REMA yagaragaje ubukungu bwihishe mu mugano Abanyarwanda batabyaza umusaruro

Yanditswe na Philbert Girinema
Kuya 19 Nzeri 2016 saa 08:43
Yasuwe :
0 0

Ikigo cy’Igihugu gishinzwe kurengera ibidukikije, REMA, kirakangurira Abanyarwanda kugira umuco wo kwita ku mugano bakawubyaza umusaruro mu mibereho yabo ari nako bita ku bidukikije.

Ubu butumwa butanzwe kuri uyu wa 18 Nzeri, Umunsi Mpuzamahanga w’umugano nka kimwe mu bimera bibumbatiye ubukungu bw’agaciro gakomeye yaba ubuturuka ku kwita ku bidukikije, ubucuruzi n’imibereho.

Umuyobozi wa REMA, Eng.Colette Ruhamya, avuga ko umugano uhishe ubukungu bwinshi bwafasha abaturage gutera imbere no kwita ku bidukikije bityo bakabaho neza.

Yagize ati “Umugano utanga inzira z’ubukire ku mibereho no ku buzima bw’abaturage. Turashishikariza Abanyarwanda gufata umugano neza nk’inzira yo guteza imbere imibereho myiza no kwita ku bidukikije bibazanira ubuzima bwiza.”

Akangurira abikorera kuwushoramo imari bagashinga inganda ziwubyaza umusaruro.

Umugano wifashishwa mu kurwanya isuri, gukorwamo impapuro, kubakishwa, mu bukorikori, mu bugeni, uvamo ibiribwa, imiti n’ibindi.

Abahanga bemeje ko umugano ufite ubushobozi bwo kwakira umwuka mubi (Carbon) mwinshi kuruta ibindi biti byose kandi ugatanga umwuka mwiza (Oxygen) uruta uwo ikindi giti gitanga nibura ho 35%.

Umunsi mpuzamahanga w’umugano watangiye kwizihizwa kuwa 18 Nzeri 2009 mu nama ya munani yiga ku mugano yabereye i Bangkok. Kuva icyo gihe abantu batandukanye, abacuruzi bo ku Isi yose bafata uyu munsi nk’uwo kumenyekanisha ubukungu bwihishe mu mugano no gushishikariza abantu gukoresha ibikoresho biwukozemo buri munsi.

Guverinoma y’u Rwanda ibinyujije mu kigo REMA, iteza imbere umuco wo kwita ku mugano by’umwihariko ibinyujije mu kwita ku migezi no kurwanya isuri.

Mu Rwanda nibura hegitari 4 381 bingana na 1.82% by’ubuso buteyeho amashyamba, ziteyeho imigano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244