinya amasezerano agamije guteza imbere ibidukikije
Uyu munsi hanatewe ibiti 100 byera imbuto ziribwa mu Biryogo ahaherutse kubakwa imihanda mishya ya kaburimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .