Ikaze ku Isôoko ya Nile, yavumbuwe na Richard Kandt muri Pariki ya Nyungwe

Yanditswe na Evariste Nsengimana
Kuya 14 Kanama 2019 saa 02:36
Yasuwe :
0 0

Nubwo waba warabyibagiwe, umuntu wese wagize amahirwe yo kwiga cyangwa gusoma ibitabo by’amateka n’ubumenyi bw’Isi, yumvise nibura ko Isôoko y’umugezi wa Nile, ufitiye akamaro gakomeye ibihugu bitandukanye, yavumbuwe mu Rwanda n’umushakashatsi w’Umudage, Dr Richard Kandt.

Umugezi wa Nile utemba mu bice bitandukanye by’Amajyaruguru ashyira Uburasirazuba bwa Afurika, niwo muremure ku Isi, ureshya na Kilometero 6,650. Gusa hari ibitabo bimwe bivuga ko ari uwa kabiri nyuma y’uwitwa Amazon ariko Wikipedia igaragaza ko ureshya na Kilometero 6400.

Uyu mugezi ufatiye runini Isi, cyane cyane Afurika mu bijyanye no kubona amazi abayituye bakoresha. Hari ibihugu bimwe biwufata nk’inka imwe birimo nka Misiri na Sudan n’ibindi, kuko ubifasha guhangana n’ingaruka z’ubutayu, bawifashisha mu bikorwa bya buri munsi nko kuhira imyaka n’ibindi.

Kuwa 7-10 Kanama 2019, umunyamakuru wa IGIHE kimwe n’abafite n’abakorera ibigo bifasha ba mukerarugendo mu Rwanda, basuye Isôoko na Nile yavumbuwe na Dr Richard Kandt muri Pariki ya Nyungwe, mu rugendo rugamije gutangiza inzira nshya y’ubukerarugendo bushingiye ku muco n’amateka.

Uru rugendo ikigo gishinzwe Ingoro z’Umurage w’u Rwanda n’Umushinga w’Abadage wita ku iterambere (GIZ) byabageneye, rwibanze ku mateka y’Ubukoloni bw’Abadege mu Rwanda by’umwihariko urugendo rwa Dr Richard Kandt wari ubahagarariye.

Dr Richard Kandt, umuvumbuzi uzwi cyane mu mateka y’u Rwanda no mu Karere ka Afurika y’Uburasirazuba yageze mu Rwanda mu 1898 aje mu bikorwa by’ubushakashatsi birimo gushakisha Isôoko y’uruzi rwa Nile.

Ubushakashatsi bugaragaza ko Dr Kandt yavumbuye Isôoko ya Nile mu ishyamba rya Pariki ya Nyungwe hagati ya Nyakanga na Kanama 1898 nyuma y’Ukwezi ageze mu gihugu, ahasiga ikimenyetso cy’uko ariyo Isôoko ya kure mu migezi yiterateranya ikawubyara.

Pariki ya Nyungwe ni ishyamba cyimeza ry’inzitane rimaze igihe kirekire muri Afurika, rikora ku Turere twa Nyaruguru, Nyamagabe mu Ntara y’Amajyepfo, Rusizi na Nyamasheke mu Ntara y’Uburengerazuba.

Ni Pariki yabayeho mbere y’izindi mu gihe cyiswe icy’ubutita (ice age) ikize ku runyurane rw’ibimera, ishyamba rigizwe n’amoko arenga 1068 y’ibimera, urwunge rw’ibiti by’indabyo zirimo ubwoko bw’ibiti n’iby’inganzamarumbo bya lobelia. Harimo n’ibiti bivamo imiti ya Kinyarwanda.

Iyi pariki ifite umwihariko wo kuba ariho hari amasôoko y’inzuzi nini muri Afurika. Harimo isôoko y’uruzi rwa Nile mu burasirazuba n’iy’uruzi rwa Congo mu Burengerazuba.

Kugera aho Dr Richard Kandt yemeje ko ariho Isôoko ya Nile iherereye, bigusaba urugendo rw’amasaha hagati y’atatu n’ane uturutse ku ishami rya Gisakura rishinzwe kwakira abakerarugendo mu Karere ka Nyamasheke, ukanyura muri Nyungwe hagati, ugatunguka mu Gasarenda muri Nyamagabe.

Kuva mu Gasarenda ugera ku Isôoko ya Nile harimo intera ya Km 42 ariko harimo izigera kuri 4.5Km umuntu agenda mu ishyamba rya Pariki ya Nyungwe rigizwe n’ubwoko bw’ibiti 250, ibimera 1068, inyamaswa 84 n’inyoni 299 burimo 27 bw’umwihariko mu Karere.

Nk’ibisanzwe mbere yo kwinjira muri Pariki, Umukozi ushinzwe kuyobora abakerarugendo muri Pariki ya Nyungwe witwa Ntoyinkima Claver, yatubwiye ko urugendo tugiye gukora ari rurerure, dusabwa kwitwaza amazi n’ibindi biribwa ariko twirinda kugira icyo dutamo cyangwa dukuramo, kwitwaza imyenda y’imvura n’inkweto ziturinda icyatubangamira.

Ni inzira y’inzitane inyura ahantu hameze nk’umuhora ariko ibiti n’ibyatsi biyuzuyemo ku buryo bisaba kugenda ubyegura cyangwa aho bibaye ngombwa ugasimba. Ni umurambi, n’ahaterera si cyane ku buryo hakubiza icyuya.

Ntoyinkima ati “Isôoko ya Nile tugiye kureba ni iyo yagezeho [Kandt] ya kure nubwo hari abandi bashakashashatsi bo muri New Zealand baje bakabona aharenzeho kilomotero mu 2006.”

Iyo Isôoko Kandt yavumbuye iri mu ishyamba hagati. Ni amazi macye azamuka mu butaka ku buryo no kuyavamo bitakorohera. Haruguru ikikijwe n’igishanga kirimo ibyatsi ukandagiraho ukumva hasukuma mu gihe ku rundi ruhande ari ibihuru bisanzwe.

Ati “Uko mureba kino gishanga, iyo imvura igwa amazi amanukamo, aka niko gasoko ka mbere atangira kuzamukamo...Ugenze nka metero 400 ugana hepfo ubona utundi dusoko twiyungaho, kakaba kanini kurushaho ku buryo ushobora kuyavomaho.”

Impamvu aho ariho hafatwa nk’Isôoko, Ntoyinkima asobanura ko ari uko ‘Iyo migezi yose upimye kuva ku nyanja ya Mediterane ukagera aho itangirira, aha niho usanga hari ibirometero byinshi’.

Nyuma y’uguhura k’utugezi two muri Nyungwe n’iyo sôoko yavumbuwe na Kandt, bikora umugezi witwa Rukarara, ugahura na Mwogo, nayo yahura n’uwitwa Mbirurume, bikabyara Nyabarongo.

Nyabarongo iyo imaze guhura n’Akanyaru bihinduka Akagera gasuka mu kiyaga cya Victoria ari nacyo umugezi wa Nile ufatiraho.

Ntoyinkima ati “Iri shyamba rifite akamaro kanini kuko navuga ko aricyo kigega cy’amazi y’u Rwanda kuko 70% by’akoreshwa mu Rwanda afata isoko muri iri shyamba.”

Igice cy’Uburasirazuba bw’ishyamba rya Pariki ya Nyungwe, Ntoyinkima yasobanuye ko kimena amazi mu kibaya cy’umugezi wa Nile naho igice cy’Uburengerazuba kikamena amazi mu kibaya cy’umugezi wa Congo.

Ikigo cy’igihugu ndangamurage kigaragaza ko kimaze gukora ubushakashatsi bugamije kugaragaza ibice nyaburanga by’u Rwanda abakerarugendo basura, bwagaragaje ibisaga 500 birimo 10 bifitanye isano n’urugendo rwa Dr Richard Kandt.

Abakorera ibigo biyobora ba mukerarugendo bahasuye ngo bage bahazana ababyifuza
Ahari isooko hashinzwe icyapa kihagaragaraza nk'ahantu nyaburanga
Bageze mu ishyamba rikikije Pariki ya Nyungwe bagiye ku isoko ya Nile
Igishanga bivugwa ko amazi agize isoko ya Nile yavumbuwe na Kandt apfupfunyukamo
Imiterere y'igishanga kivamo amazi y'isoko ya Nile
Iri tsinda ryasobanuriwe ko umugezi wa Rukarara ari umwe mu yihuza hakabaho Nle
Ishyamba rya Nyungwe Richard Kandt yavumbuyemo Isoko ya Nile
Isoko ya Nile yavumbuwe na Kandt muri Nyungwe
Kubera ukuntu ari kure, abahagiye bagerayo bakicara bakaruhukamo
Ntoyinkima ari gusobanurira abagiye kureba isoko ya Nile
Ntoyinkima ayoboye itsinda
Pariki ya Nyungwe igizwe n'ubwoko butandukanye bw'ibimera n'ibiti

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza