Minisitiri Mujawamariya yibukije abangiza ibidukikije ko nta yindi si bafite yo kuzaturaho

Yanditswe na Habimana James
Kuya 20 Ugushyingo 2019 saa 07:16
Yasuwe :
0 0

Minisitiri w’Ibidukikije, Dr Jeanne d’Arc Mujawamariya, yibukije ko abangiza ibidukikije bagomba kujya bazirikana ko Isi batuyeho ari imwe ko nta handi bafite bazerekeza, bityo bagomba kuyibungabunga uko byagenda kose.

Ibi yabigarutseho kuri uyu wa Kabiri tariki 19 Ugushyingo 2019, ubwo iyi Minisiteri yahuraga n’abafatanyabikorwabayo harebwa uko bakomeza kunoza ubufatanya mu kurengera ibidukikije.

Iyangirika ry’amashamba, imyuka ihumanya ikirere iva mu nganda no mu binyabiziga, ndetse n’ibindi bikorwa bitandukanye bya muntu, ni bimwe mu biza ku isonga mu gukomeza kwangiza ibidukikije hirya no hino ku Isi.

Minisitiri Mujawamariya avuga ko iyi nama iba igamije guhuza abafatanyabikorwa mu bikorwa bitandukanye barimo abakora mu by’amashyamba, ubutaka n’abandi, intego ari ugukokomeza kugira igihugu cyiza.

Ati “Dukeneye kubungabunga ibidukije ariko n’igihugu gikeneye amajyambere byaba mu bucuruzi bw’amabuye y’agaciro n’ahandi, icyo dusaba abafatanyabikorwa ni ugukomeza mu nzira turimo nk’u Rwanda dukomeza guteza imbere ibidukikije, kandi dukomeza kugira igihugu kirangwamo n’ibidukikije byitaweho kuva ku mwana kugera ku mu kambwe.”

Ati “Iyi si dutuyeho niyo yonyine dufite aho gutura, tugomba rero kuyirinda kubera ko nta handi dufite dutura ni aha gusa, buri wese uko yaba angana kose akwiye kumva ko ari inshingano ze zo kubungabunga ibidukikije.”

Umuyobozi w’Ikigo gishinzwe kubungabunga ibidukikije, Eng. Coletha Ruhamya, yavuze ko hakiri imbogamizi mu kubungabunga ibidukikije zirimo ingengo y’imari igenerwa uru rwego, kudahuza ibikorwa mu nzego ndetse n’ishoramari ridahagije mu kurinda ibidukikije.

Agira ati "Usanga ingengo y’imari leta yakoresheje yose, 2,9% ni yo yagiye mu bintu birengera ibidukikije, ibyo byose rero turashaka kureba ukuntu izo nzego zindi zibishyira muri gahunda yazo.’’

Minisitiri Dr Mujawamariya yahamagariye buri wese kubungabunga ibidukikije
Abafatanyabikorwa batandukanye bitabiriye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza