Hakajijwe ingamba zo guhangana n’imvura y’itumba izaba nyinshi mu mezi atatu ari imbere

Yanditswe na Ntabareshya Jean de Dieu
Kuya 28 Gashyantare 2021 saa 12:31
Yasuwe :
0 0

Ibigo bitandukanye bivuga ko byafashe ingamba zo guhangana n’imvura y’itumba iziyongera mu bice bitandukanye by’igihugu mu mezi atatu ari imbere nk’uko Meteo Rwanda yabitangaje mu iteganyagihe ry’amezi atatu.

Ibigo bitandukanye birebwa ahanini n’iteganyagihe ry’ikirere bivuga ko byiteguye guhangana n’imvura nyinshi ishobora kugwa mu bice bitandukanye by’igihugu nk’Uburasirazuba, Umujyi wa Kigali n’ibice by’Intara y’Amajyepfo mu iteganyagihe ry’amezi atatu Meteo Rwanda yashyize ahagaragara.

Akenshi iyo havugwa iteganyagihe usanga Minisiteri ishinzwe ibikorwa by’ubutabazi Minema, Minisiteri y’Ubuhinzi n’ubworozi n’ibigo bibishamikiyeho, ibikorwaremezo n’ibindi ari byo bifata iya mbere mu kumva cyane ibijyanye n’iteganyagihe kandi hagafatwa ingamba zijyanye n’uko iteganyagihe ribiteganya.

Umuyobozi Mukuru Wungirije Ushinzwe Gusakaza Ibyavuye mu Bushakashatsi mu Kigo cy’Igihugu Gishinzwe Ubuhinzi n’Ubworozi RAB, Dr Charles Bucagu yavuze ko bagiye kwita ku kureba ibihingwa bizashyirwamo imbaraga muri iki gihembwe cy’ihinga.

Ati “Icyo tugiye gukora ni ukureba ibihingwa bizashyirwamo imbaraga cyangwa bishobora kuzashyirwamo umwihariko bijyanye cyane cyane n’imvura izaboneka kuko dufite gahunda twari twakoze y’igihembwe cy’ihinga cya B.”

Yakomeje agira ati“Aya makuru tuzashobora kuyakoresha mu gutegura iki gihembwe. Ikindi ni ukugira inama abahinzi y’ibigomba gukorwa kugira ngo iki gihembwe kizagende neza. Nk’ahagaragaye ko hashobora kuzagwa imvura nyinshi ishobora no guteza imyuzure ubwo ni ukwitegura. Muri make aya makuru agiye kudufasha kunoza neza gahunda y’igihembwe cy’ihinga.”

Yakomeje avuga ko RAB icyo baba bifuza ari ukongera umusaruro ariko hirindwa cyane n’ibiza ndetse n’igihombo cyaturuka ku mvura nyinshi cyangwa ku ibura ry’imvura ari nayo mpamvu yahamagariye abahinzi n’aborozi gushyira ibikorwa byabo muri gahunda y’ubwishingizi no kurushaho gushyira mu bikorwa ingamba zo kurwanya isuri.

Umukozi ushinzwe ibikorwa by’Ubutabazi muri Minisiteri Ishinzwe Ubutabazi (Minema) Habinshuti Phillippe, yavuze ko bigiye gutuma barushaho guhangana n’ibiza mbere y’uko biba.

Ati“Twebwe aya makuru y’iteganyagihe turagenda tukayahuza n’andi tuba dufite adufasha kumenya niba koko hazabaho ibiza, kuko imvura yonyine si yo ntambwe ibaho hari n’ibindi bigomba kurebwa nk’umuyaga, inkuba, n’ibindi. Bizadufasha gushishikariza abantu no gutanga imbuzi nk’uko dusanzwe tubikora twifashishije iteganyagihe ry’igihe gito. Nkaba nifuza ko ririya teganyagiye ry’igihe gito ryajya rizira igihe kugira ngo tubashe kurikoresha neza.”

Habinshuti yatanze n’icyifuzo cy’uko amakuru yose yajya yifashishwa mu kuburira abantu ko ahantu runaka hashobora kuba ikiza byajya bikorwa kare mu rwego rwo kubona uko babasha guhangana n’ibiza ndetse no kubyitegura.

Umuyobozi w’ishami rishinzwe ibikorwa muri Polisi y’u Rwanda, CP George Rumanzi yavuze ko nk’abashinzwe umutekano wo mu muhanda bazarushaho gutanga amakuru yo kuburira abaturage mu gihe habayeho ibihe bidasanzwe nko kwangirika k’umuhanda, inkangu, cyangwa mu gihe habayeho ibihu byinshi byateza impanuka.

Meteo Rwanda yahamagariye ibigo bya Leta n’ibyigenga n’ Abaturarwanda gushingira ku iteganyagihe bagafata ingamba zinyuranye zigamije kongera umusaruro w’ubuhinzi n’ubworozi. By’umwihariko inzego z’ubuhinzi zasabwe kwihutisha imirimo yo gutegura imirima irimo gutangira imbuto n’inyongeramusaruro ku gihe, kwirinda no gukumira ibiza, indwara, kubungabunga ibidukikije no gufata neza imiyoboro y’amazi mu by’umwihariko mu bice biteganyijwemo imvura nyinshi.

Inzego zitandukanye zagaragaje ko ziteguye guhangana n'imvura y'itumba biteganyijwe ko iziyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .