Ibiteye amatsiko ku ngoro ndangamurage y’ibidukikije yihariye muri Afurika iherereye i Karongi (Amafoto)

Yanditswe na Evariste Nsengimana
Kuya 15 Kanama 2019 saa 03:08
Yasuwe :
0 0

Mu 2015 nibwo ingoro ndangamurage y’ibidukikije ibitse ibikorwa bitandukanye by’urusobe rw’ibinyabuzima ya mbere mu Rwanda no mu karere ko munsi y’ubutayu bwa Sahara yafunguwe mu Murenge wa Bwishyura mu Karere ka Karongi, mu Ntara y’Uburengerazuba.

Icyo gihe ifungurwa yibandaga ku kumurika ibijyanye n’ingufu (Renewable and non renewable energy), urugendo rukorwa ngo zitange amashanyarazi n’ingaruka zigira ariko nyuma yaje kongerwamo ibijyanye n’inyamaswa n’amabuye y’agaciro byabaga i Kigali mu Ngoro y’Amateka kamere izwi nko kwa “Kandt”

Kuwa 7-10 Kanama 2019, umunyamakuru wa IGIHE kimwe n’abafite n’abakorera ibigo bifasha ba mukerarugendo mu Rwanda, basuye iyi ngoro ndangamurage y’ibidukikije, mu rugendo rugamije gutangiza inzira nshya y’ubukerarugendo bushingiye ku muco n’amateka.

Muri uru rugendo ikigo gishinzwe Ingoro z’Umurage w’u Rwanda n’Umushinga w’Abadage wita ku iterambere (GIZ) byabageneye rwibanze ku bifitanye amateka n’umuvumbuzi Dr Richard Kandt, basobanuriwe ibice by’ingenzi bigize iyi ngoro.

Dr Richard Kandt, umuvumbuzi uzwi cyane mu mateka y’u Rwanda no mu Karere ka Afurika y’Uburasirazuba yageze mu Rwanda mu 1898 aje mu bikorwa by’ubushakashatsi birimo gushakisha Isôoko y’uruzi rwa Nile, aza no kugirwa Rezida w’u Rwanda mu 1907.

Iyi ngoro igizwe n’ibice bitatu bimurikwa birimo ikijyanye n’ingufu, ikigizwe n’inyamaswa n’ubucukuzi bw’amabuye y’agaciro ndetse n’igice kirimo ubusitani bugizwe n’ibiti n’ibyatsi gakondo bitandukanye bya kinyarwanda kugira bidacika ahubwo abantu bajye bahakura imbuto.

Ikimurikirwamo amabuye y’agaciro agaragaza ubukungu bw’u Rwanda n’aho aherereye nka gasegereti, almunium, colta, wolfram n’ayandi. Iyi ngoro igaragaramo ibuye ryo mu bwoko bwa Meteorite[amanuka mu kirere ashyushye, abantu bakunze kwita kibonumwe], ryaguye mu Rwanda mu Karere ka Burera mu 1976.

Hari nyiramugengeri igaragara mu bice bitandukanye by’igihugu n’ubundi bwoko bw’amakara bugereranywa nayo ariko buba mu Budage gusa, amakara y’ibiti n’acukurwa.

Iyi ngoro kandi igaragaramo ubwoko butandukanye bw’ingufu zikoreshwa mu Rwanda zirimo izitangwa n’amazi, Gaz Méthane igaragara mu kiyaga cya Kivu, izituruka ku muyaga, ku mashyuza, ku zuba n’izindi. Hari n’igice kimurikirwamo ingufu za Iranium u Rwanda rurimo kwiga uburyo zakoreshwa.

Muri iyi ngoro hamurikirwamo ibisigazwa by’ingagi, imwe mu zavumbuwe bwa mbere muri Pariki y’Ibirunga. Muri iyi ngoro unasangamo ubwoko butandukanye bw’inyamaswa zumishije mu buryo bwa gihanga, ushobora kureba utitegereje neza ntubashe kuzitandukanya n’inzima.

Muri izo harimo inzoka, impala, ingona, isiha, ingwe, urusamagwe, inkima n’amoko y’inyoni atandukanye adakunze kugaragra aho ariho hose.

Uretse ibi bice, hari n’ikindi kimurikirwa ubwoko butandukanye bw’ibimera bifite amateka yihariye mu muco wa Kinyarwanda birimo n’ibyifashishwaga mu migenzo ya Kinyarwanda n’ubuvuzi bw’indwara zitandukanye aho abakozi bashinzwe gusobanurira abayisura bagufasha ku buryo utaha amatsiko yashize.

Ikigo cy’ingoro ndangamurage kigaragaza ko kimaze gukora ubushakashatsi bugamije kugaragaza ibice nyaburanga by’u Rwanda abakerarugendo basura, bwagaragaje ibisaga 500 birimo 10 bifitanye isano n’urugendo rwa Dr Richard Kandt.

Amwe mu mabuye y'agaciro amurikwa
Bumwe mu bwoko bw'inyoni zihamurikirwa
Umukozi w'iyi ngoro arimo gusobanura ubwoko bw'ingufu buhamurikirwa
Igice kimurikirwamo ibimera bifite amateka
Inkima iri mu nyamaswa zihamurikirwa
Isiha nayo imurikirwa kuri iyi ngoro
Ubwo iri tsinda ryatangiraga gusura iyi ngoro
Umukozi ushinzwe gusobanurira abasuye iyi ngoro arimo gusobanura ibyo bagasanga
Imwe mu ngona zumishijwe zihamurikirwa
Urusagwe rwumishijwe ngo rujye rumurikirwa abakerarugendo
Zimwe mu nyamaswa zihamurikirwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza