00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Intebe Dr Ngirente yasangije amahanga umuhigo w’u Rwanda mu guhangana n’imihindagurikire y’ibihe

Yanditswe na Mukahirwa Diane
Kuya 3 Ugushyingo 2021 saa 04:26
Yasuwe :
0 0

Minisitiri w’Intebe, Dr Edouard Ngirente, yagaragarije abitabiriye Inama ihuje abakuru b’Ibihugu na za Guverinoma yiga ku Mihindagurikire y’Ibihe, ingamba n’aho u Rwanda ruhagaze mu guhangana n’iki kibazo.

Ibi yabigarutseho ku wa Kabiri, tariki ya 2 Ugishyingo 2021, mu Nama ya COP26 izamara iminsi 12 iteraniye i Glasgow muri Ecosse, yiga ku hazaza h’Isi mu guhangana n’imihindagurikire y’ibihe.

U Rwanda kimwe n’ibindi bihugu bigize Isi muri rusange byahuye n’ingaruka zituruka ku mihindagurikire y’ibihe zirimo imyuzure, imiyaga ikomeye n’inkongi z’umuriro zibasira amashyamba.

Minisitiri w’Intebe Dr Ngirente yagaragaje ko u Rwanda narwo rwatangiye kugerwaho n’izi ngaruka ndetse zashyize n’ubuzima bw’abantu mu kaga.

Yagize ati “U Rwanda rumaze guhura n’ingaruka zituruka ku mihindagukire y’ibihe nk’imyuzure, izuba ryinshi n’inkangu byangije ubuzima bw’abantu n’ibyabo.”

Nubwo izi ngaruka zihari ariko yagaragaje ko u Rwanda rutatereye agati mu ryinyo ahubwo hari ibiri gukorwa mu guhangana n’iki kibazo ndetse n’ibyo ruteganya gukora mu bihe biri imbere.

Yavuze ko kimwe mu bizakorwa ari ukugabanya imyuka yangiza ikirere yoherezwa mu kirere.

Yagize ati “U Rwanda rwiyemeje kugabanya 38% by’imyuka ihumanya ikirere mu myaka 10 iri imbere, ku buryo mu 2050 iyi myuka izaba itacyoherezwa mu kirere.”

Yagaragaje ko kugira ngo ubushyuhe bugabanukeho 1,5° bizasaba ko imyuka yoherezwa mu kirere izagabanukaho 45%.

Yasobanuye ko hazashyirwa imbaraga mu kugabanya ibibazo birimo ubushyuhe bukabije, kugabanya imyuka ihumanya ikirere ndetse no kubahiriza amasezerano mpuzamahanga yo kubungabunga ikirere.

Mu biri gukorwa ni uko hashyizwe imbaraga mu mikoranire n’ibihugu n’imiryango mu kugenzura ko ingamba zashyizweho zishobora kugerwaho kandi bigatanga umusanzu ufatika ku rwego rw’Isi.

Ibi bishimangira ko u Rwanda rutanga ubufasha bwarwo bwose mu mikoranire idaheza kandi inyuze mu mucyo, mu guhuza imbaraga no mu biganiro hagati yarwo n’abafatanyabikorwa bo hirya no hino ku Isi.

Minisitiri w’Intebe Dr Ngirente yavuze ko usanga abatuye Isi badaha agaciro ibitera imihindagurikire y’ibihe ariko hakwiye kugira igikorwa byihuse mu guhangana n’iki kibazo.

Yaboneyeho umwanya wo gushimira ibihugu byasinye amasezerano ya Kigali ashishikariza n’ibindi kuyasinya ndetse no kubahiriza amasezerano y’i Paris nka bimwe mu bizafasha mu guhangana n’mihindagurikire y’ibihe.

Yagize ati “Mbonereho gushimira buri gihugu cyasinye amasezerano ya Kigali yo kuvugurura aya Montreal nanashishikariza ibisigaye kubigenza gutyo. Nibishyirwa mu bikorwa bizagabanya ubushyuhe bungana na degree 0,4° mu mpera z’ikinyejana.”

Yakomeje ati “Reka tugumisheho 1,5 °, twihutisha ibikorwa bifite intego, twongera imari ishyirwaho hanyuma twuzuze ibyo twiyemeje i Paris ku buryo hatabaho gutinda mu bikorwa byo guhangana n’imihindagurikire y’ikirere. Iki ni cyo gihe cyo kwishyira hamwe ngo twiyumvishe agaciro k’amasezerano y’i Paris.”

U Rwanda rufite ingamba zo kugabanya umwuka wangiza ikirere ku kigero cya 38% kugera mu 2030, biteganyijwe ko ruzakenera miliyari 11$.

Minisitiri w’Intebe Dr Ngirente Edouard yasangije amahanga umuhigo w’u Rwanda mu guhangana n’imihindagurikire y’ibihe
Minisitiri w’Intebe Dr Ngirente ahagarariye Perezida Kagame muri iyi nama
Minisitiri w’Intebe Dr Ngirente yavuze ko u Rwanda rwiyemeje kugabanya 38% by’imyuka ihumanya ikirere mu myaka 10 iri imbere
Iyi nama yahuriyemo abakuru b’Ibihugu na za Guverinoma aho bari kwiga ku Mihindagurikire y’Ibihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .