00:00:00 IGIHE NETWORK KN KINYARWANDA EN ENGLISH FR FRANCAIS

Abacuruzi basabye kubanza kwigishwa ibibi by’amashashi na pulastiki aho guhanwa

Yanditswe na Tuyishimire Raymond
Kuya 6 Gicurasi 2021 saa 02:43
Yasuwe :
0 0

Abacuruzi bo mu Mujyi wa Kigali basabye kubanza gusobanurirwa ibijyanye n’itegeko ry’ibidukikije cyane cyane irijyanye n’ububi bw’mashahi n’ibikoresho bya pulastiki, kugira ngo babe mu bafasha mu kurengera ibidukikije aho kuba mu babyangiza batabizi.

Babitangaje ubwo kuwa 30 Mata 2021,Ikigo cy’Igihugu gishinzwe kubungabunga ibidukikije (REMA), cyongeraga gukora ubukangurambaga ku bacuruzi bagicuruza amashashi ndetse n’ibikozwe muri purasitiki bikoreshwa rimwe, ari nako basobanurirwa ububi bwayo mu kwangiza ibidukikije.

Batamuriza Chantal akorera ubucuruzi mu murenge wa Kanombe mu Kagari ka Kabaza, yavuze ko atumva uburyo hari amasashe amwe yemerewa kwinjira mu gihugu.

Ati “ Icyashyirwamo imbaraga ni ukubanza kudusobanurira ibyemewe n’ibitemewe. Nk’ubu baramutse banciye amande bakavuga ngo fanta yo muri pulastiki ntiyemewe kandi nta kindi cyayisimbuye, urumva ko ari ikibazo gihari kandi umucuruzi adafitiye igisubizo cyacyo. Hari ibintu bavuga ko bitemewe kandi byageze ku isoko, nka OMO ziri mu masashe kandi zifite inganda zizikora kandi zizwi, ntekereza ko ari ho bakabanje kubikemura.”

Ngizwenayo Musa nawe yavuze ko kuba hari ibicuruzwa bimwe byemererwa kwinjira mu gihugu bipfunyitse mu masashi cyangwa pulastiki, biba bishobora gushyira mu gihombo umucuruzi.

Ati “Ibyiza bakabanje guca iyo pulastiki mbere y’uko yinjira mu gihugu kuko iyo yinjiye imbere mu gihugu uri kuyicuruza niwe ubihomberamo kurusha.Ibyiza bayikumira mbere y’uko yinjira. Bakadushakiye mbere ibyemewe ku buryo bitadushyira mu gihombo.

Umuyobozi Mukuru wungirije wa REMA, Munyazikwiye Faustin,yavuze ko iyo itegeko ryasohotse rireba buri umwe gusa ko hari abica mategeko nkana banyuza amasashe mu nzira zitemwe.

Yavuze ko ibicuruzwa byinjira bisa n’ibyemewe bipfunyitse mu masashe birimo inkweto , ibiribwa n’ibindi biterwa n’uko hari itegeko rigena amahoro y’ibidukikije, rigena ko agomba kuzajya acibwa ikintu icyo ari cyo cyose kivuye hanze gipfunyitse mu isashe kugira ngo ayo mahoro afashe mu gucunga neza uwo mwanda winjiye mu gihugu.

Yavuze ko hakiri imbogamizi kuko iryo tegeko ritari ryemezwa n’inzego zibishinzwe gusa ko rizakemura byinshi.

Ati “Nirisohoka rizafasha guhagarika bimwe mu bicuruzwa bipfunyitse mu masashi bitabuzwaga kwinjira mu gihugu kubera amasezerano igihugu kiba gifitanye n’ikindi mu bucuruzi. Hakazajyaho amategeko ariko atabangamiye ubwo bucuruzi”.

Munyazikwiye yavuze ko kandi hari ubwo abacuruzi bemererwa gutanga ibipfunnyitse mu masashi cyangwa pulastiki mu gihe hagaragaye ko nta kindi gihari kibisimbura.

Ati “ Itegeko ryateganyije ko mu gihe bigaragaye ko ikigiye gukorwa cyangwa ikigiye gupfunyikwa kidafite ikigisimbura REMA ishobora gutanga uburenganzira bwihariye ku muntu ufite ibyo ashaka gupfunyika.”

Itegeko N° 17/2019 ryo ku wa 10/08/2019 ribuza ikorwa, itumizwa mu mahanga, ikoreshwa n’icuruzwa ry’amasashe n’ibikoresho bikozwe muri pulasitiki bikoreshwa inshuro imwe.

Naho ingingo ya 10 ivuga ko umuntu utumiza mu mahanga amasashe n’ibikoresho bikozwe muri pulasitiki bikoreshwa inshuro imwe ahanishwa kwamburwa ayo masashe n’ibyo bikoresho no kwishyura ihazabu yo mu rwego rw’ubutegetsi ingana n’inshuro icumi (10) z’agaciro k’ayo masashe n’ibyo bikoresho bikozwe muri pulasitiki bikoreshwa inshuro imwe.

Ni mu gihe umuntu uranguza amasashe n’ibikoresho bikozwe muri pulasitiki bikoreshwa inshuro imwe ahanishwa ihazabu yo mu rwego rw’ubutegetsi ingana n’amafaranga y’u Rwanda ibihumbi magana arindwi (700.000 FRW) kandi ayo amasashe n’ ibyo bikoresho akabyamburwa, naho umuntu ucuruza mu buryo butaranguza amasashe n’ibikoresho bikozwe muri pulasitiki bikoreshwa inshuro imwe agahanishwa ihazabu yo mu rwego rw’ubutegetsi ingana n’amafaranga y’u Rwanda ibihumbi magana atatu (300.000 FRW) kandi ayo masashe n’ibyo bikoresho akabyamburwa nk’uko ingingo ya 11 n’iya 12 z’iryo tegeko zibivuga.

Amazi apfunyikwa muri purasitiki nayo kuri ubu yahawe igihe cyamezi make maze akaba yabujijwe abikorera bakazapfunyika amazi mu macupa y ibirahuri
Hari amashashi yagaragaye apfunyitse mu dukarito ku buryo bitatahurwa ko ari yo
Mu Murenge wa Kanombe Akagari ka Kabeza ni hamwe mu ho REMA yatangiriye ubukangurambaga bwo kwigisha abaturage itegeko ribuza abantu gukoresha amashashi
Umukozi wa REMA ari kwigisha abacuruzi ko badakwiye gukoresha amashashi cyangwa ibikoresho byo muri pulastiki bikoreshwa rimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .