Kigali: Hatangijwe kubungabunga ibidukikije bihereye mu bakiri bato

Yanditswe na Evariste Nsengimana
Kuya 6 Gashyantare 2017 saa 03:07
Yasuwe :
2 0

Mu rwego rwo gushyira mu bikorwa gahunda ya Leta yo kubungabunga ibidukikije, mu Mujyi wa Kigali hatangijwe ku mugaragaro igikorwa cyo gutoza abana gutera no kwita ku biti bakiri bato binyuze muri gahunda ya “Little Hands Go Green”, biteganyijwe ko kizagera no mu gihugu hose.

Iyi gahunda yatangirijwe mu Mudugudu Vision City, mu Kagari ka Gacuriro, mu Murenge wa Kinyinya ku wa 4 Gashyantare 2017. Yateguwe na Sosiyete ishinzwe gukurikirana ibikorwa byo kubaka umudugudu wa Vision City, UDL Ltd, ku bufatanye n’Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB), Ikigo cy’Igihugu gifasha ibikorwa byo kurinda Ibidukikije ndetse n’Imihindagurikire y’Ikirere (FONERWA), Ikigo cy’Igihugu gishinzwe kubungabunga ibidukikije (REMA) na My Kid Is A Superstar ikora ubukangurambaga bwo gushishikariza abana kubungabunga ibidukikije muri Uganda.

Muri iki gikorwa abana barenga 500 baturutse mu bice bitandukanye n’ababyeyi babo bateye ibiti bisaga 300 birimo iby’imbuto z’amacunga, imyembe, indimu n’amapera mu busitani bw’izi nyubako.

Little Hands Go Green igamije gutoza umwana gukurana umuco wo kubungabunga ibidukikije no guhangana n’ingaruka z’ihindagurika ry’ibihe.

Iyi gahunda isanzwe ikorwa muri Uganda, ku ikubitiro mu Rwanda yatangirijwe mu Mujyi wa Kigali ndetse bikaba biteganyijwe ko izakomereza n’ahandi mu gihugu. Izajya ikorwa n’abana bari munsi y’imyaka 13 gusa, bigishwa ibyiza byo kuba ku mu gihugu kitarangwamo imyuka ihumanye.

Umuyobozi Mukuru wa REMA, Eng. Coletha Ruhamya yavuze ko umwana atozwa icyo azaba akiri muto kandi ko aba ashobora kubikangurira bagenzi be n’ababyeyi.

Yagize ati “Iyo urera umwana ubitangira akiri muto. Murabizi guhindura ukuze biragoye ariko umwana akuze azi akamaro k’igiti n’inyungu, yabibwira abandi bigana, abarimu ndetse n’ababyeyi.”

Yakomeje avuga ko iyi gahunda ari imwe muyo kugira umujyi mwiza ufite amahumbezi n’umwuka mwiza utangwa n’ibiti bishobora no gutanga umusaruro w’imbuto ziribwa zikarwanya n’ibibazo by’imirire mibi.

Ruhamya avuga ko mu gihe mu Rwanda habarirwa abana barenga miliyoni eshanu, buri wese aramutse agize uruhare mu gutera igiti kimwe mu mezi 12, mu myaka 20 iri imbere u Rwanda rwaba rufite ibigera kuri miliyoni 100, byafasha mu kubungabunga ibidukikije.

Umuyobozi wa sosiyete ishinzwe gukurikirana ibikorwa byo kubaka umudugudu wa Vision City, Liliane Uwanziga Mupende, avuga kwigisha umwana gutera igiti ari ugutekereza ejo hazaza.

Yagize ati “Tuba tuganisha gutegura umudugudu w’icyitegererezo. Kubaka inzu idafite ibiti nta kamaro byaba bifite. Iyo urebye abakuze, ejo hazaza ntabwo tuzaba duhari, abana nibo bazaba bahari niyo mpamvu twabatekerejeho. Kubigisha kubungabunga ibidukikije ni ngombwa. Uburyo bwo kubibigisha ni ugutera igiti.”

Ibiti bifite akamaro kenshi harimo gukurura imvura, gutanga umwuka mwiza, guhangana n’ingaruka z’ihindagurika ry’ibihe no gutanga imbuto abana bashobora kurya.

Umudugudu watewemo ibiti ugizwe n’inzu zigezweho zisaga 500, muri zo ihendutse ni iy’amadorali ya Amerika ibihumbi 179 ( akabakaba miliyoni 147 mu mafaranga y’u Rwanda), naho inzu ihenze ikagurwa ibihumbi 560 by’amadorali ya Amerika, (akabakaba miliyoni 460 z’amafaranga y’u Rwanda).

Uwanziga atangaza ko muri uyu mudugudu biteganyijwe ko uzakira abantu ibihumbi 22 numara kuzura wose, inyubako ziwurimo zimaze kugurwa ku gipimo cya 20%.

Umuyobozi w'Ikigo cy’Igihugu gishinzwe kubungabunga ibidukikije (REMA), Eng. Coletha Ruhamya yifatanyije n'abana mu gikorwa cyo gutera ibiti
Umwe mu bana atera igiti
Umuyobozi Mukuru wa REMA, Eng. Coletha Ruhamya aganira n'itangazamakuru
Umuyobozi wa Sosiyete ishinzwe gukurikirana ibikorwa byo kubaka umudugudu wa Vision City, Liliane Uwanziga Mupende, avuga kwigisha umwana gutera igiti bifasha mu rugamba rwo kubungabunga ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza