Miliyoni 12 z’amadolari zigiye gushorwa mu mushinga wo kwita ku bidukikije i Gicumbi

Yanditswe na Twarabanye Venuste
Kuya 10 Ugushyingo 2019 saa 05:49
Yasuwe :
0 0

Umunyamabanga Nshingwabikorwa w’Akarere ka Gicumbi, Epimaque Mpayimana yatangaje ko umushinga wo kwita ku bidukikije ugiye gukorera muri ako Karere, mu by’ibanze uzabafasha harimo kurwanya isuri, no guca amaterasi ku misozi ihanamye mu rwego rwo kongera butaka buhingwa.

Umushinga wiswe uwa Gicumbi (Green Gicumbi Project), uzamara imyaka itandatu uhereye mu Ukwakira 2019, ukora ibikorwa byo kwita ku bidukikije mu Karere ka Gicumbi.

Arenga miliyoni $ 12.5 muri miliyoni $ 32 azakoreshwa muri uwo mushinga wose, azajya mu bikorwa byo kubungabunga ibishanga, inkengero z’imigezi n’ibindi bikorwa byerekeye ubuhinzi.

Umunyamabanga Nshingwabikorwa w’Akarere ka Gicumbi, Epimaque Mpayimana avuga ko kubera imiterere y’ako Karere, imvura igira ingaruka zikomeye ku buhinzi kubera imisozi itarwanyijeho isuri.

Ati “Twe tugira umwihariko kuko ari imisozi miremire, iyo ahantu rero hari imisozi miremire cyane cyane itarwanyijeho isuri, duhura n’imyuzure, isuri, imihanda ikangirika, ibiraro bigacika n’amazi menshi ingaruka mu by’ukuri ni nyinshi ugereranyije no mu tundi turere, imyaka kumanurwa n’isuri, abaturage bagahinga ariko bamara gutera isuri ikaza ikabitwara.”

Avuga ko mu by’ibanze uwo mushinga uzabafasha ari ugutunganya imisozi ihanamye. Agira ati “Mu buryo bw’ikubitiro azabanza kujya, kudufasha gutunganya imisozi ihanamye, ni ukuvuga ngo iyo utunganyije iyo misozi, ya mirima yo mu bishanga yajyaga itwikirwa n’isuri uba ukoze ku buryo itakwangirika. ibihinzwemo uba ufite icyizere kuko uko wahinze ushobora kweza nta suri ibitwaye.”

Ni umushinga ashimangira ko uziye igihe kuburyo n’abaturage bitezweho kugaragaza ubufatanye mu bikorwa byawo.

Mu mwaka w’ingengo y’imari ushize Akarere ka Gicumbi kabashije gutunganya Hegitari 2,000 z’amaterasi y’indinganire. Icyakora n’ubundi kugeza ubu ngo hari imisozi itarakorerwaho ubuhinzi kubera imiterere yayo.

Amaterasi namara kugera kuri iyo misozi bizaba byongereye ubutaka buhingwa n’umusaruro uva mu buhinzi ukaziyongere. nkuko Mpayimana abisobanura, agira ati “Ni ukuvuga ngo rero tubonye izindi hegitari ziyongera zirwanyijeho isuri ziriho amaterasi y’indinganire mu byukuri kiba ari igisubizo kirambye ku baturage bacu kubera ko ubutaka bwo guhinga buba bwiyongeye. Hari ahantu imisozi ihanamye kuburyo udashobora gukoreraho imirimo y’ubuhinzi ubu ngubu. Iyo ukoze amaterasi uba wongeye ubuso buhingwa kandi kongera ubuso buhingwa bisobanuye ko uba wongereye umusaruro.

Imibare y’ikigo cy’ibarurishamibare mu Rwanda yerekena ko mu Karere ka Gicumbi, amaterasi ari ku buso bungana na hegitari 8,653.5 naho ubutaka burwanyijeho isuri muri rusange bungana na 88.2%.

Uyu mushinga wanyujijwe mu kigega cyita ku bidukikije n’imihindagurikire y’ibihe mu Rwanda (Fonerwa).

Umuyobozi w’icyo kigega Hubert Ruzibiza, avuga ko uzita no ku bindi bikorwa bireba imibereho y’abatuye Gicumbi ndetse no gutera ibiti. Ikindi kandi ukazafatwa nk’icyitegererezo cyo kwigiraho kuburyo wazakomereza mu tundi turere tw’igihugu.

Ati “Uyu mushinga wa Gicumbi dufatanyije n’ikigega cy’Isi cyita ku bidukikije, twafatanyije gushyira amafaranga muri Gicumbi tumaze kubona ibibazo yanyuzemo cyane cyane ku bireba ibidukikije […] dushaka kuzamura ubuzima bw’abaturage no kureba babaho muri rusange no gutera ibiti, iki ni icyiciro cya mbere tuzayifata nk’icyitegererezo cyo gutuma ukomereza mu tundi duce tw’u Rwanda.”

Imibare y’ikigo cy’ibarurishamibare mu Rwanda y’igihembwe cy’ihinga cya 2019-B yerekana mu buryo bwo kurwanya isuri, Gicumbi yari ifite amaterasi y’indinganire ku kigero cya 32.1% y’ubutaka bwahinzwe muri icyo gihembwe, 0.6% ahateye ibiti, n’imiringoti kuri 0.2%.

Mu buhinzi akarere ka Gicumbi kibanda ku bishyimbo bishingirirwa, ingano, ibirayi, ibigori n’imyumbati ku butaka buhujwe burenga hegitari 32,164. Bahinga kawa ku buso bungana na hegitari 601,7 n’icyayi ku buso bungana na hegitari 1678,2.

Gicumbi ni kamwe mu turere turangwa n'imisozi miremire, bisaba ko hakorwa amaterasi y'indinganire ngo ubutaka budatwarwa n'isuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza