00:00:00 IGIHE NETWORK KN KINYARWANDA EN ENGLISH FR FRANCAIS

Imyuka ihumanya ikirere yongeye kubadukana ingoga nyuma y’agahenge ka COVID-19

Yanditswe na Zigiranyirazo Bajecteur
Kuya 4 Ugushyingo 2021 saa 12:25
Yasuwe :
0 0

Abashakashatsi ku mihindagurikire y’ibihe batunguwe n’ubwiyongere bukabije bw’imyuka ihumanya ikirere nyuma y’igihe gito COVID-19 itangiye kugenza make ku buryo ishobora no kugera ku rwego yariho mbere y’uko icyorezo cya Coronavirus cyaduka mu mpera za 2019.

Umwaka ushize imyuka ihumanya ikirere yari yagabanutse ku rugero rwa 5,4% bitewe n’uko umurindi wa COVID-19 wasunikiraga ibihugu byinshi muri gahunda ya Guma mu Rugo.

Abashakashatsi bagaragaza ko muri uyu mwaka iyo myuka iziyongera ku rugero rwa 4.9%, impamvu igabanya icyizere cyo kuba abatuye Isi bazashobora kugabanya izamuka ry’ubushyuhe ku Isi nibura dogere Celsius 1.5 nk’uko binakomeje kwigirwa mu nama izwi nka COP26 yiga ku mihindagurikire y’ibihe iri kubera Glasgow.

Muri iki cyumweru iyi nama yasinyiwemo amasezerano agamije kugabanya imyuka ihumanya ikirere no gukumira itemwa ry’amashyamba no kongera ubuso agomba kuba ariho, icyakora muri uyu mwaka imyuka ihumanya ikirere ikomoka ku bicanwa iziyongera ugereranyije n’uko yari yagabanutse mu mwaka ushize nubwo iterwa n’ibikomoka kuri peteroli yo izaguma ku rwego yari iriho mbere ya 2019.

Raporo ya 16 ya Global Carbon Budget yagaragaje ko niba nta gikozwe, mu 2030 ubushyuhe bw’Isi buzaba bwamaze kwiyongeraho dogere Celsius 1.5 mu gihe ibihugu byagiye byiha intego z’igihe gitandukanye yo kuba byagabanyije iyo myuka aho nk’u Rwanda rwihaye mu 2050, u Bushinwa bukiha iyo mu 2060 mu gihe ibindi bihugu ari mu 2040 cyangwa se mbere na nyuma yaho.

Mu 2020 imyuka ihumanya ikirere yagabanutseho toni zigera kuri miliyari 1.9 ariko ibi bikaba byarashobotse kubera ahantu hatandukanye ku Isi bari muri gahunda ya Guma mu Rugo bigatuma imirimo ya muntu isanzwe ishyirwa ku isonga mu bitiza umurindi ihumana ry’ikirere, ihagarara bityo iyo myuka yoherezwaga mu kirere ikabasha kugabanuka ku rugero nk’urwo.

Byitezwe ko inama ya COP26 iri kubera i Glasgow izavugutira umuti iki kibazo cy’imihindagurikire y’ibihe ndetse imyanzuro igashyirwa mu bikorwa.

Imyuka ihumanya ikirere yongeye kuba myinshi nyuma y'igabanuka ryabaye mu bihe bya Guma mu Rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .