Ibihugu bigize EAC bigiye gufatanya n’u Rwanda guca amashashi

Yanditswe na Ishimwe Israel
Kuya 21 Ugushyingo 2016 saa 11:18
Yasuwe : XX
0

Abadepite bagize Inteko Ishinga Amategeko y’Umuryango wa Afurika y’Iburasirazuba (EALA), bateraniye i Nairobi muri Kenya mu nama izigirwamo uburyo bwo guhagarika burundu ikoreshwa ry’amashashi muri aka Karere.

Iyi nama y’ibyumweru bibiri yatangiye kuri uyu wa Mbere,tariki ya 21 Ugushyingo 2016, izasuzumirwamo ingingo zitandukanye zirimo n’iyo guhagarika gukoresha amashashi aza ku isonga mu byangiza ikirere.

Umushinga w’Itegeko rikumira imikoreshereze y’amashashi muri aka Karere ni igitekerezo cyatanzwe na Depite Patricia Hajabakiga, uhagarariye u Rwanda mu Nteko ya EALA.

Itangazo EALA yashyize hanze mu cyumweru gishize rivuga ko iri tegeko rifite intego yo gushyiraho gahunda ihamye yo kurushaho kubungabunga ibidukikije, binyuze mu gukumira abakora n’abakoresha ibikoresho bya pulasitiki, ababicuruza ndetse n’ababyinjiza mu gihugu.

Nyuma y’aho bigaragaye ko amashashi agira uruhare runini mu kwangiza ibidukikije, imiryango itegamiye kuri Leta mu Karere yishyize hamwe isaba ko kuyakoresha byahagarikwa kuko byangiza ubuzima bw’abaturage.

Depite Hajabakiga yasabye abagize Inteko Ishinga Amategeko mu Karere guhagurukira kurwanya ikoreshwa ry’amashashi hahagarikwa inzira anyuzwamo acuruzwa, muri 2011.

Kenya yaranzwe no kugenda biguru ntege ndetse ntikomeze ingamba zayo mu gufata icyemezo kubera umubare munini w’inganda zikora amashashi zihabarizwa.

Kenya yagerageje gukumira ikoreshwa ry’amashashi ishyiraho umusoro wa 120 %, biteza imyigaragambyo mu bacuruzi basaba ko umusoro wagabanywa.

Muri iyi nama iri kubera Nairobi, Kenya ishobora kwisanga isigaye mu muhezo kuko Tanzania n’u Rwanda byo byamaze kwemeza iri tegeko.

U Rwanda rwiyemeje guhagarika ikoreshwa ry’amashashi ndetse no kuyinjiza mu gihugu muri 2005, mbere y’uko muri 2008 hashyirwaho itegeko rikumira ikoreshwa n’iyinjizwa mu gihugu ryayo mu rwego rwo kurengera ibidukikije.

Ku rwego mpuzamahanga, ibihugu birimo Bangladesh, Botswana, Israel, n’u Bufaransa nabyo byamaze kwemeza iri tegeko.

Abacuruzi ndetse n’ababungabunga ibidukikije bagiye mu mihanda basaba Leta ya Kenya guhagarika ikorwa ry’amashashi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza