00:00:00 IGIHE NETWORK KN KINYARWANDA EN ENGLISH FR FRANCAIS

Iminsi imvura yagwagaho mu Rwanda yagabanutseho 45

Yanditswe na Muhonzire Sylvine
Kuya 13 Kanama 2021 saa 12:44
Yasuwe :
0 0

Inzobere mu bijyanye n’imihindagurikire y’ikirere ndetse n’ibidukikije zagaragaje ko iminsi u Rwanda rwagushagaho imvura yagabanutse, hagati ya 35 na 45 kubera ubwiyongere bw’ubushyuhe ku Isi buterwa n’ibikorwa bya muntu biteza imihangagurikire y’ibihe.

Raporo y’Ihuriro ry’ibihugu ryita ku mihindagurikire y’Ikirere rishamikiye kuri Loni, IPCC [Intergovernmental Panel on Climate Change] yasohotse ku itariki 9 Kanama 2021, yerekanye ko ubushyuhe bw’u Rwanda burenze impuzandengo ya 1.09 Celsius 0.29 ku rwego rw’isi ndetse ugereranyije na Raporo yaherukaga yo mu 2013 ubushyuhe bwiyongereyeho dogere Celsius 0.29.

Uyu mubare ushobora kumvikana nk’aho ari muto ariko inararibonye zivuga ko ari munini cyane kuko uko umwuka w’Isi ushyuha ari ko umwuka uva mu Nyanja ugira uruhare mu kugwa kw’imvura ubura imbaraga, maze bimwe mu bice by’Isi bikabura imvura, ahandi amashyamba agashya cyangwa se ubutaka bukumagara.

Hakuzimana Herman inzobere mu bijyane n’ibidukikije ndetse n’imihindagurikire y’ikirere muri Ministeri y’Ibidukikije, yabwiye The New Times ko impamvu yateye kugabanuka kw’iminsi yagwagaho imvura mu Rwanda ari ubushyuhe bwo mu Burasirazuba no mu Rwanda hagati.

Yagize ati “Guverinoma y’u Rwanda irajwe inshinga no gufata ingamba zigamije kurengera ibidukikije no kurwanya ko habaho ihindagurika ry’ikirere.”

Ubushyuhe bwo mu Rwanda bwazamutseho dogere Celsius 1.4 kuva mu 1971 kugeza mu 2016.

Zimwe mu ngamba u Rwanda rwafashe ni ukugabanya imyuka mibi yoherezwa mu kirere, birimo gushishikariza abaturage gutera amashyamba no kwirinda kuyatema batwika amakara ahubwo bagakoresha gaz bateka.

Ikindi ruri gushyiramo imbaraga ni ikoreshwa ry’imodoka na moto zitanywa ibikomoka kuri peteroli ahubwo bikoresha umuriro w’amashanyarazi n’ibindi rukaba rufite gahunda yo kugabanya imyuka yoherezwa mu Kirere ku rugero rwa 38% kugeza mu 2030.

Vuningoma Faustin ukora mu kigo kitegamiye kuri leta cya Rwanda Climate Change and Development Network (RCCDN) yabwiye The New Times ko uretse kugabanya iyo myuka mibi yoherezwa mu kirere, u Rwanda rukeneye gushora imari mu mishinga ikora ibikorwa bitangiza ikirere.

Yongeyeho ati “Ibyagaragaye muri iriya raporo bivuze ko dukeneye gafata iya mbere mu kugabanya imyuka yoherezwa mu kirere duhereye ku bohereza myinshi. Ikibazo n’uko abo bohereza myinshi ntacyo bakora ngo igabanuke kuko baba barengera inyungu zabo.”

Hakuzimana we avuga ko ari ngombwa ko u Rwanda rufata iya mbere mu gushyiraho ingamba zirinda igabanuka ry’imyuka yoherezwa mu kirere kuko bitewe n’aho ruherereye rufite ibyago byinshi byo kugerwaho n’ingaruka ziterwa n’ubushyuhe bw’Isi.

Yongeyeho ko u Rwanda rwashyize imbere gahunda yo gukora ibikorwa bigamije kurinda ihindagurika ry’ikirere bigera kuri 24 mu cyiswe Nationally Determined Contributions (NDCs) bizashyirwa mu bikorwa kugera mu 2030, ndetse kugira ngo bikorwe u Rwanda rukeneye miliyari 5.3$.

Imvura yagwaga mu Rwanda yagabanutseho iminsi 45

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .