00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yaganiriye n’Umuyobozi wa Eni ku ikoreshwa ry’ingufu zitangiza ikirere

Yanditswe na Ferdinand Maniraguha
Kuya 4 Ugushyingo 2021 saa 07:31
Yasuwe :
0 0

Perezida Paul Kagame kuri uyu wa Kane yakiriye mu biro bye itsinda riyobowe n’Umuyobozi Mukuru wa Eni, Claudio Descalzi, baganira ku bufatanye mu guteza imbere ikoreshwa ry’ingufu zisubira.

Eni ni sosiyete yo mu Butaliyani izobereye mu gutunganya ibikomoka kuri peteroli, gaz n’ibindi. Iyi sosiyete ni imwe muri zirindwi zitunganya ibikomoka kuri peteroli zikomeye ku Isi aho ifite umutungo wa miliyari 36 z’amadolari, igakorera mu bihugu 66.

Perezida Kagame n’itsinda riyobowe na Claudio Descalzi, baganiriye ku ngingo zirimo ubufatanye mu bijyanye n’ikoreshwa ry’ingufu zisubira, hagabanywa ikoreshwa ry’ingufu zohereza imyotsi yangiza ikirere.

Ubutumwa bwanyujijwe ku rukuta rw’Ibiro by’Umukuru w’Igihugu, Village Urugwiro, buvuga ko ibiganiro byagarutse ku bufatanye mu rwego rw’akarere.

U Rwanda ni rumwe mu bihugu byiyemeje kurengera ibidukikije no guhashya imihindagurikire y’ibihe, rugabanya imyuka yangiza ikirere ituruka mu ikoreshwa ry’ibinyabiziga kubera ibikomoka kuri peteroli, hatezwa imbere ikoreshwa ry’ingufu zisubira.

Igihugu gifite intego yo kugabanya umwuka wangiza ikirere ku kigero cya 38% kugera mu 2030 no kuwugabanya burundu bitarenze mu 2050.

Bizagerwaho binyuze mu bikorwa birimo kugabanya imodoka zikoresha mazutu na lisansi, hakibandwa ku zikoresha amashanyarazi n’izindi ngufu zitangiza ikirere, ibyo bikajyana no gutera ibiti, gufasha abaturage kureka gukoresha inkwi mu guteka n’izindi ngamba zitandukanye.

Eni nayo ifite intego yo kuba mu 2050 itazaba igitunganya ibikomoka kuri peteroli byangiza ikirere. Guhera mu 2025, iyi sosiyete yatangaje ko izatangira gutunganya ingufu zisubira.

Perezida Kagame na Claudio Descalzi biyemeje gukomeza gukorana bya hafi kugira ngo hagabanywe imyuka yangiza ikirere ikomoka ku ikoreshwa ry'ibikomoka kuri peteroli
Perezida Kagame n'itsinda riyobowe na Claudio Descalzi baganiriye ku bufatanye mu guteza imbere ikoreshwa ry'ingufu zisubira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .