Ibyo wamenya ku mashyuza, amazi ashyushye akiza indwara

Yanditswe na Dufitumukiza Salathiel
Kuya 28 Gashyantare 2021 saa 10:43
Yasuwe :
0 0

Birashoboka ko wumvise, ubwirwa cyangwa usoma ahantu runaka amazi yitwa “amashyuza”, cyangwa ukaba ari n’ubwa mbere uyumvise. Niba warigeze kumva ibyayo cyangwa ukaba warayiboneyeho, amatsiko y’uko bigenda kugira ngo abe ashyushye ndetse abe imbonekarimwe ntiwabuze kuyagira.

Amashyuza ni amazi aba afite ubushyuhe ariko buri mu rugero. Ni amazi adakunze kuboneka henshi, ku buryo ahantu aboneka hakorerwa ubukerarugendo cyane, ab’impande zitandukanye baza kuyareba no kuyashaka dore ko ari n’umuti.

Mu gushaka kumenya uko bigenda kugira ngo ayo mazi abe ashyushye kandi ubusanzwe amazi aba akonje, IGIHE yagiranye ikiganiro kigufi n’umushakashatsi akaba n’umwarimu muri Kaminuza y’u Rwanda mu Ishami ry’Ubumenyi n’Ikoranabuhanga, Prof. Elias Bizuru.

Yasobanuye ko ayo mazi aboneka kubera imyotsi y’igikoma gishyushye (magma) kiba kibirira munsi y’umusozi, izamuka igasanga amazi y’isoko yo mu butaka maze ikayashyushya.

Yagize ati “Amashyuza abaho biturutse ku myotsi ya magma ziba munsi y’ikirunga iba yazamukanye mu butaka nk’ahantu hatanye[hakaboneka inzira], maze igahura n’amazi asanzwe y’umugezi, ikiyaga cyangwa ari mu butaka, ikayashyushya.”

Prof Bizuru yavuze ko iyo myotsi izamuka iba irimo ibinyabutabire (minéraux) byiganjemo soufre bivuye munsi y’ubutaka, maze bikajya muri ya mazi bikayakungahaza. Iyo ni yo mpamvu avugwaho kuba meza ku buzima.

Amashyuza akiza indwara

Abaturiye hafi y’ahaba amashyuza cyangwa abenshi mu bayasura bakunda kuvuga ko iyo bafite uburwayi bumwe na bumwe bayifashisha babwivura. Usanga hirya no hino ku Isi ahaboneka amashyuza hahora urujya n’uruza rw’abashaka gukira indwara zitandukanye.

Prof Bizuru yahamije ko ayo mazi afite ubushobozi bwo kuba yavura indwara zimwe na zimwe koko, bitewe n’ibinyabutabire biba biyarimo.

Yakomeje ati “Ayo mazi agira akamaro kanini ku buzima harimo no kuvura indwara zimwe na zimwe kubera ko haba harimo ikinyabutabire cya Soufre.”

Ubushakashatsi bwa Frontiers mu 2019 bwerekanye ko amashyuza yongerera imbaraga abasirikari b’umubiri, bigatuma babasha guhangana n’indwara zirimo iz’umutima, cancer ndetse n’iz’ubwonko.

Ayo mazi kandi agira akamaro mu gutunganya imyanya y’ubuhumekero ya ruguru, aho atuma ibimwira bisohoka neza ndetse bigatwara imyanda yose ku buryo mu mazuru hasigara hatunganye bikarinda nyir’ubwite kurwara imyanya y’ubuhumekero.

Amashyuza yifitemo ububasha bwo gukiza umuntu wabyimbiwe, uwagize uburwayi bw’uruhu ndetse akaba yanagabanya uburibwe umuntu afite mu gihe runaka.

Inyigo zitandukanye kandi zagiye zerekana ko amashyuza abamo ibinyabutabire byafasha umubiri w’umuntu guhashya udukoko dutera indwara z’ubuhumekero nka asthma n’indwara z’ibihaha z’akarande (MPOC).

Abakunze guhura n’ikibazo cyo gufurutwa, nabo amashyuza arakibakemurira iyo bayiyambaje. Indwara zirimo cancer na rubagimpande, ngo nazo amashyuza ashobora gufasha umubiri guhangana nazo nk’uko inzobere zibigaragaza.

Ku rundi ruhande ariko ayo mazi asanzwe akoreshwa yogwa cyangwa agakarabwa, ngo ashobora kugira ingaruka mbi n’ubwo bidakunze kubaho kenshi.

Prof Bizuru yagize ati “Igihe ayo mazi anyowe, iyo soufre ishobora gutuma amenyo ahinduka umuhondo. Urugero ni abaturage bo ku musozi wa Kilimanjaro. Amenyo yabo aba yarahindutse umuhondo kubera ko ayo mazi ari yo banywa gusa.”

Uretse kuvura indwara, mu 2012 intumwa z’Ubuholandi zageze ku mashyuza ya Bugarama zivuga ko ashobora no kubyazwamo amashanyarazi.

Kugeza ubu mu Rwanda ahaboneka amashyuza ni mu murenge wa Muganza mu karere ka Rusizi n’uwa Nyamyumba mu karere ka Rubavu.

Icyakora ay’i Rusizi yo hari impungenge z’uko ashobora gukama, nyuma y’uko aho yabaga yahimuwe akoherezwa mu mugezi wa Rubyiro.

Abashakashatsi basobanura ko amashyuza akunze kuboneka mu duce tw’ibibaya biri hafi y’imisozi miremire (la vallée du rift), ahabaye ukwitandukanya k’ubutaka.

Amashyuza yo mu murenge wa Nyamyumba muri Rubavu yarakikiriwe
Hari impungenge ku ikama ry'amashyuza y'i Rusizi
Isoko y'amashyuza yo muri Rubavu ahazwi nka Brasserie

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .