00:00:00 IGIHE NETWORK KN KINYARWANDA EN ENGLISH FR FRANCAIS

Imiryango ibihumbi 11 imaze guhabwa imbabura zirondereza ibicanwa ku Mayaga

Yanditswe na Prudence Kwizera
Kuya 2 Ugushyingo 2021 saa 11:26
Yasuwe :
0 0

Ikigo cy’Igihugu cyo kubungabunga ibidukikije (REMA) kibinyujije mu mushinga wacyo wo gusubiranya igice cy’Amayaga “Forest Landscape Restoration in the Amayaga Region (Green Amayaga) Project, kimaze gutanga imbabura ibihumbi 11 ku bagenerwabikorwa b’uwo mushinga mu turere ukoreramo.

Izo mbabura zirondereza ibicanwa zikanagabanya imyuka ihumanye yoherezwa mu kirere, ziri gutangwa mu rwego rwo gushyira mu bikorwa intego z’umushinga Green Amayaga wo gusubiranya igice cy’Amayaga.

Uwo mushinga w’imyaka itandatu watangijwe mu 2020 uzakorera mu Turere twa Kamonyi, Ruhango, Nyanza na Gisagara two mu Ntara y’Amajyepfo.

Umuhuzabikorwa w’Umushinga Green Amayaga, Nkurunziza Philbert, yavuze ko mu mwaka umwe bamaze batangiye, hari ibyakozwe birimo gutera ibiti bivangwa n’imyaka.

Ati “Mu kubungabunga ibidukikije twateye ibiti bivangwa n’imyaka bigera kuri miliyoni imwe n’ibihumbi 400 ariko hakabaho no gutera amashyamba tubungabunga imisozi.”

Yavuze ko bateye n’ibiti ku mihanda no ku migezi hagamijwe kubibungabunga.

Mu rwego rwo kufasha abaturage kubona ibicanwa no kugabanya imyuka ihumanya ikirere, bahawe Imbabura za rondereza.

Ati “Ubu tumaze guha imiryango cyangwa ingo zigera ku bihumbi 11 imbabura za rondereza. Ibyo bijyanirana no guha abaturage ubumenyi butandukanye bujyanye no kubungabunga amashyamba ndetse n’imihingire ari byo byose bizazamura umusaruro w’abaturage n’imibereho yabo.”

Bamwe mu baturage bahawe Imbabura za rondereza bavuga ko byagabanije ingano y’ibicanwa bakoreshaga, kandi ko amayaga yatangiye kongera gutoha kuko bari kubifatanya no kongera gutera ibiti.

Iyakaremye Fortunée wo mu Karere ka Kamonyi avuga ko batarahabwa rondereza bagorwaga no kubona inkwi.

Ati “Bampaye Imbabura ya rondereza yitwa Songa kandi itwara inkwi nkeya kuko iyo ufite agakwi gato ugacagaguramo ingeri ukazishyira mu ziko, iyo zimaze gufatwa neza rya shyiga rirashyuha ibiryo bigashya vuba.

Yatanze urugero ku nkwi, aho izo yakoreshaga ku munsi umwe agiteka ku mashyiga asanzwe azikoresha iminsi itanu ku mashyiga ya rondereza.

Ikindi ashima ku mashyiga ya rondereza ni uko adatumura ivu n’imyotsi nk’uko bimera ku mashyiga asanzwe.

Bamwe mu baturage batuye mu gice cy’Amayaga bataragezwaho n’imbabura za rondereza nabo bifuza ko bafashwa kuzibona kuko bamenye ibyiza byazo.

Uwera Shadia ati “Icyifuzo dufite ni uko tubona abandi bageze ku iterambere rya rondereza natwe tukaba tuzifuza kuko kubina ibicanwa biratugora. Ubu ubona inkwi bisaba kujya gutashya kandi nta mashyamba ahari, bisaba kujya gutoragura ibiti by’imyumbati bakuye akaba ari byo twanika byakuma tukabicana.”

Mu turere twose uko ari tune umushinga ukoreramo hazatangwa Imbabura 60,000 mu gihe cy’imyaka itandatu uzamara.

Biteganyijwe ko izo mbabura mu gihe cy’imyaka itandatu zizagira uruhare mu kugabanya toni hafi miliyoni eshanu z’imyuka ihumanye yoherezwa mu kirere, ikigo REMA kikagaragaza ko mu myaka 20, izo mbabura zizaba zigabanyije toni zisaga miliyoni 15 z’imyuka ihumanye yoherezwa mu kirere.

Mu turere twose uko ari tune umushinga ukoreramo hazatangwa Imbabura 60,000 mu gihe cy’imyaka itandatu uzamara
Bamwe mu baturage bahawe Imbabura za rondereza bavuga ko byagabanije ingano y’ibicanwa bakoreshaga kandi ko amayaga yatangiye kongera gutoha kuko bari kubifatanya no kongera gutera ibiti
Abahawe imbabura biyemeje kuzabyaza umusaruro igihe kinini bamaraga bashaka ibicanwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .