00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Intebe Dr Ngirente yagaragaje uruhare rw’amahanga mu guhangana n’imihindagurikire y’ibihe

Yanditswe na Dufitumukiza Salathiel
Kuya 2 Ugushyingo 2021 saa 03:12
Yasuwe :
0 0

Dr Ngirente yagaragaje inkunga y’amahanga nk’ubushobozi bukene ku bihugu biri mu nzira y’amajyambere mu guhangana n’imihindagurikire y’ibihe.

Minisitiri w’Intebe w’u Rwanda,Dr Ngirente Edouard, yagaragaje ko ibihugu bikiri mu nzira y’amajyambere bitazabasha kugera ku ntego byihaye zo guhangana n’imihindagurikire y’ikirere hatabayeho inkunga y’amahanga.

Yabivugiye mu Nama ya COP26 izamara iminsi 12 iteraniye i Glasgow muri Ecosse, yiga ku hazaza h’Isi mu guhangana n’imihindagurikire y’ibihe.

Ni Inama iteranye mu gihe hirya no hino ku Isi hakomeje kugaragara ingaruka z’imihindagurikire y’ibihe irimo imyuzure, imiyaga ikomeye n’inkongi z’umuriro zibasira amashyamba.

Byose bihitana ubuzima bw’abantu n’inyamaswa bikanangira ibirimo ibikorwa remezo.

Hari kandi ubushyuhe bukabije buva ku iyangirika ry’akayunguruzo k’izuba, riterwa n’imyuka ihumanya ikirere ikomeje kwiyongera.

Dr Ngirente yabwiye abayobozi b’ibihugu na za guverinoma babarirwa mu 120 bitabiriye, ko u Rwanda rukomeje gukora iyo bwabaga ruhangana n’imihindagurikire y’ibihe.

Ati “U Rwanda kimwe n’ibindi bihugu bikiri mu nzira y’amajyambere ruracyahura n’ingaruka zikomeye z’imihindagurikire y’ibihe. Kwisanisha n’icyo kibazo ni ingenzi ku bihugu bigerwaho n’ingaruka z’imihindagurikire y’ibihe ndetse n’iz’ubushyuhe bukabije mu Isi.”

Yongeyeho ko rukomeje guhangana n’ibyo bibazo rukoresheje ubushobozi buva imbere mu gihugu n’ahandi, ashimangira ko “uko byagenda kose nta gihugu kiri mu nzira y’amajyambere kizashobora kugera ku ntego zacyo [mu guhangana n’imihindagurikire y’ibihe] kidakeneye inkunga y’amahanga.”

Kugira ngo intego ibihugu byihaye zo guhangana n’icyo kibazo zizagerweho, ibyateye imbere byiyemeje kuzaha ibikiri mu nzira y’amajyambere miliyari 100$.

Bizakorwa hagabanywa imyuka ihumanya ikirere ituruka mu nganda, ikoreshwa ry’ibikomoka kuri peteroli, icanwa ry’inkwi, amakara na gaz ndetse n’ibindi byose bishobora kongera umwuka wa dioxyde de carbone mu kirere.

Minisitiri w’Ibidukikije, Dr Mujawamariya Jeanne d’Arc na we uri mu bitabiriye, yabwiye Radio Rwanda ko muri izo miliyari 100$ hamaze gutangwa 79,6% ndetse n’andi asigaye azaba yamaze gutangwa mu 2023.

Dr Mujawamariya uri mu bagize ihuriro riri mu biganiro bigamije gutuma ibihugu byose byemeranya ku gihe nyacyo bigomba kuba byageze ku ntego byihaye mu bijyanye no kugabanya umwuka wangiza ikirere, yavuze ko mu bice bimwe by’u Rwanda hagaragaye izuba ryinshi ahandi hakagwa imvura nyinshi kubera ingaruka z’icyo kibazo.

Ni mu gihe ahandi ku Isi habaye imyuzure n’imiyaga idasanzwe kimwe n’ubushyuhe bwinshi bwateje inkongi z’umuriro amashyamba agashya.

Yakomeje agira ati “Ingaruka zitugeraho mu buryo butandukanye ariko cyane cyane ibihugu bikiri mu nzira y’amajyambere nka biriya by’Ibirwa. Hatagize igikorwa, bimwe muri biriya bihugu by’ibirwa bizarengerwa n’amazi cyangwa bishye birangire bive ku ikarita y’Isi.”

U Rwanda rufite intego yo kuzagabanya umwuka wangiza ikirere ku kigero cya 38% kugera mu 2030, urugendo ruzasaba miliyari 11$. Miliyari 4,55$ ni zo zizava imbere mu gihugu naho 6,885$ zizaturuka mu mahanga.

Dr Ngirente Edouard yagaragaje inkunga y’amahanga nk’ubushobozi bw’ibihugu biri mu nzira y’amajyambere mu guhangana n’imihindagurikire y’ibihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .