00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe ubukangurambaga bwo kwigisha abafundi kubaka inzu zihangana n’ibiza

Yanditswe na Thamimu Hakizimana
Kuya 31 Ukwakira 2021 saa 05:27
Yasuwe :
0 0

Minisiteri y’Ibikorwa by’Ubutabazi (MINEMA) yatangije ubukangurambaga bwo guhugura no kwigisha abafundi uko bagomba kujya bubaka inzu neza ku buryo idashobora gusenywa n’imvura mu rwego rwo gukomeza guhangana n’ingaruka ziterwa n’ibiza.

Ubu bukangurambaga bwatangijwe mu Kwezi kwahariwe guhangana n’ingaruka ziterwa n’ibiza bituruka ku mvura aho igenda yereka abafundi uko bakwiye kubaka inzu aho kuzisondeka kuko ari bimwe mu bituma zigwa iyo imvura yaguye.

MINEMA iri kugenda ihugura abafundi bo mu turere dutandukanye dukunze kwibasirwa n’ibiza iyo twaguyemo imvura nyinshi aho ibereka uko bakwiye kujya bubaka inzu neza bakanayishyiraho imisingi (Fondation) kugira ngo amazi atazinjiramo akazisenya no kuzirika ibisenge ngo umuyaga utabitwara.

Minisitiri ushinzwe Ibikorwa by’Ubutabazi, Kayisire Marie Solange, yavuze ko bahisemo guhugura abafundi kuko byagaragaye ko ahanini inzu zisenyuka kubera ko ziba zarubatswe nabi.

Ati “Urebye turimo kugenda twereka abafundi uko bakwiye kubaka inzu neza bakazishyiraho fondasiyo kubera ko inyinshi usanga zitazifite ku buryo aribyo bituma amazi azinjiramo zigasenyuka. Ni no kubigisha kuzirika ibisenge mu kwirinda ko umuyaga ubitwara kuko hari ibyo utwara kubera ko baba batabiziritse.”

Yongeyeho ko muri ubu bukangurambaga bari gushishikariza abaturage kujya batera ibiti bivangwa n’imyaka kugira ngo bijye bitangira umuyaga biwurinda kubasenyera inzu.

Abaturage basabwe kandi kujya bazirika ibisenge by’inzu zabo neza kuko iyo babikoze kare bidashobora kurenza amafaranga ibihumbi 10 mu gihe iyo byasenyutse usanga bihombya Leta kuko ibikoresha ku mafaranga arenze ibihumbi 300 Frw.

Harindintwari Olivier yabwiye IGIHE ko bishimiye cyane ko n’abafundi barimo kwerekwa uko bakwiye kujya bubaka inzu kubera ko nibamara kubimenya neza bizagabanya umubare w’inzu zisenywa n’imvura cyangwa umuyaga.

Ati “Twishimiye ko bari kugenda baduhugura uko tugomba kujya tuzirika ibisenge by’inzu zacu. Kuba n’abafundi bari kugenda babibereka banabashishikariza kubaka inzu zifite fondasiyo ni byiza kuko ayo mabwiriza twese nituyakurikiza nta kabuza imibare y’inzu zasenywagwa n’ibiza cyangwa ibisenge byatwarwaga n’umuyaga bizagabanuka.”

Umufundi witwa Habiyambere Emmanuel wo mu Murenge wa Shyorongi, Akarere ka Rulindo, na we avuga ko bishimiye ko bigishijwe uko bakwiye kujya bubaka inzu zikomeye.

Ati “Hari ubwo twubakaga inzu ntituzishyireho fondasiyo. Nahise ndahira ko nta muntu nzongera kubakira inzu idafite fondasiyo, nanjya ambwira ko nta mafaranga yayo afite nzajya mureka aho kugira ngo nkore ibinyuranye n’ibyo twasabwe.”

Ubu bukangurambaga bumaze gukorerwa mu Turere twa Rulindo na Nyagatare, bikaba biteganyijwe ko buzagezwa no mu bindi bice bitandukanye by’igihugu cyane cyane ahakunze kwibasirwa n’ibiza.

Ubu bukangurambaga bwatangijwe mu Turere twa Nyagatare na Rulindo ariko bikazakomereza ahandi
Minisitiri ushinzwe Ibikorwa by’Ubutabazi, Kayisire Marie Solange, yavuze ko ubu bukangurambaga buzafasha mu kwirinda ibiza
Abafundi bagaragaje ko ubu bukangurambaga ari ingirakamaro kuko ari bamwe mu bagira uruhare mu kubaka inzu zikomeye zizahangana n'ibiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .