Mu Rwanda hagiye gutangizwa banki itera inkunga imishinga y’ibidukikije

Yanditswe na IGIHE
Kuya 5 Mutarama 2020 saa 10:19
Yasuwe :
0 0

Mu Rwanda mu gihe kiri imbere hazatangizwa banki itera inkunga imishinga igamije kurengera ibidukikije, aho yitezweho kongera amafaranga yashorwaga mu mishinga igamije kurengera ibidukikije mu gihugu.

Amakuru ajyanye n’itangizwa ry’iyi banki mu Rwanda yatangarijwe mu kiganiro cyatangangiwe mu nama ya Cop 25 iherutse kubera muri Espagne mu mpera z’umwaka ushize kireba uruhare rwa banki zigamije guteza imbere ibidukikije mu gutuma ibihugu bigera ku ntego zabyo.

Muri iyo nama niho hatangarijwe ko u Rwanda ruzashyiraho banki igamije gushyigikira imishinga igamije kurengera ibidukikije, “Rwanda Catalytic Green investment bank”.

Uru rwego rw’imari ruzafasha mu gukangurira ibigo byigenga gushyigikira ishyirwa mu bikorwa ry’imishinga itangiza ibidukikije mu gihugu.

Umuyobozi ushinzwe ibijyanye n’imihindagurikire y’ikirere muri Banki Nyafurika itsura Amajyambere (AfDB), Anthony Nyon, yatangaje ko hakenewe ingamba zihamye mu guhanga ikoranabuhanga rishya rigamije guhangana n’ibibazo by’imihindagurikire y’ibihe.

Ati “Ku bw’iyo mpamvu, Banki Nyafurika itsura Amajyambere, binyuze mu bufasha bw’ikigega kigamije kurengera ibidukikije, iri gukorana n’ihuriro rya banki zigamije kurengera ibidukikije mu kureba uburyo butandukanye bwo gushyira igishoro mu bikorwa bifasha kurengera ibidukikije ku rwego rwo hasi, ari nako tuzamura uruhare rw’abikorera.”

Kubera ibibazo by’imihindagurikire y’ibihe, nibura abahinzi bo mu Rwanda batakaza 40% by’umusaruro wabo. Leta yashyizeho ikigega Fonerwa cyahawe inshingano zo gufasha u Rwanda kugera ku bukungu butangiza ibidukikije binyuze mu gutera inkunga imishinga ya Leta n’abikorera iri muri uyu murongo.

Kuva iki kigega cyashingwa, hahanzwe imirimo 138000 itangiza ibidukikije. Mu 2017, habarurwaga ko ubutaka bungana na hegitari 21 847 bwatunganyijwe hagamijwe kwirinda ko butwarwa n’isuri ndetse hegitari 12,998 z’inkombe n’imigezi n’ibiyaga zarasubiranyijwe ndetse imiryango ifashwa 17 449 kubona ingufu zidakomoka ku ngomero z’amashanyarazi.

Icyo gihe FONERWA yari imaze gutanga inkunga ya miliyoni 100 z’amadorali, iyi nkunga ikaba ihabwa imishinga yatsinze binyuze mu marushanwa.

Mu nama ya COP 25 iherutse kubera muri Espagne niho hatangarijwe ibijyanye n’itangizwa rya Banki irengera ibidukikije mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza